logo

суханрониҳо

Суханронии Эмомалӣ Раҳмон, Президенти Ҷумҳурии Тоҷикистон, ба муносибати ифтитоҳи мактаби таҳсилоти миёнаи умумӣ дар маҳаллаи Темурмалики шаҳри Хуҷанд, 17 ноябри соли 2017

Омӯзгорони муҳтарам ва падару модарони арҷманд!
Фарзандони азиз!
Дар арафаи таҷлили яке аз санаҳои муҳими таърихи навини кишварамон, яъне биступанҷсолагии Иҷлосияи ХVI Шӯрои Олии Ҷумҳурии Тоҷикистон ба истифода супурда шудани мактаби навбунёди замонавӣ барои фарзандони сокинони шаҳри Хуҷанд нишонаи таваҷҷуҳи доимии Ҳукумати мамлакат ба рушди маориф, ба камол расондани насли ояндасоз ва туҳфаи арзандаи идона ба кӯдакону наврасони даврони истиқлолият мебошад.
Ба ин муносибат ҳамаи кормандони соҳаи маорифи шаҳри Хуҷанд ва шумо - устодону омӯзгорони гиромӣ, фарзандони азиз ва ҳозирони арҷмандро табрик мегӯям.
Бо дарназардошти он, ки фардои миллати мо дар дасти ҷавонону наврасон аст, дар солҳои соҳибистиқлолии мамлакат соҳаи маориф ҳамчун самти афзалиятноки сиёсати давлату Ҳукумат ва ҳадафи аввалиндараҷаи соҳаи маорифи кишвар тарбияи шахсияти фаъолу созанда эълон шудааст.
Аз ин рӯ, илова ба омӯзиши илму донишҳои замонавӣ масъалаҳои дар зеҳну шуури хонандагон, яъне наврасону ҷавонон тарбия кардани эҳсоси худогоҳии миллӣ, худшиносии таърихӣ, истифодаи анъанаҳои пешқадами маорифи милливу умумибашарӣ ва арзишҳои фарҳангиву ахлоқӣ таҳти таваҷҷуҳи доимии давлат қарор доранд.
Мақсади мо аз вусъат додани раванди амалисозии ислоҳот дар соҳаи маориф, бо истифодаи ҳамаи захираву имкониятҳо бунёд кардани таълимгоҳҳои ҷавобгӯй ба талаботи замон ва муҳайё намудани шароити хуби таълим дар он аст, ки наслҳои ояндасози Ватани маҳбубамон соҳибмаърифат гарданд, аз дастовардҳои илму техника ва технологияҳои муосир баҳравар шаванд ва дар оянда ҳамчун фарзандони номбардори халқи бошарафу фарҳангсози тоҷик ба камол расида, дар пешрафти давлати соҳибистиқлоламон ва ободии сарзамини муқаддасамон саҳми арзандаи худро гузошта тавонанд.
Бояд гуфт, ки нақшаи сохтмони мактаби имрӯза ҳанӯз дар соли 1986 тасдиқ гардида, сохтмони он аввали солҳои 90-уми асри гузашта оғоз шуда буд. Вале баъдан бо сабабҳои маълум сохтмони мактаб қатъ гардид. Танҳо ба шарофати соҳибистиқлолӣ бунёди мактаб аз нав ба роҳ монда шуд ва чунонки мебинем, бо заҳмати бунёдкорону мутахассисони тоҷик имрӯз боз як мактаби зебои замонавӣ дарҳои худро барои хонандагони шаҳри Хуҷанд дар остонаи Ҷашни 25 - солагии Иҷлосияи 16 - уми Шӯрои Олии Ҷумҳурии Тоҷикистон боз намуд. Дар мактаби нав 1300 нафар хонанда дар як баст ба таълиму тарбия фаро гирифта мешавад ва 72 нафар омӯзгори баландихтисос бо ҷойи кори доимӣ таъмин мегардад.
Дар шароити кунунӣ баланд бардоштани сатҳу сифати таълим дар ҳамаи зинаҳои таҳсилот аз кормандони соҳаи маориф азму талоши доимӣ ва заҳмати пайвастаро талаб менамояд. Хусусан, ба сатҳи азхудкунии фанҳои дақиқ бештар таваҷҷуҳ зоҳир намудан, эътибори аввалиндараҷа додан ба омӯзиши забони давлатӣ, забонҳои хориҷӣ ва технологияҳои иттилоотиву коммуникатсионӣ, касбомӯзии шогирдон ва дар рӯҳияи донишомӯзиву заҳматдӯстӣ тарбия кардани онҳо вазифаи касбиву виҷдонии устодону омӯзгорон ба шумор меравад.
Барои татбиқи амалии ин ҳадафҳо зарур аст, ки ҳамаи роҳбарону масъулон, падару модарон, инчунин, соҳибкорону тоҷирон ва дигар шахсони саховатманд нисбат ба соҳаи маориф ғамхор бошанд, ба масъалаи тарбияи фарзандон, соҳиби донишу маърифат ва одобу ахлоқи ҳамида гардидани онҳо ҷиддӣ муносибат кунанд, дар амри фароҳам овардани шароити боз ҳам беҳтари таълим, таъмин намудани муассисаҳои таълимӣ бо технологияҳои пешқадами ҳозиразамон ва лавозимоту ашёи хониш саҳм гузоранд.
Боиси қаноатмандист, ки дар вилояти Суғд дар баробари бахшҳои дигар, инчунин, соҳаи маориф низ пайваста рушд карда, аз ҷониби мақомоти иҷроияи ҳокимияти давлатии вилоят ба ин масъала таваҷҷуҳи хосса зоҳир карда мешавад.
Дар вилоят ба хотири ҳавасмандгардонии устодони навовар ва толибилмони болаёқат, ки дар олимпиадаҳои байналмилалӣ соҳиби ҷойҳои ифтихорӣ мегарданд, ҷоизаҳои махсус таъсис дода шудаанд, ки чунин иқдом, бешубҳа, боиси дилгармӣ ба кори таълиму тарбия мегардад.
