logo

суханрониҳо

Суханронии Эмомалӣ Раҳмон, Президенти ҷумҳурӣ, дар вохӯрӣ бо омӯзгорону хонандагони Мактаб - интернати ҷумҳуриявӣ барои кӯдакони ношунавои ноҳияи Рӯдакӣ, 1 ноябри соли 2012

Омӯзгорону хонандагон ва падару модарони азиз!
Муассисаи таълимие, ки ҳоло мо дар саҳни он қарор дорем, соли 1944-ум, яъне дар давраҳои вазнини Ҷанги Бузурги Ватанӣ бунёд гардида, 68 сол инҷониб самаранок фаъолият дошта, дар таълиму тарбияи фарзандони имконияташон маҳдуди кишварамон саҳми арзанда дорад.
Бояд ёдовар шуд, ки дар он солҳои бениҳоят душвор падару бобоёни мо бо вуҷуди ниҳоят кам дастрас будани адабиёти таълимиву асбобу ашёи хониш ва шароити таълимӣ аз ҳамаи имкониятҳои мавҷуда истифода карда, ҷиҳати раҳо бахшидани мардуми кишвар, алалхусус ҷавонони имконияти маҳдуддошта аз гирдоби бесаводӣ дар бунёду фаъолияти ин мактаб - интернат донишу маҳорат ва истеъдоди хешро дареғ надошта буданд.
Ин кори хайру савобро давлату Ҳукумати кишвар дар давраи соҳибистиқлолии Ватанамон идома дода, сол аз сол дар самти беҳтар намудани раванди таълим ва фароҳам овардани шароити мусоиди моддиву маишии мактаб-интернатҳо чораву тадбирҳои зарурӣ меандешад.
Айни замон шароити зист ва таҳсили кӯдакони ятиму бепарастор ва имконияташон маҳдуд дар мактаб-интернатҳои мамлакат рӯ ба беҳбудӣ овардааст. Ҳоло дар мамлакат 84 мактаб - интернат ба таълиму тарбияи кӯдакону наврасон машғул буда, бо дастгирии Ҳукумати кишвар сатҳу сифати дониш дар ин муассисаҳои таълимӣ тадриҷан беҳтар гардида, солҳои охир иштироки хонандагони мактаб - интернатҳо дар озмуну олимпиада ва дигар чорабиниҳои таълимиву тарбиявӣ назаррас мегардад.
Ҳамзамон бо ин, то имрӯз таъмиру азнавсозии мактаб-интернатҳои ноҳияҳои Рӯдакӣ, Рашт, Нуробод ва Ҷалолиддини Румӣ аз ҳисоби маблағҳои буҷет бо сифати хуб ба анҷом расида, ҷиҳати васеъ намудани ҷои зист ва қабулу фарогирии ҳамаи кӯдакони имконияташон маҳдуд ба таълиму тарбия тадбирҳои иловагӣ андешида шуда, таъмири мактаб-интернати низомаш махсуси ноҳияи Ҳисор бо маблағи қариб як миллиону 200 ҳазор сомонӣ идома дорад.
Мактаб - интернати кӯдакони ношунавои ноҳияи Рӯдакӣ дар масоҳати қариб ду ҳазор метри мураббаъ ҷойгир буда, дорои 27 синф, аз ҷумла ду синфхонаи компютерӣ бо тамоми таҷҳизоти зарурӣ таъмин мебошад ва дар он 250 нафар хонандаи синну соли гуногун ба таҳсил фаро гирифта шудааст, ки 68 нафарашро духтарон ташкил медиҳанд.
Дар муассисаи мазкур 56 нафар омӯзгору мураббии баландихтисосу таҷрибанок ва 34 нафар коргари техникӣ назорати доимии кӯдаконро таъмин намуда, бо онҳо машғулиятҳои гуногуни таълимиву тарбиявӣ мегузаронанд.
Ҳамзамон дар муассиса маркази касбомӯзӣ амал мекунад ва хонандагон аз рӯи панҷ касб - дӯзандагӣ, устои сартарош, пойафзолдӯзӣ, гаҷкорӣ ва рассомӣ таълим гирифта, баъди хатми таълимгоҳ соҳиби ҳуҷҷати тахассусӣ мегарданд.
Бояд хотирнишон сохт, ки танҳо дар давоми бист соли охир қариб 300 нафар хонанда мактаб – интернати мазкурро бомуваффақият хатм намуда, аз ҷумлаи онҳо 81 нафарашонро духтарон ташкил медиҳанд, ки имрӯзҳо дар шаҳру ноҳияҳои гуногуни кишвар тибқи касбҳои омӯхтаашон ба фаъолияти меҳнатӣ машғул мебошанд.
