logo

ҳуқуқ

ПЕШГИРӢ АЗ ГАРОИШ БА ГУРӮҲҲОИ ИФРОТӢ ҲАНӮЗ ҚОНЕЪКУНАНДА НЕСТ

Фаъолони ҷомеаи шаҳрвандӣ, олимону коршиносони масоили сиёсӣ дар нишасте таҳти унвони «Самтҳои асосии фаъолияти ҷомеаи шаҳрвандӣ дар заминаи пешгирии тундгароии динӣ» раванди ифротгароӣ дар ҷомеаро мавриди баррасӣ қарор доданд.
 
Ин ҳамоиш дар Маркази тадқиқоти стратегии назди Президенти Ҷумҳурии Тоҷикистон доир гардида, мизони ҷалби шаҳрвандони Тоҷикистон, бахусус ҷавонон ба ҳизбу ҳаракатҳои террористиву ифротгароӣ ҳамоно ташвишовар арзёбӣ шуд.
Худобердӣ Холиқназар, директори Маркази тадқиқоти стратегӣ, гуфт, ки бо вуҷуди роҳандозии тадбирҳои судаманд дар ин самт, ҳанӯз ҳам вазъият ташвишовар боқӣ мемонад. Номбурда изҳор дошт, ки «Дар кул вазъият назар ба соли 2015 беҳтар шудааст, аммо то кунун мо натавонистем, ки камари ифротгароиро шиканем».
Бо таассуф иттилоъ дода шуд, ки шумори шаҳрвандони Тоҷикистон дар сафи гурӯҳҳои террористӣ, аз ҷумла «Давлати исломӣ» аз марзи 1100 нафар гузаштааст. Зикр гардид, ки бар пояи маълумоти расмӣ дар ҳоли ҳозир 394 сокини вилояти Суғд дар ҷангҳои Сурияву Ироқ иштирок доранд, ки аз ин шумора 24 нафар бо ҳамсар ва фарзандони ноболиғанд. Илова бар ин, дар нимсолаи аввали соли 2016 аз ҷониби мақомоти ҳифзи ҳуқуқ 130 нафар бо шумули роҳбарону аъзои ҳизбу ҳаракатҳои динию экстремистӣ дастгир ва ба ҷавобгарии ҷиноятӣ кашида шудаанд. Инчунин, нисбат ба 16 имомхатиб ва дигар ходимони масоҷиди вилояти Суғд низ парвандаи ҷиноятӣ боз шудааст. Дар давоми ҳашт моҳу бист рӯзи соли ҷорӣ танҳо дар шаҳру деҳоти Исфара нисбат ба 74 нафар бо иттиҳоми иштирок дар иттиҳодияҳои ҷиноятии хусусияти террористиву экстремистидошта, ки мақсадашон бо роҳи зӯроварӣ тағйир додани сохти конститутсионии давлатҳои Осиёи Марказӣ ва дар заминаи он барпо намудани давлати исломии хилофат, инчунин барои ҷалб намудан дар муҳорибаҳои мусаллаҳона ё амалиёти ҷангӣ дар ҳудуди давлатҳои Ироқ ва Сурия 43 парвандаи ҷиноятӣ оғоз ва мавриди тафтиш қарор гирифтааст. Бино ба маълумоти дастрас, аз вилояти Хатлон низ то кунун 210 нафар ба сафи гурӯҳи тундгарои «Давлати исломӣ» пайвастаанд. Аммо, Зикруллоҳ Саидзода, муовини сардори Академияи Вазорати корҳои дохилии Ҷумҳурии Тоҷикистон, зимни баҳси мавзӯъ изҳор дошт, ки бо вуҷуди ҷой доштани камбудиҳо дар самти ҷилавгирӣ аз шомилшавии шаҳрвандон ба гурӯҳҳои террористӣ, ин раванд то андозае коҳиш ёфтааст.
Дар бисёр маврид, зимни таҳлили омилҳои пайвастани шаҳрвандон ба гурӯҳҳои террористӣ коршиносон ба сатҳи фақр, муҳоҷирати меҳнатӣ ва заъфи маърифати динӣ ишорат мекунанд ва мегӯянд, ки маҳз бекориву нодорӣ нафарони ноогоҳро туъмаи гурӯҳҳои ифротӣ месозад. Вале полковники милитсия Зикруллоҳ Саидзода мегӯяд, ки «Мо далелҳое рӯи даст дорем, ки шахсони дорову мансабдор низ фирефтаи дасисаи ин гурӯҳҳо шудаанд».
