logo

суханрониҳо

ҶОВИДОНАГИИ НАВРӮЗ АЗ КАМОЛИ МАЪНАВИИ ИНСОН АСТ

Суханронии Эмомалӣ Раҳмон, Президенти Ҷумҳурии Тоҷикистон, дар маросими расмии ҷашни байналмилалии Наврӯз дар Афғонистон, 27 марти соли 2014

Ба номи Худованди ҷону хирад,
Ҷалолатмаоби муҳтарам Ҳомид Карзай, Раисҷумҳури Ҷумҳурии Исломии Афғонистон!
Ҷалолатмаобон раҳбарони давлатҳо, парлумонҳо ва ҳукуматҳо, аъзои муҳтарами ҳайатҳои расмӣ, фарҳангиён,
Ҳунармандон ва равшанфикрони арҷманд, хонумҳо ва ҷанобон,
Дӯстони гиромӣ ва кулли ҳозирини арҷманд,
Мову шумо дар ин хиттаи зебои доманаҳои Ҳиндукуши сафедпӯш, сарзамини ишқи Рустами Дастон ва бузургмардони кушонӣ, сарзамини мардхез ва қаҳрамонпарвар ба манзури таҷлили зеботарин ва дилангезтарин ҷашни инсонӣ - Наврӯзи оламафрӯз гирди ҳам омадаем.
Иҷозат диҳед нахуст ҳар яки шумо, мардуми шарифу муборизи Афғонистон, мардумони ҳавзаи бузурги Наврӯз ва тамоми афроди фарҳанггустар ва тамаддунписанди ҷаҳонро ба ифтихори ин ҷашни бузург сидқан табрик намоям.
Наврӯзатон пирӯз бод!
Ҳар рӯзатон Наврӯз бод!
Наврӯз падидаест, ки ҷаҳони маъниро дар худ нуҳуфта ва розҳои фалсафии он ковишу таҳқиқоти ҷомеъ ва амиқро тақозо доранд.
Наврӯз дар зоти худ шинохти ақлӣ ва сиратии инсон аз низоми малакутӣ ва табиии ҷаҳон аст. Назму низоме, ки дар шинохти орёиҳои бостонӣ бар мабнои ростӣ, некӣ, озодагӣ, эътидол ва созандагӣ устувор аст ва маънии воқеии ҳастии инсонро таъйин менамояд.
Наврӯз тайи тақрибан 6000 соли таърихи пуршебу фарози хеш мазмуни васеъ ва амиқи иҷтимоӣ ва амалӣ касб намудааст.
Дар раванди таърих Наврӯз нахуст қадимтарин ва дақиқтарин ҷашни соли нав ё ба таъбири алломаи бузург Абурайҳони Берунӣ «пешонии соли нав» аст. Маҳз таъйини соли нав, ки мабдаи дақиқи кайҳонӣ дошт, таърихро чун сарнавишти инсон дар дарозои замон маънии воқеӣ бахшид.
Наврӯз аз сароғоз шаҳсутунҳои ҳастии иҷтимоӣ ва тамаддунии инсонро мушаххас ва муайян намуд.
Наврӯз амали созанда ва халлоқро чун нахустунсури фаъолияти инсон муаррифӣ кард, ки баёнгари возеҳтарини он барзгарӣ ва кишоварзӣ ва дар маҷмӯъ фаъолияти иқтисодӣ ва созандаи иҷтимоист. Маҳз ҳамин амал имкон медиҳад, ки ҷомеа ба пешрафт ва рушди матлуб ноил гардад.
Шаҳсутуни дигари ҷомеа дар фалсафаи Наврӯз озодагӣ мебошад. Он баёнгари покии тан ва рӯҳи озодагӣ ва наҷобати пиндор, гуфтор ва кирдори афроди ҷомеа, покиву назофати ҳаво, замин, об ва муҳити зист, сиҳати инсон, парвариши рӯҳи солим аз меъёрҳои ҳастии инсонист.
Ҳатмӣ медонанд, ки дар вуруди ин хуҷастаҷашн инсонҳо қалбҳои худро аз ҳама гуна душманӣ, кудурат, бухлу ҳасад ва пиндору андешаҳои номатлуб пок намоянд ва қалбҳоро маъвои меҳру муҳаббат ва ваҳдату ҳамбастагӣ созанд. Амре, ки барои кулли ҷомеаи ҷаҳонӣ имрӯз чун обу ҳаво ҳаётист.