Махсусан мехоҳам таъкид намоям, ки муассисаи мазкур ҳатто дар замони нооромиҳои солҳои навадуми асри гузашта бо дастгирии Ҳукумати мамлакат ва омӯзгорону дигар кормандони соҳаи иҷтимоии кишвар ягон рӯз фаъолияти худро қатъ накардааст.
Пас аз соҳибистиқлолии Ватани маҳбубамон барои мактаб - интернатҳои мамлакат нақшаҳои нави таълимӣ таҳия гардида, ҷиҳати аз худ намудани касбу ҳунарҳо тамоми шароитҳо фароҳам оварда шудаанд. Алалхусус касбҳои сартарош, дӯзанда, қаннод, дуредгар, кафшергар омӯзонида шуда, хатмкунандагон дорои сертификат ва шаҳодатнома мегарданд.
Мактаб - интернати ноҳияи Рӯдакӣ дар зарфи 35 сол умуман таъмир нагардидааст ва солҳои охир дар вазъияти садамавӣ қарор дошт. Соли 2012 бо ибтикор ва саҳмгузории бевоситаи ашхоси саховатпешаи ҷамъияти “Ситора трейдинг” дар зарфи нуҳ моҳи соли ҷорӣ бинои хобгоҳи дуошёна, ошхона, маҷлисгоҳу толори варзишӣ ва синфхонаҳои он бо сатҳу сифати баланд аз таъмир бароварда шуда, бо таҷҳизоту лавозимоти зарурӣ таъмин гардид.
Дар баробари ин, тамоми таҷҳизоти ошхонаву толори варзишӣ ҷавобгӯ ба талаботи муосир ҷиҳозонида шуда, роҳравҳои ҳавлии мактаб мумфарш ва барои истироҳату сайру гашти хонандагон мусоид гардонида шудаанд. Ҳамзамон бо ин, бо дастгирии ҷамъияти мазкур катҳои хоби кӯдакон пурра иваз карда шуда, 16 компютер, ду адад тахтаи электронӣ, ду таҷҳизоти наворбардорӣ ва тамоми синфхонаву толори маҷлисгоҳ бо мизу курсӣ, ҷевонҳо ва бо лавозимоти зарурӣ таъмин карда шудааст.
Ҳаммому хонаҳои истироҳатӣ ва дигар утоқҳои ёрирасон низ дар доираи талаботи стандартҳои сохтмонӣ таъмир гардида, бо телевизору дастгоҳҳои наворбардорӣ ва ҷевону роҳаткурсиҳои замонавӣ муҷаҳҳаз карда шудаанд.
Хонандагони муассиса чаҳор маротиба бо хӯроки гарм таъмин буда, илова бар ин, аз ҷониби сарпарастону шахсони саховатпеша низ мунтазам ёрии ғизоӣ расонида мешавад. Бо истифода аз ин фурсати муносиб ба чунин шахсони ватандӯсту саховатпеша, ки ба хонандагони муҳтоҷу маҳдудияти ҷисмонидошта ёрии бевоситаи моддиву молиявӣ мерасонанд, изҳори сипосу миннатдорӣ баён менамоям.
Дар баробари ин, айни замон дар синфхонаҳои мактаб-интернат норасоии китобҳои махсуси дарсӣ бо забони давлатӣ ва маҷмуи маводи аёнӣ ба мушоҳида мерасад. Аз ин рӯ, ба Вазорати маориф ва мақомоти иҷроияи маҳаллии ҳокимияти давлатии ноҳияи Рӯдакӣ супориш дода мешавад, ки дар муҳлатҳои кӯтоҳтарин ҷиҳати бартарафсозии норасоиву камбудиҳои ҷойдошта тадбирҳои мушаххас андешанд.
Феълан дар муассисаи мазкур бо мақсади табодули таҷрибаи корӣ, баланд бардоштани маҳорати касбӣ, дарёфти омӯзгорони навовару эҷодкор ва расонидани ёрии методӣ ба омӯзгорони ҷавон 4 иттиҳодияи методӣ ташкил карда шудааст. Ҳамчунин маъмурияти мактаб барои сайқал додани савияи донишу маҳорати касбии омӯзгорон семинарҳои дастурдиҳӣ, аз ҷумла «Забони имову ишора», «Тарзи дуруст мондани овоз ва ислоҳи нуқсонҳои нутқӣ» ва «Омӯзиши компютер» ташкил намудааст.
