logo

туризм

2018 - СОЛИ РУШДИ САЙЁҲӢ ВА ҲУНАРҲОИ МАРДУМӢ

Президенти мамлакат муҳтарам Эмомалӣ Раҳмон дар Паём ба Маҷлиси Олӣ (22 декабри соли 2017)   соли 2018 - ро - Соли рушди сайёҳӣ ва ҳунарҳои мардумӣ эълон намуданд. Ин нукта дар назди кормандони соҳа вазифаю масъулиятҳои калон гузошта, барои рушди сайёҳӣ андешидани тадбирҳои саривақтиву босамарро тақозо дорад. Нуъмон Абдуғаффорзода, раиси Кумитаи рушди сайёҳии назди Ҳукумати Ҷумҳурии Тоҷикистон, дар  суҳбат бо хабарнигори рӯзнома дастоварду камбудиҳои бахши сайёҳии кишварро матраҳ намуда, нақшаю вазифаҳо ва масъулияти азими кормандони соҳаро чунин шарҳ дод:
- Кормандони соҳаи сайёҳии мамлакат аз ҷониби Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон эълон шудани соли 2018 - ро ҳамчун Соли рушди сайёҳӣ ва ҳунарҳои мардумӣ бо дилгармӣ, хушнудӣ ва ҳамовозии том истиқбол намуданд.
Маҳз дар натиҷаи талошҳои созанда ва пайгиронаи Президенти мамлакат сайёҳӣ ҳамчун бахши муҳиму ояндадори иқтисоди миллӣ аҳамияти тоза касб намуда, таваҷҷуҳи ҷомеаи ҷаҳонӣ ба захираҳои сайёҳии мамлакат пайваста зиёд мегардад, Тоҷикистон ҳамчун мамлакати осоишта ва дорои захираҳои бузурги сайёҳӣ ба ҷаҳониён муаррифӣ мешавад.
Айни ҳол аз ҷониби кумита дар партави нуктаҳои Паёми Пешвои миллат бо назардошти фикру андешаҳои кормандони ширкатҳои сайёҳӣ ва коршиносони соҳа бо фарогирии сатҳи милливу байналмилалӣ, такмилу устувор намудани заминаҳои меъёрии ҳуқуқии соҳа, рушди инфрасохтор, баланд бардоштани сатҳи хизматрасонӣ, омодасозии кадрҳо ва мукаммал намудани омори бахши сайёҳӣ Нақшаи чорабиниҳои мукаммал таҳия шуда истодааст.
 Қобили зикр аст, ки масъалаи эҳё ва рушди ҳунарҳои мардумӣ мавриди таваҷҷуҳи доимии Президенти мамлакат муҳтарам Эмомалӣ Раҳмон қарор дошта, дар ин самт мунтазам тадбирҳои муҳим андешида мешаванд. Аз андозҳо озод намудани истеҳсоли маҳсулоти хонагии ҳунармандӣ ва фурӯши онҳо тадбири навбатии ниҳоят муҳим буда, имкон медиҳад, ки ҷойҳои нави корӣ таъсис ёфта, ҳунарҳои мардумӣ эҳё гарданд.
Маҳсулоти ҳунарҳои дастӣ асосан ба меҳмонон, бахусус сайёҳони хориҷӣ, нигаронда шудааст. Бинобар ин, бо роҳандозии имтиёзи мазкур арзиши аслии маҳсулоти ҳунарҳои дастӣ паст шуда, қобилияти рақобатпазирии онҳо устувор мегардад.
Кумита тасмим гирифтааст, ки дар ҳамкорӣ бо мақомоти иҷроияи маҳаллии ҳокимияти давлатӣ ва бахши хусусӣ дар шаҳру ноҳияҳои ҷумҳурӣ гузарҳо ё фурӯшгоҳҳои доимоамалкунандаи ҳунармандон, гузарҳои таомҳои миллӣ ва дигар армуғонҳоро барои сайёҳон ифтитоҳ намояд.
Дастгирии навбатии Пешвои миллат ҷиҳати то 10 рӯз тамдид намудани муҳлати бақайдгирӣ дар мақомоти корҳои дохилӣ иқдоми саривақтӣ буда, барои осон намудани фаъолияти ширкатҳои сайёҳӣ, ҷалби бештари сайёҳон ва будубоши бемамониати сайёҳону меҳмонони хориҷӣ дар ҷумҳурӣ мусоидат хоҳад кард.
Иқдоми мазкурро ширкатҳои сайёҳӣ бо хушнудӣ пазируфтанд ва дар самти ҷалби сайёҳони хориҷӣ нақшаи фаъолияти худро омода сохта истодаанд.   
 Боиси қайд аст, ки бо дастгирии бевоситаи Сарвари давлат дар мамлакат иншооти муосири сайёҳӣ, ба монанди Маҷмааи лижаронию сайёҳии “Сафед-Дара”, истироҳатгоҳҳои “Пули сангин”, “Баҳористон”, маҷмааи “СПА Ҳаёт”, меҳмонхонаҳои панҷситорадори бренди ҷаҳонӣ бунёд гардида, як қатор инфрасохтори соҳа таҷдид шуданд.
