logo

иқтисод

КУКТЕППА. БЕБАРҚИИ СОКИНОН АЗ БЕМАСЪУЛИЯТИИ РОҲБАРОН АСТ

Тавре ҳамагон шоҳидем, кишвари мо марҳила ба марҳила ба истиқлолияти энергетикӣ, ки яке аз ҳадафҳои стратегии сиёсати давлату Ҳукумат маҳсуб меёбад, наздиктар шуда истодааст. Аллакай маҳдудияти барқ аз моҳи январи соли 2017 барҳам дода шуд ва сокинони кишвар ба барқи шабонарӯзӣ даст ёфтанд. Аммо кашидани хати барқи як деҳаро масъулони мақомоти иҷроияи маҳаллии ҳокимияти давлатии ноҳияи Варзоб ва ширкати «Барқи тоҷик» «фаромӯш» кардаанд.
Бо вуҷуди ин, миёни номаҳое, ки ба идораи рӯзнома ворид мешаванд, ҳанӯз ҳам ҳастанд муаллифоне, ки аз бебарқӣ изҳори шикоят доранд. Корманди рӯзнома Шаҳбози Аброр яке аз чунин номаҳоро пайгирӣ кард.
«Дар деҳаи Куктеппаи Ҷамоати деҳоти Зидеҳ 22 хоҷагию зиёда аз 50 оилаи мустақил, ҷамъ қариб 300 нафар зиндагӣ мекунад. Дар даврони шӯравӣ деҳаи мо аз қувваи барқи дизелӣ таъмин буд. Аммо аз он солҳо то имрӯз бе қувваи барқ рӯз мебарем. Мардуми деҳа аз тамошои телевизиону шунидани радио, истифодаи алоқаи мобилӣ ва технологияи муосир бебаҳраанд. Инчунин, аз суханрониҳо ва ҳидоятҳои Сарвари давлат, Асосгузори сулҳу ваҳдати миллӣ - Пешвои миллат муҳтарам Эмомалӣ Раҳмон маҳрумем. Ин дар ҳолест, ки мо дар давраи тараққиёти энергетикӣ қарор дорем. Ба ин ҳолат дучор шудани як деҳаи мо магар аз рӯи адолат аст?». Бо чунин мазмун ба рӯзномаи «Ҷумҳурият» аз ҷониби сокинони деҳаи мазкур аризаи имдодталабона ворид шуд.
Дар Ҷамоати деҳоти Зидеҳ ҷиҳати таъмини мардум бо қувваи барқ солҳои 1997 ва 2000 неругоҳи хурди барқи обии «Ҳазора - 1» ва «Ҳазора - 2» сохта ба истифода дода шуданд. Деҳаҳои гирду атрофи ин неругоҳҳо бо неруи барқи доимӣ ва шабонарӯзӣ таъмин гардиданд. Инчунин, соли 2010 бо супоришу дастури Сарвари давлат ба Ҷамоати деҳоти Зидеҳ хати барқи баландшиддат (10 кВ) гузаронда шуд. Мувофиқи нақша, аз ин хат бояд ҳамаи деҳаҳои Зидеҳ бо қувваи барқ таъмин мешуд. Аммо бо сабабҳои номаълум пас аз пайдо шудани неруи иловагии барқ ҳам ба деҳаи мазкур хати барқ гузаронда нашуд. Ҳол он ки масофаи наздиктарини хати интиқоли барқи баландшиддат аз НБО - и хурди «Ҳазора - 1» то деҳаи Куктеппа ҳамагӣ 3 километрро ташкил медиҳад.
Давлатмурод Ёров, сокини деҳа, гуфт, ки қатъи назар аз муроҷиатҳои муттасилу мунтазам роҳбарияти ноҳия ва ШСХК «Барқи тоҷик» то имрӯз ба ҷои амал кардан, ба мо фақат ваъда медиҳанд.
Ба мактубҳои бешумори сокинони деҳа (04. 01. 2011, 13. 07. 2011, 13. 06. 2012, 04. 02. 2013, 26. 02. 2013 ва ғ.) роҳбарияти ШСХК «Барқи тоҷик» бо як мазмун ҷавоб гардондааст: «Ҳангоми пайдо шудани сарчашмаи маблағгузорӣ кумак мерасонем».