Бояд хотирнишон сохт, ки қаблан мутахассисони мактаб-интернатҳои махсуси мамлакат, аз ҷумла равоншиносон, дефектологу логопед ва сурдапедагогҳо дар кишварҳои хориҷӣ тайёр карда мешуданд ва имрӯз барои омода намудани чунин ихтисосҳо дар муассисаҳои таълимии кишвар имкониятҳо мавҷуд мебошанд. Бинобар ин, Вазорати маориф ва Академияи таҳсилот вазифадор карда мешаванд, ки якҷо бо дигар вазорату идораҳои дахлдор ҷиҳати тарбия ва омода намудани мутахассисони зикршуда тадбирҳои амалӣ андешанд.
Бояд қайд кард, ки соли 2011 қарори Ҳукумати Тоҷикистон дар бораи «Консепсияи миллии таҳсилоти фарогир дар Ҷумҳурии Тоҷикистон барои солҳои 2011-2015» ба тасвиб расидааст, ки тибқи он заминаҳои ҳуқуқии таълиму тарбияи кӯдакони имконияташон маҳдуд фароҳам оварда шуда, ҷиҳати дар мактабҳои маҳаллӣ ва мактаб-интернатҳо ба таҳсил фаро гирифтани ҳамаи наврасони имконияташон маҳдуд тамоми шароитҳои зарурӣ муҳайё карда мешаванд.
Санади мазкур имконият медиҳад, ки кӯдакони имконияташон маҳдуд сарфи назар аз шакли бемориву норасоии ҷисмонӣ якҷо бо кӯдакони солим таҳсил намоянд, то ки дар ҷомеа худро ҳамчун узви баробарҳуқуқ эҳсос кунанд. Ҳоло дар назди Вазорати маориф доир ба таҳияи китобу барномаҳои таълимӣ гурӯҳи корӣ ташкил гардида, кор дар ин самт оғоз шудааст. То имрӯз бештар аз 20 номгӯи китобу барномаҳо таҳия ва барои нашр пешниҳод гардидаанд.
Бо вуҷуди ин, раванди таълиму тарбия дар мактаб-интернатҳои махсус ҳоло талаботи моро қонеъ гардонида наметавонад. Зеро барои боз ҳам баланд бардоштани сифати таҳсил ва ба таври васеъ ба илмҳои гуногуни замонавӣ фаро гирифтани кӯдакони имконияташон маҳдуд мо бояд корҳои зиёдро ба сомон расонем.
Вобаста ба ин, Вазорати маориф ва Академияи таҳсилотро зарур аст, ки барои ба талаботи замони муосир ҷавобгӯ гардонидани фаъолияти таълимии мактаб - интернатҳои кишвар барои кӯдакони имконияташон маҳдуд аз тамоми захираҳои мавҷудаи омӯзишиву кадрӣ самаранок истифода намоянд. Илова ба ин, ҳар як фарди ватандӯсти мамлакат бояд фаромӯш насозад, ки яке аз самтҳои муҳими сиёсати иҷтимоии Ҳукумати Тоҷикистон ин ҳифзу дастгирии табақаҳои ниёзманди мамлакат мебошад.
Аз ин рӯ, мо бояд аз тақдиру қисмат ва ҷараёни зиндагии шахсони барҷомонда, маризону бепарасторон ва хусусан фарзандони нуқсонҳои ҷисмонидошта дар канор набошем ва нагузорем, ки онҳо дар ҷомеа худро танҳо эҳсос кунанд. Чунки раҳму шафқат, сила кардани сари ятимону ранҷурон, дастгирии барҷомондагон ва нигоҳубини маъюбон хислати азалии мардуми тоҷик маҳсуб ёфта, аз фарҳанги пурғановату эътирофшудаи миллати мо сарчашма мегиранд.
Дар тӯли чанд соли охир дар баробари ҷудо гардидани маблағҳои буҷетӣ барои интернатҳо тибқи супориши Президенти мамлакат муассисаву корхонаҳо ва тоҷирону соҳибкорони саховатпеша дар арафаи ҷашну идҳо ба мактаб - интернатҳо маводи ғизоӣ, китоб, ашёи хониш ва сару либос мадад мерасонанд.
Дар кишвар шумораи маъюбону бепарасторон чандон зиёд нестанд ва бо истифода аз фурсати муносиб аз шахсони саховатпеша, тоҷирону соҳибкорон даъват менамоям, ки хайру саховат ва эҳсонкориву ёрии худро нисбат ба чунин эҳтиёҷмандон на танҳо дар рӯзҳои ҷашну идҳо, балки ба таври доимӣ расонанд.
Дар хотима ба ҳамаи шумо – омӯзгорону хонандагони азиз ва ҳозирини иззатманд сиҳатии бардавом, рӯзгори хуш ва дар кору фаъолияти пурмасъули омӯзгориатон барору муваффақият таманно менамоям.