Имтиёзҳои андозию гумрукие, ки Пешвои миллат дар Паёми худ аз 22 декабри соли 2016 пешниҳод намуда буданд, таваҷҷуҳ ва ҳавасмандии соҳибкоронро барои фаъолият дар бахши сайёҳӣ ва рушди инфрасохтори соҳа зиёд гардонданд. Кумита тасмим гирифтааст, ки дар ин самт якҷо бо ширкатҳои сайёҳӣ бунёди меҳмонхонаҳо, иншооти сарироҳӣ, осоишгоҳҳо, комплексҳо, маркази хизматрасонии нақлиётӣ дар соҳаи сайёҳӣ ва дигар тадбирҳоро роҳандозӣ намояд. Аз ҷумла, бо мақсади беҳсозии хизматрасонии нақлиёт ба меҳмонони дохилию хориҷӣ, тибқи қарори ҷаласаи якуми Шӯрои байниидоравӣ оид ба ҳамоҳангсозӣ дар соҳаи сайёҳӣ (19 августи соли 2017) дар бинои Фурудгоҳи байналмилалии Душанбе нуқтаи хизматрасонии таксии “Эйшн Экспресс” ба фаъолият шурӯъ намуда, чунин нуқта аз ҷониби “Рахш такси” низ вақтҳои наздик ташкил мешавад.
Яке аз дастовардҳои асосии соҳа ин таъсиси мақоми алоҳида дар бахши сайёҳӣ мебошад. Ғайр аз ин, бо мақсади баромадан ба бозорҳои ҷаҳонии сайёҳӣ ва ҷалби бештари сайёҳон, бори нахуст ширкатҳои сайёҳии ватанӣ дар намоишгоҳҳои байналмилалии сайёҳии Ҷопон, Фаронса, Олмон, Федератсияи ҷаҳонии шаҳрҳои туристӣ (шаҳри Лос - Анҷелеси ИМА) ва дигар чорабиниҳои байналмилалии муҳим иштироки фаъол доштанд.
Аз ҷониби кумита портали миллии сайёҳии Тоҷикистон ба забонҳои тоҷикӣ, русӣ ва англисӣ омода шуд. Минбаъд он ба забонҳои олмонӣ, фаронсавӣ, испанӣ, арабӣ ва чинӣ низ тарҷума мешавад. Портал ба Созмони ҷаҳонии сайёҳӣ пешниҳод шуда, тавассути он ба 158 давлати узви пайваста ва 509 ассотсиатсияву Созмони байналмилалии узви вобастаи он муаррифӣ гашт ва ба ин васила бори нахуст соҳаи сайёҳии кишвар ба бозори ҷаҳонии сайёҳӣ ворид шуд.
Яке аз масъалаҳои ҷалби бештари сайёҳони хориҷӣ ин муаррифии имконоти сайёҳии минтақаҳои гуногуни ҷумҳурӣ ба ширкатҳои сайёҳӣ ба ҳисоб меравад. Зеро ширкатҳои сайёҳӣ аз иқтидори сайёҳии мамлакат ба таври кофӣ огоҳ нестанд. Бо мақсади муаррифӣ ва таҳияи хатсайрҳои нави сайёҳӣ кормандони кумита ва ширкатҳои сайёҳии шаҳру  ноҳияҳои Ҳисор, Турсунзода, Норак, Шаҳринав, Файзобод, Рашт, Айнӣ, Ховалинг, Балҷувон, мавзеи Сари Хосор, Маҷмааи лижаронию сайёҳии Сафед-Дараи ноҳияи Варзоб, мавзеъҳои Ромиту Канаски шаҳри Ваҳдат боздид намуданд. Дар натиҷа беш аз 20 хатсайри нави сайёҳӣ таҳия гардид.
Қобили тазаккур аст, ки ширкатҳо дар самти сайёҳпазироӣ дар танҳоӣ фаъолият карда наметавонанд. Зарур аст, ки бо меҳмонхонаҳо, ширкатҳои ҳавопаймоӣ, истироҳатгоҳу осоишгоҳҳо, тарабхонаҳо, мағозаҳои фурӯши армуғон, ширкатҳои нақлиётӣ ва дигар ҷонибҳо ҳамкориҳои судманд роҳандозӣ шаванд. Аз ин лиҳоз, муколама ва ҳамкориҳои созандаи давлат бо бахши хусусӣ дар ҳоли густариш қарор дошта, барои фаъолияти ширкатҳо дар самти воридгардии сайёҳон шароитҳои зарурӣ фароҳам оварда шудаанд.
 Муҳимтар аз ин, барномаи рушди сайёҳӣ дар Ҷумҳурии Тоҷикистон барои солҳои 2018 - 2020 таҳия шуда, татбиқи он оғоз меёбад. Дар доираи барномаи мазкур ба ҳалли масъалаҳои такмили санадҳои меъёрии ҳуқуқии амалкунанда, содагардонии расмиёти дастрасии иҷозатнома барои оғози фаъолияти сайёҳӣ, ба роҳ мондани муколама ва шарикии давлату бахши хусусӣ дар соҳаи сайёҳӣ, ҳамкориҳои самарабахш бо ширкатҳои сайёҳӣ, меҳмонхонаҳо, осоишгоҳҳо ва дигар мақомоти ба фаъолияти сайёҳӣ ва сайёҳон алоқаманд, тақвияти фазои сармоягузорӣ дар бахши сайёҳӣ, коркард ва интишори маводи иттилоотӣ, беҳгардонии сифати хизматрасонӣ, сохтмони иншоот, аз ҷумла инфрасохтори сарироҳӣ, инчунин, тарбияи мутахассисони бахши сайёҳӣ ва хизматрасонӣ таваҷҷуҳи хосса зоҳир шудааст.
Тибқи барнома, имсол ба рушди сайёҳии экологӣ, таърихию фарҳангӣ, табобатию рекреатсионӣ ва кӯҳнавардиву шикор диққати асосӣ дода хоҳад шуд.
Кумитаи рушди сайёҳӣ минбаъд низ баҳри иҷрои дастуру ҳидоятҳои Пешвои миллат ҷиҳати муаррифии имкониятҳои сайёҳии ҷумҳурӣ дар дохил ва хориҷи мамлакат, ҷалби бештари сайёҳон, баланд бардоштани ҳиссаи бахши сайёҳӣ дар иқтисоди миллӣ ва сатҳи беҳзистии мардум тамоми неру ва имкониятҳоро сафарбар менамояд.
Шаҳноз ҚУРБОН, «Ҷумҳурият»