Соли равон муассисаҳои таҳсилоти миёнаи умумии вилоятро 35 ҳазор нафар хонанда хатм намуда, қариб 20 ҳазор нафари онҳо барои дохил шудан ба муассисаҳои таҳсилоти олӣ ва миёнаи касбӣ ҳуҷҷат супурдаанд, ки нисбат ба соли хониши гузашта хеле зиёд мебошад.  Аз ин шумора беш аз 16 ҳазор нафар довталаб сазовори номи донишҷӯй гардидааст, ки ин рақам низ дар муқоиса бо натиҷаҳои соли гузашта зиёд буда, дар миқёси мамлакат нишондиҳандаи хуб ба шумор меравад.
Асоси ҳамаи ин дастовардҳо, албатта, заҳмати софдилонаи омӯзгорони эҷодкору навовар, аз ҷумла, фаъолияти хастанопазири ҳар яки шумо - устодони соҳибфазилат мебошад.
Мактаби нави имрӯза ва умуман, ҳамаи амалҳои созандагие, ки мо то имрӯз анҷом додаем, меваҳои шаҳдбори Истиқлолияти давлатӣ мебошанд. Зеро мо соҳиби истиқлолу озодӣ намебудем, дар кишварамон сулҳу оромӣ поянда намешуд, ватанамон рӯ ба ободӣ намеовард, зиндагии осуда насибамон намегардид ва чунин иншооту биноҳои назаррабо қомат намеафрохтанд.
Бо истифода аз фурсат, ба ҳамаи мутахассисону сохтмончиёне, ки дар ин кори хайр, яъне бунёди ин боргоҳи илму дониш ва махзани маърифат саҳм гузоштаанд, миннатдорӣ баён менамоям. Ҳамчунин, пешниҳод мекунам, ки ба муассисаи таълимии имрӯза мақоми Мактаби президентӣ барои хонандагони болаёқат дода шавад.
Дар баробари ин, ба роҳбарони вилоят ва шаҳри Хуҷанд супориш дода мешавад, ки барои дар солҳои 2018 - 2019 ба истифода додани ду бинои истиқоматии нуҳошёна барои омӯзгорон ва ду бинои хобгоҳи чорошёна барои хонандагоне, ки аз дигар шаҳру навоҳии вилоят ба ин мактаб ҷалб мешаванд, ҳамзамон бо ин, ҷиҳати дар ҳудуди мактаб бунёд намудани ҳавзҳои шиноварӣ барои кӯдакону наврасон тадбирҳои зарурӣ андешанд.
Мақомоти иҷроияи ҳокимияти давлатии вилояти Суғд ва шаҳри Хуҷанд, ҳамчунин, вазифадор карда мешаванд, ки то охири соли оянда бо мақсади пурра фаро гирифтани кӯдакону наврасони маҳаллаи Темурмалики шаҳр як мактаби таҳсилоти миёнаи умумӣ бо 1300 ҷойи нишаст дар ду баст сохта, ба истифода супоранд.
Вазифаи шумо, фарзандони азиз, аз он иборат аст, ки дар фазои орому осудаи Ватани азизамон аз имкониятҳои фароҳамсохтаи давлату Ҳукумат ҳарчи пурраву самаранок истифода баред, барои иҷрои масъулият ва қарзи фарзандии худ, яъне аз худ намудани илму донишҳои муосир азму талош варзед, касбу ҳунар омӯзед ва оянда дар ободии Тоҷикистони маҳбубамон ҳиссаи арзандаи худро гузоред.
Шумо бояд бо масъулияти баланди фарзандӣ, донишу ҷаҳонбинии муосир, одобу ахлоқи ҳамида, эҳтироми волидайну калонсолон, устодону омӯзгорон ва арҷгузорӣ ба арзишу муқаддасоти Ватан намунаи ибрати ҳамсолони худ бошед.
Дар иҷрои ин амалҳои хайр, ки фардои ободи ҷомеа аз он вобаста мебошад, давлату Ҳукумат ба шумо, устодону омӯзгорони арҷманд эътимоди комил доранд, зеро дар тарбияи насли худогоҳу худшинос, дар навбати аввал, мактабу муаллим нақши муҳим доранд ва чунонки борҳо таъкид карда будам, шумо воқеан ганҷинаи маънавии халқамон маҳсуб меёбед.
Итминони комил дорам, ки бо неруи созанда ва эҷодгари шумо – омӯзгорону устодони муҳтарам мо ворисони содиқеро тарбия хоҳем кард, ки сазовори номи неки давлату миллати тоҷик мегарданд ва дар ободиву шукуфоии Тоҷикистони азизамон саҳми шоиста мегузоранд.
Бовар дорам, ки минбаъд низ ҳар як фарди бонангу номус ва фарзандони худогоҳу худшиноси Ватан дар роҳи таҳкими истиқлолият, ваҳдати миллӣ ва пешрафти Тоҷикистони азиз беш аз пеш талош варзида, ҷиҳати бартараф намудани ҳама гуна мушкилот ва дар ин замина, фароҳам овардани зиндагии шоиста барои мардуми шарафмандамон саҳми арзандаи хешро мегузорад.
Бори дигар ҳамаи шумо - устодону шогирдони муассисаи таълимии навбунёд, ҳозирони арҷманд ва кулли сокинони ватандӯст ва бонангу номуси шаҳри бостонии Хуҷандро бо Ҷашни мубораки 25 - солагии Иҷлосияи 16-уми Шӯрои Олии Ҷумҳурии Тоҷикистон ва ифтитоҳи боз як даргоҳи илму маърифат табрик гуфта, бароятон саодати рӯзгор, хонаи обод ва ба насли ояндасозамон саломативу хушбахтӣ ва камолоти маънавӣ орзу менамоям.
Ҳамеша шоду сарбаланд бошед!