Ҳамеша хушбахту сарбаланд бошед!


Баёни ақида (0)    Санаи нашр: 6.11.12    №: 138    Мутолиа карданд: 621

03.05.2019


 ТАВСЕАИ ҲАМКОРИҲОИ СОХТОРҲОИ ГЕОЛОГИИ ТОҶИКИСТОНУ ӮЗБЕ-КИСТОН

 МУЛОҚОТИ ИСМАТУЛЛО НАСРЕДИН БО МЕҲР ХОЛИД

 ФИЛМИ «ТАНГНО» АЗ ҚАЗОН БО ҶОИЗА БАРГАШТ

 ИҶОЗАТНОМА БАРОИ ФАЪОЛИЯТИ ОПЕРАТОРИ НИЗОМИ ПАРДОХТӢ

 ЁВОН. БУНЁДИ 341 ИНШООТ ТО ҶАШНИ ФАРХУНДА

 ВАРЗОБ. ФАРДО АЗ ИМРӮЗ ЗЕБОТАР ХОҲАД ШУД

 ОЛМОН ЗИДДИ ВУРУДИ НИЗОМИЁН БА ВЕНЕСУЭЛА

 ДАР ҲИНДУСТОН АЗ ХАТАРИ ТУНДБОДИ «ФАНИ» БЕШ АЗ 800 ҲАЗОР НАФАР КӮЧОНДА ШУД

 ПАРЛАМЕНТИ ҚИРҒИЗИСТОН КОРКАРДИ КОНҲОИ УРАНРО БОЗДОШТ

 ДАР ТУРКМАНИСТОН НАРХИ ЧИПТАИ ҲАВОПАЙМОҲО ДУ БАРОБАР БОЛО РАФТ

ТУРКИЯ СЕЮМ КИШВАРИ САБЗТАРИНИ ДУНЁ ЭЪТИРОФ ШУД

02.05.2019


 Ҳадияи раиси шаҳр ба ифтихори 74 – умин солгарди Рӯзи Ғалаба

 Мулоқоти Хусрав Нозирӣ бо Муҳаммад ибни Абдураҳмон

 Баррасии фаъолияти ҳуқуқэҷодкунӣ дар кишвар

 ҶОМИ КФО. Пирӯзии «Истиқлол» бар «Дордой»

 Баргузории мизи гирд доир ба дипломатияи мардумӣ дар Тошканд

 Ҷонибҳои тақобули Сурия қисме аз масоили баҳсиро ҳал намуданд

 ЮНИСЕФ: "Беш аз 2 миллион нафар мардуми Ангола аз хушксолӣ дар азоб аст"

Дар Ҷопон давраи нави Рэйва оғоз ёфт

 Ҷаҳон дар як сатр

01.05.2019


Ноболиғони тоҷик ба Ватан баргардонда шуданд

Вохӯрии Сироҷиддин Муҳриддин бо Ҳамад Солим

Рушди иҷтимоиву иқтисодии минтақаҳои кишвар матраҳ гардид

Се собиқадори тоҷик дар паради Ғалаба дар Москва ва Санкт - Петербург ширкат мекунанд

Дар Венесуэла исён зидди ҳукумат бебарор анҷом ёфт

Дар Либия 345 нафар қурбони бархӯрди мусаллаҳона гашт

Истеҳсоли рекордии чой дар Кения

Дар Париж ба барҷастатарин занҳои олим арҷгузорӣ намуданд

ҶАҲОН ДАР ЯК САТР

23.04.2019


ДЗЮ – ДО. Медали нуқраи Темур Раҳимов аз Чемпионати Осиё

Тиб. Муваффақияти камназири ҷарроҳони рус

Пирӯзии Зеленский дар интихоботи Украина

Фоҷиа дар Шри-Ланка Теъдоди қурбониён ба 300 нафар расид

Лукашенко Россияро ҳомии истиқлолияти Беларус номид


Дар сомонаҳои дигари Тоҷикистон хонед