Инчунин, мактуби ҷавобии ШСХК «Барқи тоҷик» бо имзои Мирзо Исмоилзода, раиси ширкат, аз 13 июли соли 2016 дастраси мо шуд, ки дар он омадааст: «Барои омода намудани лоиҳа ва харҷномаи гузарондани хати интиқоли барқи 10 кВ - аи деҳаи Куктеппаи Ҷамоати деҳоти Зидеҳи ноҳияи Варзоб «Шабакаҳои барқии марказӣ» бо корхонаи лоиҳакаш ҶДММ «Барқ сохтмон лоиҳакаш» шартнома бастааст. Айни замон аз ҷониби ширкат лоиҳа ва харҷномаи иншоот омода гардидааст.  Мувофиқи лоиҳа маблағи умумии сохтмони иншоот 591109 (панҷсаду наваду як ҳазору яксаду нуҳ) сомониро ташкил медиҳад.
Аммо «Барқи тоҷик» маблағгузории чунин иншоотро бе мувофиқаи Шӯрои нозирон амалӣ карда наметавонад. Бинобар ин, маблағи зикргардида барои баррасӣ ва мувофиқа ба Шӯрои нозирони ширкат пешниҳод карда мешавад. Дар сурати аз тарафи шӯро дастгирӣ ёфтани пешниҳод сохтмони мазкур амалӣ карда мешавад».
Аз ин ҷавоб қариб 2 сол сипарӣ мешавад, аммо аз кори анҷомдода ва тасмими Шӯрои нозирони «Барқи тоҷик» дарак нест.
Сокинони деҳа ҳайронанд, ки дар чанд соли муроҷиатҳои пай дар пай чаро масъулон як трансформатор, чанд дона симчӯб ва 9 ҳазор метр симро, ки барои интиқоли барқ ба масофаи 3 километр лозим аст, пайдо намекунанд.
Як масъули ШСХК «Барқи тоҷик» зимни суҳбат иброз дошт, ки масъалаи барқтаъминкунии деҳа аслан ба мақомоти иҷроияи маҳаллии ҳокимияти давлатии ноҳия вобаста аст. Мутаассифона, онҳо аз буҷет барои анҷоми ин корҳо маблағ ҷудо намекунанд. Ва кашидани хати неруи барқ ба уҳдаи ширкати мо меафтад.
Муҳаммадулло Шерализода, раиси ноҳияи Варзоб, гуфт, ки роҳҳои пайдо намудани ягон лоиҳаи сармоягузорӣ ё гранти хориҷиро ҳамроҳ бо ширкати «Барқи тоҷик» омӯхта истодаем. Гарчанде имкониятҳои молиявии ноҳия нокифояанд, талош меварзем, то сарчашмаи молиявие барои ҳалли ин кор дарёфт кунем.
Абдурасул Сафаров, сардори шабакаҳои барқи ноҳия, гуфт, ки аз ин масъала ва мушкилии сокинони деҳа огоҳ аст. Ҳоло лоиҳаи сохтмони хати қувваи барқ то 3,5 километрро омӯхтаем. Танҳо масъалаи маблағи сохтмон мемонад. Дар ҳолати пайдо шудани сарчашмаҳои молиявӣ ҳатман ин кор ҳалли худро меёбад.
Дар асоси аризаи қаблии сокинони деҳа аз ширкати «Барқи тоҷик» ба деҳаи Куктеппа мутахассисон омада, мувофиқи ҳуҷҷатҳои лоиҳавӣ ба маблағи 50 000 (панҷоҳ ҳазор) сомонӣ, лоиҳаи сохтмони хати барқро омода намуданд. Соли 2016 раиси вақти ноҳияи Варзоб барои гузарондани барқ замин ҷудо кард ва «Барқи тоҷик» вазифадор шуд, ки барои иҷрои лоиҳа маблағ ҷудо кунад. Ҳамаи ҳуҷҷатҳои лозима дар ШСХК «Барқи тоҷик» тайёр буданд. Сокинони деҳа аз чунин ранг гирифтани кор хурсанд шуданд, ки акнун онҳо низ бо барқ таъмин мешаванд. Мутаассифона, ширкат корро нимкола монд. Дар асоси нақша, корҳои сохтмонӣ бояд соли 2016 анҷом меёфтанд. Аммо боз ҳам ваъдабозӣ идома дорад.
- Соли 2010 барои хонандагони мактаби деҳа як синфхона сохта, 2 компютер ва 1 принтер туҳфа карданд. Аммо аз сабаби набудани қувваи барқ хонандагони деҳа имконияти истифодабарии онҳоро надоранд. Соли 2008 як стансияи телевизионӣ низ сохта шуда буд, ки бо сабаби набудани қувваи барқ 10 сол аст сокинон аз истифодаи он бенасибанд, - гуфт Саид Саъдуллоев, директори мактаби деҳа.

