logo

суханрониҳо

ИЗҲОРОТИ МАТБУОТИИ Президенти Ҷумҳурии Тоҷикистон Эмомалӣ Раҳмон пас аз мулоқоту музокирот бо Президенти Ҷумҳурии Қирғизистон Сооронбой Жээнбеков, шаҳри Душанбе, 1 феврали соли 2018

Муҳтарам намояндагони воситаҳои ахбори омма!
Хонумон ва ҷанобон!
Мулоқоти имрӯзаи мо дар доираи сафари расмии Президенти Ҷумҳурии Қирғизистон муҳтарам Сооронбой Шарипович Жээнбеков ба Ҷумҳурии Тоҷикистон дар рӯҳияи созанда ва ҳусни тафоҳум сурат гирифт.
Мо дар заминаи принсипҳои бунёдии ҳамҷавории нек ва ҳамсони манфиатҳо тамоми маҷмӯи ҳамкории дуҷонибаи Тоҷикистону Қирғизистон ва дурнамои рушди минбаъдаи онҳоро баррасӣ намудем.
Боиси зикр аст, ки сафари муҳтарам Сооронбой Шарипович дар соли таҷлили 25-умин солгарди истиқрори робитаҳои дипломатӣ миёни давлатҳоямон сурат мегирад. Тайи ин давра муносибатҳои Тоҷикистону Қирғизистон дар ҳамаи самтҳои калидии ҳамкорӣ тамоюли мусбати рушдро соҳиб гардид.
Барои тақвияти минбаъдаи ҳамкории мутақобилан судманди ду давлат дар соҳаҳои сиёсӣ, иқтисодӣ, тиҷоратӣ, фарҳангӣ ва гуманитарӣ, дар масъалаҳои амниятӣ ва дигар соҳаҳои мавриди таваҷҷуҳи тарафайн заминаҳои ҷиддӣ фароҳам оварда шудаанд. Заминаи шартномавию ҳуқуқии устувори муносибатҳои дуҷониба, ки беш аз 85 ҳуҷҷатро ташкил медиҳад, фароҳам гардидааст. Механизмҳои зарурии дуҷонибаи ҳамкории байнидавлатӣ ташкил шудаанд.
Натиҷаҳои музокироти сатҳи олӣ бори дигар ҳавасмандии ҷонибҳоро ба таҳкими ҳамаҷонибаи натиҷаҳои то имрӯз бадастомада бо истифода аз намунаҳои нави амалӣ тасдиқ намуданд.
Дар ин замина мехостам аҳамияти бастаи санадҳои ҳамкории дуҷонибаи нав баимзорасидаро зикр намоям. Мо бо муҳтарам Сооронбой Шарипович оид ба муҳимияти идома додани муколамаи сиёсии доимӣ дар ҳамаи сатҳҳо ҳамфикр будем. Мо, инчунин, оид ба пурра истифода бурдани он иқтидори бузурге, ки дар муносибатҳои бисёрҷонибаи Тоҷикистону Қирғизистон мавҷуд аст, изҳори андеша намудем.
Ҳамзамон зарурати таҳкими бахши иқтисодии шарикии мо дар заминаи дарозмуддат таъкид карда шуд. Ҳаҷми гардиши мол байни давлатҳоямон соли гузашта тақрибан ду баробар афзуд. Барои тавсеаи минбаъдаи робитаҳои тиҷоратию иқтисодиамон захираҳои назаррас мавҷуданд. Имкониятҳои тиҷорати наздисарҳадӣ, бунёди корхонаҳои муштарак ва ҳамкорӣ миёни субъектҳои хоҷагидорӣ пурра истифода нагардидаанд. Рушди ҳамкорӣ дар соҳаҳои саноати истихроҷи маъдани кӯҳӣ, сабук ва хӯрокворӣ, инчунин, истеҳсоли маводи сохтмон ва бахши аграрӣ ояндадор арзёбӣ гардид. Мо ҳамчун давлатҳои болоии ҳавзаи дарёҳои минтақа ба муҳимияти истифодаи самарабахши захираҳои обию гидроэнергетикӣ ишора намудем.
Мо аҳамияти талошҳои минбаъдаро оид ба пешбурди лоиҳаи бузурги минтақавӣ - CASA-1000, ки бозорҳои энергетикии Осиёи Марказӣ ва Ҷанубиро ба ҳам мепайвандад, зикр намудем.
Мутмаинам, ки татбиқи лоиҳаи мазкур ба таҳкими минбаъдаи робитаҳо миёни давлатҳои ин минтақаҳо дар дигар соҳаҳо низ мусоидат мекунад.
Мо, инчунин, доир ба истифодаи самарабахштари имкониятҳои транзитию нақлиётии ҳамдигар ҳамчун омили рушди устувори иқтисодиёти ду давлат ва дар маҷмӯъ дар минтақа изҳори андеша намудем. Тавсеаи минбаъдаи долонҳои нақлиётии байнидавлатӣ тавассути таҷдиди роҳҳои мошингард ва сохтмони хатҳои нави роҳи оҳан ҳамчун қадами мутақобилан судманд эътироф гардид.
Мо бо дарназардошти пешбурди минбаъдаи самтҳои ҳамкории ишорашуда аҳамияти нигоҳ доштани фаъолнокии Комиссияи байниҳукуматӣ оид ба баррасии ҳамаҷонибаи масъалаҳои ҳамкории дуҷонибаро ҳамчун механизми муҳими рушди шарикии бисёрҷонибаамон зикр намудем.
Масъалаҳои барасмиятдарории ҳуқуқии хати сарҳади давлатӣ дар муносибатҳои байнидавлатиамон муҳимтар ба шумор мераванд.
Мо майли қатъии худро дар самти идома додани корҳо оид ба мувофиқа намудани минтақаҳои боқимонда дар доираи Комиссияи муштараки байниҳукуматӣ оид ба делимитатсия ва демаркатсияи сарҳади давлатӣ тасдиқ намудем.
Мо зимни музокирот дар вазъияти эътимодомез доир ба доираи васеи масъалаҳои дорои хусусияти минтақавӣ ва байналмилалӣ мубодилаи афкор намудем.
Таҳкими сулҳу субот, фазои эътимод ва ҳамдигарфаҳмӣ дар миқёси минтақавӣ ва байналмилалӣ самтҳои асосии ҷонибҳо дар доираи фаъолияти сиёсати хориҷиашон ба шумор мераванд. Ин, ҳамзамон, барои ҳамкории зичи минбаъда дар доираи сохторҳои ҳамкории бисёрҷонибаи минтақавӣ ва ҷаҳонӣ заминаи мусоид ба шумор меравад.
Мо зарурати рушди минбаъдаи ҳамкориро дар мубориза бар зидди терроризм, экстремизм, гардиши ғайриқонунии маводи мухаддир, ҷинояткории муташаккили фаромиллӣ ва дигар чолишҳо, инчунин, таҳдидҳои амнияти байналмилалӣ зикр намудем.
Мо дар доираи баррасии масъалаҳои марбут ба рӯзномаи байналмилалӣ ва минтақавӣ ба вазъи Афғонистон таваҷҷуҳи хосса зоҳир кардем ва ҷонибдории худро ба ҳадафҳои таъмини сулҳу субот дар ин кишвари ҳамҷавор тасдиқ намудем.
Дар доираи сафар оид ба тақвияти ҳамкорӣ ва баланд бардоштани сифати он дар соҳаҳои фарҳангу гуманитарӣ, аз ҷумла дар самти илму маориф ва тандурустӣ қаноатмандии ҷонибҳо изҳор карда шуд.
Мутмаинем, ки шарикии Тоҷикистону Қирғизистон минбаъд низ бемайлон ба манфиати давлатҳоямон ва тамоми минтақа рушд мекунад.