Баёни ақида (0)    Санаи нашр: 05.01.2018    №: 4    Мутолиа карданд: 675

23.05.2018


Ҷаласаи Шӯрои сарони ҳукуматҳои ИДМ баргузор мегардад

Вохӯрии Абдураҳим Қаҳҳоров бо Чжао Кэчжи

Тоҷикистон дар ҳифзи нигаҳдории гуногунии биологӣ саҳми назаррас дорад

Ҷаҳон дар як сатр

Рашид Олимов: «Масоили амниятӣ таваҷҷуҳи бештар мехоҳад»

Дар Олмон ба хотимабахшии «давраи яхбандӣ» дар муносибат бо Русия даъват намуданд

Аморат низоми раводидро барои сармоягузорону мутахассисони баландпоя сабук кард

Қазоқистон: имтиёзҳои қарзи манзил барои омӯзгорон ва табибон

Қирғизистон барои иштирок дар лоиҳаи «Digital CASA» беш аз 3 миллиард рубл мегирад

21.05.2018


Ҷаҳон дар як сатр

Пекин ҷонибдори бунёди тамаддуни экологист

Маҳви 65 ҳазор ҷангӣ дар Сурия

Вашингтон барои мубориза алайҳи терроризм қариб $3 триллион харҷ кардааст

Иттиҳоди Аврупо ба ИМА роҳи пешгирии боҷро нишон дод

Мансабдорони Қазоқистон аз ҳаққи узвият дар созмонҳои динӣ маҳрум мешаванд

18.05.2018


Ҷаласа таҳти роҳбарии муовини Сарвазири мамлакат

Брифинги матбуотӣ оид ба натиҷаҳои Конфронси байналмилалии Душанбе

Ифтитоҳи Маркази таҳсилот, илм ва фарҳанги Беларус

17.05.2018


Баррасии масоили соҳибкорӣ

Вохӯрии Исматулло Насредин бо Эндрю Гилмор

Чорабиниҳо бахшида ба Рӯзи ҷавонон

Туризм аз бахшҳои асосии иқтисоди миллӣ

ОРОИШГАРИ ШАҲРИ КӮЛОБ

Армуғон аз Италия

Ҷаҳон дар як сатр

Низомиёни афғон маркази музофоти Фараҳро аз «Толибон» озод карданд

Дар Қоҳира кишварҳои араб масъалаи Байтулмуқаддасро баррасӣ мекунанд

Дар Қазоқистон иттиҳодияҳои динӣ ҳисоботи молиявӣ хоҳанд дод

Қирғизистон: ҳаҷми воридот аз содирот 3,2 маротиба бештар аст

16.05.2018


Рӯзҳои фарҳангии ВМКБ дар Хатлон

В. Путин: «Силоҳи нави мо даҳсолаҳо тавозуни стратегиро дар ҷаҳон таъмин месозад»

Пхенян таҳдиди дасткашӣ аз ҳамоиши ИМА – Кореяи Шимолӣ кард

«Иқтисоди сабз» метавонад 24 миллион ҷойи нави кор фароҳам орад

Дарёфти 7 медал дар Чемпионати Осиё


Дар сомонаҳои дигари Тоҷикистон хонед