Дар ҳамин ҳол, Нуралӣ Саидов, котиби ҳамоҳангсози Шӯрои ҷамъиятии Тоҷикистон, омилҳои аслии гароиш ба ҳизбу ҳаракатҳои тундгароии диниро дар сатҳи ҳанӯз ҳам нокифояи корҳои фаҳмондадиҳӣ медонад. Ба қавли ӯ, то кунун бархе аз шаҳрвандон ба мафҳуми ифротгароиву радикализм сарфаҳм намераванд. «Ҳатто дар байни мутахассисон ҳам оид ба ин мафҳумҳо андешаи воҳид нест ва ақидаҳо гуногунанд». Омили дигар, аз нигоҳи Нуралӣ Саидов муҳоҷирати корӣ аст, ки гуфта мешавад, дар айни ҳол хусусияти дигар касб карда, шумораи занони муҳоҷир ва наврасон зиёд шудааст.
Файзулло Баротзода, директори Маркази исломшиносӣ дар назди Президенти Ҷумҳурии Тоҷикистон, ба ин назар аст, ки масъалаи ифротгароӣ ва тундгароии динӣ дар муҳити пасошӯравӣ ва қаламрави густариши дини ислом вижагиҳои фарқкунандаи худро дорад ва давраи таҳрик ёфтани он бо суқути Иттиҳоди Шӯравӣ тавъам аст. - Ин раванд бо болоравии андешарониҳои динӣ оғоз гардида, тадриҷан ба сиёсишавӣ ва таъсис ёфтани ҳаракату ҳизбҳо ва гурӯҳҳои исломии тундгаро оварда расонд. Иллати ин ҳолат на танҳо ба фурӯпошии пояҳои идоеологии як давлати абарқудрат, балки ба барҳам хӯрдани сиёсати дуқутбаи ҷаҳонӣ ва пайдо шудани бозингарони нави саҳнаи геополитикии ҷаҳон вобаста буд. Гузашти айём нишон дод, ки дар ҳоли ҳозир пайравони дини ислом мавқеъгирӣ ва ҳассосияти бештар зоҳир менамоянд. Аз ин рӯ, ҳангоми баҳогузории ҳама гуна рӯйдодҳои нохуш дар атрофу акнофи олам нахуст зарфияти унсури исломиро дар он ҷустуҷӯ мекунанд, - мегӯяд Файзулло Баротзода.
Баҳси коршиносони тоҷик сари ин масъала дар ҳолест, ки хатари терроризму экстремизм ва мубориза алайҳи он дар маҳофили байналмилалӣ низ аз мавзӯъҳои пурбаҳс аст. Дар ин робита, беш аз дигар ҳаракатҳои ифротӣ, амалҳои даҳшатафкании гурӯҳи террористии ба ном «Давлати исломӣ»  боиси нигаронии аҳли башар гардидааст. Амалҳои тахрибкоронаи ин гурӯҳи хатарзо дар мисоли қатли ваҳшиёнаи мардуми осоишта дар хоки Ироқу Сурия, ҳаводиси хунини Париж ва суқути ҳавопаймои мусофирбари A 321-и Русия дар нимҷазираи Синайи Миср, ки соли 2015 анҷом шуданд, чеҳраи аслии терроризмро бори дигар нишон дода, ҷомеаи ҷаҳонро дар мубориза бо ин вабои аср таҳрик бахшиданд.
Ҳоло муборизаи шадид алайҳи терроризму ифротгароӣ дар мисоли «Давлати исломӣ», ки пойгоҳои асосии ҷангиёнаш дар хоки Ироқу Сурия аст, идома дорад. Вале  таҳлилгарон мегӯянд, ки қудратҳои ҷаҳони муосир дар мубориза бо терроризм дунболи манофеи геополитикии худ ҳастанд ва агар манфиати онҳо дар муқовимат алайҳи хатарбортарин гурӯҳи ифротӣ - «Давлати исломӣ» аз ҳам тафовут намедошт, кайҳо он аз байн мерафт.
Фирӯзи РАҲМОНИЁН, «Ҷумҳурият»