Имрӯз, ки Афғонистон Наврӯзгоҳи ҷаҳон аст, мо аз ҳама фарзандони ин хиттаи бостонӣ даъват менамоем, ки манфиатҳои волои кишвар ва мардуми худро аз манофеи сиёсӣ, миллӣ, қавмӣ, минтақавӣ бартар донанд ва ба хотири таъмини зиндагии шоистаи мардум ва дурнамои неки кишварашон масъулона ва хирадмандона гом бардоранд.
Қобили зикри хос аст, ки Наврӯз бар мабнои ризоияти умум ҷашне чунин шоиста шуд. Ва ризоияту тафоҳум, машварату маслиҳат ва муҳимтар аз ҳама - раъйи озод ва масъулонаи шаҳрвандон ва низоми мардумсолор бар мабнои ин раъй ва иродаи умумии мардум маҳсули мантиқи Наврӯз аст.
Наврӯз дар низоми ҷомеа ва фаъолияти иҷтимоии инсон асли эътидолро чун асли бунёдӣ ва мизони возеҳ арзёбӣ намудааст.
Мову шумо хуб медонем, ки Худованди азза ва ҷалла уммати мусулмонро уммати васат хондааст ва васат баёнгари силсилаи бузурги сифатҳои воло ва фазилатҳост. Васат ё эътидол – роҳи хирад, созандагӣ, рушд ва саодати инсонҳо мебошад. Баръакс, ифрот ва тафрит дар пиндор, гуфтор ва кирдор бунёди тамаддунӣ ва фарҳангии ҷомеаро халадор намуда, муҷиби бадбахтиҳо ва фоҷиаҳои инсонӣ мегардад.
Ҷовидонагии Наврӯз ба ҳайси қадимтарин ҷашни зиндаву пойдори ҷаҳон дар пайванди ногусаста бо ниёзҳои ҳаётӣ ва сиратии инсон - зиндагии озодаву шоиста, пешрафти иҷтимоӣ ва бахусус камоли маънавии инсон аст.
Мо қодирем ба илҳом аз суннати Наврӯз ва корбурди ниҳодҳо ва шеваву василаҳои навини ҳамкорӣ рушди ҳамагонии кишварҳои худ ва сатҳи сифатан нави ҳамкориву ҳамгироиро дар минтақаи таърихии Осиёи Марказӣ ва тамоми ҳавзаи Наврӯз таъмин намоем.
Намунаи мисол, бунёди ҳамагӣ чанд неругоҳи обӣ, хатҳои бузурги интиқоли барқ ва лӯлаи газ имкони онро фароҳам меорад ки талаботи рӯзафзуни минтақа ва берун аз он бо барқи арзон ва пок, газ, оби ширин ва оби зироатӣ таъмин гардад, садҳо ва ҳатто ҳазорҳо коргоҳҳо эҷод шаванд, миллионҳо ҳектор замин обёрӣ шавад, миллионҳо нафар соҳиби ҷои кор ва маоши муносиб гарданд, суръати рушди иқтисодӣ ҳадди ақалл ду баробар афзоиш ёбад ва нақши геоиқтисодиву геостратегии минтақаи мо ҷиддан боло равад.
Ба тариқи мисоли дигар сохтмони якчанд қитъаҳои роҳи оҳан дар қаламрави кишварҳои мо имкони онро муяссар месозад, ки транзити мол байни минтақаҳои таърихии Авруосиё ва бахусус байни ду маркази бузургтарини иқтисодии ҷаҳон - Осиёи Шарқӣ ва Урупо аз тариқи кӯтоҳтарин роҳ таъмин гардад ва нақши транзитии кишварҳои минтақа бамаротиб боло равад.
Ман мутмаинам, ки мо бо ҳусни ният, ҳамкории содиқонаву созанда, посдорӣ аз фарҳанги арзишманди дӯстӣ, ҳусни ҳамҷаворӣ ва кумаку мусоидати дӯстона, ки аз суннати бузурги Наврӯз баҳравар ва ғаноманд шудаанд, метавонем ба аҳдофу ормонҳои волои мардумони худ ноил оем.
Дар ин шоиста ҷашне ва дар ин шоиста рӯзе орзуманди хушрӯзӣ, сарсабзӣ ва саодати наврӯзии ҳамагон ҳастам.
Наврӯзи якояки шумо пирӯз, ҷовидон ва дурахшон бод!