АЗ ИДОРА: ҳарчанд бовар накарданист, бо айби чанд амалдори масъулиятношинос дар асри XXI, замони таҳаввулоти техникию технологӣ, аҳли ин деҳа ҳанӯз ҳам бо шамъу фонус хона равшан мекунанд. Шояд баъди чопи ин матлаб мушкилии сокинони деҳа ҳал шавад. «Ҷумҳурият» ин масъаларо пайгирӣ хоҳад кард.


Баёни ақида (0)    Санаи нашр: 26.01.2018    №: 21    Мутолиа карданд: 267

26.05.2018


Қоҳир Расулзода бо Алекен Еминбахэ мулоқот намуд

Ҷаласаи Шӯрои вазирони мудофиаи давлатҳои аъзои СААД

Вохӯрии котибони шӯроҳои амният

24.05.2018


Симои сиёсӣ ва фарҳангии Пешвои миллат

Мулоқоти Шукурҷон Зуҳуров бо Алекен Еминбахэ

Вохӯрии ҳайати вазоратҳои корҳои дохилии Тоҷикистону Ӯзбекистон

Рӯнамоии иқтидори сайёҳии кишвар дар Боку

ҶАЙҲУН. ПИЁЗ ЗИЁДУ ХАРИДОР КАМ

Ҷаҳон дар як сатр

СҲШ: таваҷҷуҳи вижа ба таъмини амнияти лоиҳаҳои байналмилалии стратегӣ

Ширкати 15 ҳазор меҳмон дар ҳамоиши иқтисодии Петербург

Макрон бо умеде ба Санкт-Петербург меояд, ки «Русияро ба Аврупо орад»

Дар Ҳилманд 15 нафарро аз асорати «Толибон» озод карданд

Қазоқистон гандуми бисёрсола парвариш кардан мехоҳад

23.05.2018


Ҷаласаи Шӯрои сарони ҳукуматҳои ИДМ баргузор мегардад

Вохӯрии Абдураҳим Қаҳҳоров бо Чжао Кэчжи

Тоҷикистон дар ҳифзи нигаҳдории гуногунии биологӣ саҳми назаррас дорад

Ҷаҳон дар як сатр

Рашид Олимов: «Масоили амниятӣ таваҷҷуҳи бештар мехоҳад»

Дар Олмон ба хотимабахшии «давраи яхбандӣ» дар муносибат бо Русия даъват намуданд

Аморат низоми раводидро барои сармоягузорону мутахассисони баландпоя сабук кард

Қазоқистон: имтиёзҳои қарзи манзил барои омӯзгорон ва табибон

Қирғизистон барои иштирок дар лоиҳаи «Digital CASA» беш аз 3 миллиард рубл мегирад

21.05.2018


Ҷаҳон дар як сатр

Пекин ҷонибдори бунёди тамаддуни экологист

Маҳви 65 ҳазор ҷангӣ дар Сурия

Вашингтон барои мубориза алайҳи терроризм қариб $3 триллион харҷ кардааст

Иттиҳоди Аврупо ба ИМА роҳи пешгирии боҷро нишон дод

Мансабдорони Қазоқистон аз ҳаққи узвият дар созмонҳои динӣ маҳрум мешаванд

18.05.2018


Ҷаласа таҳти роҳбарии муовини Сарвазири мамлакат

Брифинги матбуотӣ оид ба натиҷаҳои Конфронси байналмилалии Душанбе

Ифтитоҳи Маркази таҳсилот, илм ва фарҳанги Беларус

17.05.2018


Баррасии масоили соҳибкорӣ

Вохӯрии Исматулло Насредин бо Эндрю Гилмор


Дар сомонаҳои дигари Тоҷикистон хонед