Баёни ақида (0)    Санаи нашр: 02.02.2018    №: 26    Мутолиа карданд: 521

17.12.2018


Баррасии масоили густариши ҳамкориҳо

Ҷамъбасти натиҷаҳои амалиёти «Кӯкнор – 2018»

Вохӯрии Имомуддин Сатторов бо Вячеслав Павловский

ХАТЛОН. Ифтитоҳи 32 бунгоҳи тиббӣ

ШУҒНОН. 2 муассисаи таълимии нав сохта шуд

НОҲИЯИ ШАМСИДДИНИ ШОҲИН. Сифати таълим беҳтар мегардад

Қариб 200 кишвар маҷмӯи қоидаҳои созишномаи Парижро ҷонибдорӣ кард

Надя Мурод бо маблағи ҷоизаи Нобел беморхона сохтанист

Масоили марз дар маркази таваҷҷуҳи сарони ҳукуматҳои Ӯзбекистону Қирғизистон

«Зардпӯшҳо» ба Фаронса Ђ10 миллиард зиён оварданд

Дар Россия теъдоди маҳбусон ба ҳадди таърихӣ коҳиш ёфт

14.12.2018


Масъалаи густариши ҳамкориҳо матраҳ гашт

Баргузории ҷаласаи Шӯро оид ба шарикии давлат ва бахши хусусӣ

Машварати сиёсии Тоҷикистону Олмон

Лукашенко: «Бозори Россия барои Беларус якумрӣ кифоят мекунад»

Вазири олмонӣ таҳримоти нави зиддирусиро нахост

Дар Сурия беш аз 30 ҳазор манзилро барқарор намуданд

Таҷлили 90-солагии нависандаи зиндаёд Чингиз Айтматов дар Қирғизистон

Ҷаҳон дар як сатр

Як вохӯрии муҳим

13.12.2018


Иштироки Азим Иброҳим дар Форуми ҳамкории Чин ва Осиёи Марказӣ

Шаҳри Душанбе бо музофоти Хайнан бародаршаҳр гардид

Вохӯрии Заробиддин Қосимӣ бо Абдулазиз ибни Абдулкарим ал-Исӣ

Мадуро вохӯриашро бо Путин таърихӣ унвон кард

Қазоқистон 50 номгӯи маҳсулотро ба содирот баровард

Дабири кулли СММ: «Лағви шартномаи Париж «худкушист»

Голикова: «Собиқадорони Ҷанги Бузурги Ватанӣ ҳамагӣ 1,4 миллион нафар мондаанд»

Дар Қирғизистон домоди қотил 20 сол зиндонӣ шуд

Ҷаҳон дар як сатр

12.12.2018


Мулоқоти Низомиддин Зоҳидӣ бо Лю Бин

Таҳкими ҳамкориҳо бо Бонки аврупоии таҷдид ва рушд

Таъсиси шӯрои рушди маориф

Қазоқистон калонтарин дар ИДМ неругоҳи барқи офтобиро ба кор даровард

Дар Қирғизистон ба волидони кӯдакони маъюб маош таъйин мекунанд


Дар сомонаҳои дигари Тоҷикистон хонед