Баёни ақида (0)    Санаи нашр: 29.03.2014    №: 58    Мутолиа карданд: 794

19.11.2019


Тасдиқи Тартиби кори шабакаи иттилоотӣ-телекоммуникатсионии интернет аз рӯи технологияи Wi-Fi

Мулоқоти Ҷамолиддин Нуралиев бо Ҷон Гинкел

Тақвияти ҳамкориҳои иқтисодӣ матраҳ гардид

Туҳфаи Рустами Эмомалӣ барои сокинони шаҳри Хоруғ

Панкратион. Паҳлавони тоҷик чемпиони ҷаҳон шуд

18.11.2019


Таҷлили Рӯзи Президент дар шаҳри Хоруғ

Ҷаласаи вазирони корҳои хориҷии Осиёи Марказӣ дар Тошканд

Масъалаи сармоягузории хориҷӣ ба низоми бонкии Тоҷикистон матраҳ гардид

Путин БРИКС - ро кафили суботи ҷаҳон номид

Чаро ИМА ва Корея машқҳои муштаракро мавқуф гузоштанд?

ХДУ ва СРУ дар вилояти Киев "яке аз сарони ДИ" - ро боздоштанд

Туркия 23 террористро ба Қирғизистон истирдод мекунад

Ҷаҳон дар як сатр

Ҷоми ҷаҳон дар Бразилия монд

15.11.2019


Ҳамоиш бахшида ба Рӯзи Президент

Вохӯрии Ҷамшед Нурмаҳмадзода бо ҳайати Фонди қарзии кафолатии Тоҷикистон

Хонандагони тоҷик дар озмуни «Роботтехника» сазовори ҷойи дуюм шуданд

Талаби Си Ҷинпин аз ҳукуматдорони Ҳонконг

Фоҷиа. 90 дарсади Венетсия зери об монд

Дар Франсия таҷдиди Нотр - Дам боиси ҷанҷол шуд

Дар Ӯзбекистон лоиҳаи маърифатии «Як миллион барномасоз» роҳандозӣ мешавад

Ҷаҳон дар як сатр

14.11.2019


Мулоқоти Ҷамолиддин Нуралиев бо намояндагони «Moody’s Investors Service»

Оид ба имконоти рушди кӯдакон форуми байналмилалӣ доир мешавад

Тақвияти робитаҳои иқтисодию тиҷоратӣ бо музофоти Ҳубэй

Таэквондо. 22 медали варзишгарони тоҷик аз Бухоро

"Тулӯи ҳақиқат" дар Рӯзи Президент

Шумораи сайёҳон дар Россия беш аз 20 дарсад афзудааст

Ашқобод мизбони нишасти зиддитеррористии ниҳодҳои дипломатии кишварҳои ҳамсуд

Сарвазири Ҳиндустон вохӯрияш бо Путинро олиҷаноб номид

Сесад ҷангии «Давлати исломӣ» дар Афғонистон таслим шуд

Коломойский ба Украина рӯ ҷониби Россия оварданро пешниҳод намуд

Ҷаҳон дар як сатр

13.11.2019


Дар Осетия пайкараи Абулқосим Фирдавсӣ гузошта шуд


Дар сомонаҳои дигари Тоҷикистон хонед