Баёни ақида (0)    Санаи нашр: 03.11.2016    №: 219    Мутолиа карданд: 2275
10.08.2020


КОРОНАВИРУС. ШУМОРАИ ШИФОЁФТАГОН БА 6 ҲАЗОРУ 573 КАС РАСИД

ЁРИИ НАВБАТИИ ПЕШВОИ МИЛЛАТ БА СОКИНОНИ ЭҲТИЁҶМАНДИ БАДАХШОН

САФАРИ МУОВИНИ САРВАЗИРИ МАМЛАКАТ ШИРИН ИСМАТУЛЛОЗОДА БА ШАҲРУ НОҲИЯҲОИ ҶУМҲУРӢ

«СУҒД ТЕКСТАЙЛЗ» ФАЪОЛИЯТАШРО ТАВСЕА МЕБАХШАД

ЛИГАИ ОЛӢ. "ИСТИҚЛОЛ", "ХУҶАНД" ВА "ХАТЛОН" ДАВРИ ДУЮМРО БО ПИРӮЗӢ ОҒОЗ КАРДАНД

БАДАХШОН. АВЛАВИЯТ БА ТАВСЕАИ МАЙДОНИ КИШТ

АГЕНТИИ НАШЪАОВАР. МУСОДИРАИ БЕШ АЗ 1 ТОННА МАВОДИ НАШЪАОВАР ВА МАҲВИ 26 ГУРӮҲИ ҶИНОЯТӢ

07.08.2020


ТОҶИКИСТОН. 6 ҲАЗОРУ 443 БЕМОРИ COVID-19 ШИФО ЁФТ

ВМКБ. ШИНОСОИИ АЗИМ ИБРОҲИМ БО ҶАРАЁНИ КОР ДАР ИНШООТИ ҶАШНӢ

КМИР. НАҚШАИ ТАҚВИМИИ ЧОРАБИНИҲОИ ИНТИХОБОТИ ПРЕЗИДЕНТИ ҶУМҲУРИИ ТОҶИКИСТОНРО ТАСДИҚ КАРД

ЛИГАИ БОНУВОН. «ХАТЛОН» ҒОЛИБИ МАРҲИЛАИ АВВАЛ

ҶАҲОН ДАР ЯК САТР

06.08.2020


ТОҶИКИСТОН. 6 ҲАЗОРУ 399 ГИРИФТОРИ БЕМОРИИ COVID-19 ШИФО ЁФТ

СУҒД. МАҲСУЛОТИ АРЗОН ЗИНДАГИРО БАРАКАТ МЕБАХШАД

АГЕНТӢ. ШУМОРАИ ХИЗМАТЧИЁНИ ДАВЛАТӢ АЗ ҲИСОБИ ЗАНОН КОҲИШ ЁФТААСТ. ЧАРО?

СЕРИЯ ПРО. МУБОРИЗАИ "СОРО - КОМПАНИЯ" ВА "СИПАР" ШИДДАТ МЕГИРАД

05.08.2020


ТОҶИКИСТОН. 6 ҲАЗОРУ 356 ГИРИФТОРИ БЕМОРИИ COVID – 19 ШИФО ЁФТ

АЗ «АМОНАТБОНК» СИПОСГУЗОРЕМ

ЛИГАИ ОЛӢ. МАРҲИЛАИ ДУЮМ 8 АВГУСТ ОҒОЗ МЕЁБАД

04.08.2020


ТОҶИКИСТОН. 6 ҲАЗОРУ 317 БЕМОРИ COVID – 19 ШИФО ЁФТ

ОМОДАГИҲО ҶИҲАТИ БАРӮЙХАТГИРИИ АҲОЛӢ ВА ФОНДИ МАНЗИЛ ИДОМА ДОРАНД

АГЕНТИИ СОДИРОТ. СОДИРОТИ МАҲСУЛОТИ КИШОВАРЗӢ АФЗУД

83 КОРХОНАИ НАВИ САНОАТӢ МАВРИДИ БАҲРАБАРДОРӢ ҚАРОР ГИРИФТ

ВКД. САТҲИ ҶИНОЯТ КОҲИШ ЁФТ

SARS – CoV – 2. ТАДҚИҚОТИ ОЛИМОН ХАТАРИ НАВИ ОНРО ОШКОР СОХТ

ФАЙЗРЕЗ Ё СЕСАД ХАРБУЗА АЗ ЯК КАФ ЗАМИН

ҶОМИ ТОҶИКИСТОН – 2020. ҶУФТҲОИ ДАВРИ 1/4 - ФИНАЛӢ МУАЙЯН ГАРДИДАНД

03.08.2020


ТОҶИКИСТОН. АЗ КОРОНАВИРУС 83,7 ДАРСАДИ СИРОЯТЁФТАГОН СИҲАТ ШУДАНД

АКАДЕМИЯИ ИДОРАКУНИИ ДАВЛАТӢ ДОНИШҶӮЁНИ ХОРИҶИРО БА ТАҲСИЛ ҶАЛБ КАРДАНИСТ

ҲИСОР. БУНЁДИ ИНШООТИ ҶАШНӢ ИДОМА ДОРАД

ГУМРУК. СОДИРОТИ МОЛУ МАҲСУЛОТИ ВАТАНӢ 19,1 ДАРСАД АФЗУД

КУМИТАИ АНДОЗ. ПАНДЕМИЯ БА ИҶРОИ НАҚША БЕТАЪСИР НАМОНД

ТОҶИКИСТОН. 6 ҲАЗОРУ 103 БЕМОРИ COVID - 19 СИҲАТ ШУД

СУҒД. РӮНАМОИИ КИТОБНОМАИ ҲАШТҶИЛДАИ “ПЕШВОИ МИЛЛАТ - ЭМОМАЛӢ РАҲМОН”

САРҲАД. ДАР НОҲИЯИ МИР САЙИД АЛИИ ҲАМАДОНӢ 127 ҶИНОЯТ БА ҚАЙД ГИРИФТА ШУД


Дар сомонаҳои дигари Тоҷикистон хонед