Баёни ақида (0)    Санаи нашр: 20.11.2017    №: 236-237    Мутолиа карданд: 860

24.05.2018


Симои сиёсӣ ва фарҳангии Пешвои миллат

Мулоқоти Шукурҷон Зуҳуров бо Алекен Еминбахэ

Вохӯрии ҳайати вазоратҳои корҳои дохилии Тоҷикистону Ӯзбекистон

Рӯнамоии иқтидори сайёҳии кишвар дар Боку

ҶАЙҲУН. ПИЁЗ ЗИЁДУ ХАРИДОР КАМ

Ҷаҳон дар як сатр

СҲШ: таваҷҷуҳи вижа ба таъмини амнияти лоиҳаҳои байналмилалии стратегӣ

Ширкати 15 ҳазор меҳмон дар ҳамоиши иқтисодии Петербург

Макрон бо умеде ба Санкт-Петербург меояд, ки «Русияро ба Аврупо орад»

Дар Ҳилманд 15 нафарро аз асорати «Толибон» озод карданд

Қазоқистон гандуми бисёрсола парвариш кардан мехоҳад

23.05.2018


Ҷаласаи Шӯрои сарони ҳукуматҳои ИДМ баргузор мегардад

Вохӯрии Абдураҳим Қаҳҳоров бо Чжао Кэчжи

Тоҷикистон дар ҳифзи нигаҳдории гуногунии биологӣ саҳми назаррас дорад

Ҷаҳон дар як сатр

Рашид Олимов: «Масоили амниятӣ таваҷҷуҳи бештар мехоҳад»

Дар Олмон ба хотимабахшии «давраи яхбандӣ» дар муносибат бо Русия даъват намуданд

Аморат низоми раводидро барои сармоягузорону мутахассисони баландпоя сабук кард

Қазоқистон: имтиёзҳои қарзи манзил барои омӯзгорон ва табибон

Қирғизистон барои иштирок дар лоиҳаи «Digital CASA» беш аз 3 миллиард рубл мегирад

21.05.2018


Ҷаҳон дар як сатр

Пекин ҷонибдори бунёди тамаддуни экологист

Маҳви 65 ҳазор ҷангӣ дар Сурия

Вашингтон барои мубориза алайҳи терроризм қариб $3 триллион харҷ кардааст

Иттиҳоди Аврупо ба ИМА роҳи пешгирии боҷро нишон дод

Мансабдорони Қазоқистон аз ҳаққи узвият дар созмонҳои динӣ маҳрум мешаванд

18.05.2018


Ҷаласа таҳти роҳбарии муовини Сарвазири мамлакат

Брифинги матбуотӣ оид ба натиҷаҳои Конфронси байналмилалии Душанбе

Ифтитоҳи Маркази таҳсилот, илм ва фарҳанги Беларус

17.05.2018


Баррасии масоили соҳибкорӣ

Вохӯрии Исматулло Насредин бо Эндрю Гилмор

Чорабиниҳо бахшида ба Рӯзи ҷавонон

Туризм аз бахшҳои асосии иқтисоди миллӣ

ОРОИШГАРИ ШАҲРИ КӮЛОБ


Дар сомонаҳои дигари Тоҷикистон хонед