logo

иқтисод

РАШТ. ДАР ҲОЛИ РУШДУ ШУКУФОӢ

Бо мақсади рушди соҳаи сайёҳӣ ва ҳунарҳои мардумӣ, инчунин дар сатҳи баланди ташкиливу сиёсӣ истиқбол гирифтани Ҷашни 30 - солагии Истиқлолияти давлатии Ҷумҳурии Тоҷикистон, дар ноҳияи Рашт корҳои созандагию бунёдкорӣ вусъати тоза касб намуданд. Дар доираи тадбирҳо оид ба омодагиҳо ба ҷашни бузурги миллӣ бунёди 120 иншоот тарҳрезӣ гардида,  ҳоло дар 36 иншоот корҳои сохтмонӣ оғоз ёфтаанд.
Тавре Лоиқзода Қаноатшо Холиқ, раиси ноҳия, зимни суҳбат бо хабарнигори рӯзнома гуфт, тайи чор соли охир корҳои бунёдкорию созандагӣ дар ноҳия босуръат ҷараён гирифта, дар ҳошияи сохтмони иншооте, ки аз тарафи Ҳукумати кишвар роҳандозӣ гардиданд, соҳибкорон низ дар пешрафту шукуфоии ноҳия саҳми назаррас мегиранд.
Ба гуфтаи ӯ, ҳоло бо ибтикору маблағгузории соҳибкорони маҳаллӣ таъмиру навсозӣ ва асфалтпӯш намудани роҳҳои байни деҳаҳо ва маҳаллаҳо идома дорад. Таъмири роҳҳои байни маҳалҳои аҳолинишин, бунёди ҳаммому сатарошхона, кошонаи ҳусн, майдончаҳои варзишӣ ва марказҳои намоишу фурӯши ҳунарҳои дастӣ  дар ҳар як деҳа ва марказҳои ҷамоатҳои шаҳраку деҳот, ки дар доираи ҳамин нақшаи тадбирҳо ба роҳ монда шудааст, ба рушди соҳаи сайёҳӣ ва ҳунарҳои мардумӣ мусоидат мекунад.
Соҳаи саноат низ рӯ ба пешравӣ дорад. Дар ноҳия тайи солҳои охир 12 корхонаи саноатӣ таъсис ёфтааст. Ҳаҷми умумии истеҳсоли маҳсулоти саноатӣ дар шаш моҳ 13 миллиону 865 ҳазор сомониро ташкил дод.
Кишоварзӣ низ асоси рушди иқтисодиёти ноҳия маҳсуб меёбад. Ҳаҷми истеҳсоли маҳсулоти кишоварзӣ  дар нимсолаи аввали соли ҷорӣ ба 61 миллиону 576 ҳазор сомонӣ расид, ки дар қиёс ба ҳамин давраи соли сипаришуда 697 ҳазору 430 сомонӣ зиёд мебошад. Кишоварзони ноҳия дар майдони 2317 гектар ғалладона, 2007 гектар картошка, 557 гектар сабзавот ва 637 гектар зироатҳои техникӣ кошта, боғпарварон дар майдони 70 гектар боғҳои нав бунёд карданд.
Ба рушди соҳаҳои иҷтимоӣ, аз ҷумла маориф, тандурустӣ, фарҳанг ва дастгирии ниёзмандон ҳамеша авлавият дода мешавад. Соли таҳсили гузашта дар 112 муассисаи таҳсилоти миёнаи умумии ноҳия 26 ҳазору 685 нафар хонанда, ки аз ин 1779 нафарашон хатмкунандагони синфи 11 буданд, ба таҳсил фаро гирифта шуданд. Тибқи Квотаи президентӣ 22 нафар хатмкунандагони болаёқат ба муассисаҳои таҳсилоти олии кишвар дохил гардиданд.
Дар назди муассисаҳои таҳсилоти миёнаи умумии ноҳия ҳоло сохтмони 5 бинои таълимӣ ва 30 синфхонаи иловагӣ идома дорад.
Таъмиру азнавсозии биноҳои тандурустӣ низ  вусъат ёфтааст. Аз ҳисоби соҳибкорон то имрӯз ду бинои бунгоҳи саломатӣ дар деҳаҳои Сияҳлояк ва Кӯлоба, инчунин, дар назди беморхонаи марказии ноҳия бинои маркази будубоши кӯдакони имконияташон маҳдуд сохта ба истифода дода шуд.
Боғҳои фарҳангӣ - фароғатии шаҳракҳои Ғарм ва Навобод азнавсозӣ гардида, дар онҳо гулу дарахтони ҳамешасабз шинонда шуданд.
Бахшида ба Соли нави мелодӣ, Рӯзи Артиши миллӣ, Рӯзи модар, Наврӯзи байналмилалӣ, идҳои Ғалаба ва Ваҳдати миллӣ чорабиниҳои хотирмони фарҳангию фароғатӣ доир гардиданд.
Масъалаи тарбияи ҷавонон дар маркази таваҷҷуҳ қарор дорад. Дар ҳамаи маҳалҳои аҳолинишин майдончаҳои варзишӣ сохта ба истифода дода шудаанд. Варзишгарони ноҳия имсол дар мусобиқоти ҷумҳуриявӣ 13 медали тилло, 9 нуқра ва 26 биринҷӣ ба даст оварданд. Дар ин давра дар ноҳия 15 мусобиқаи сатҳи ҷумҳуриявӣ ва 100 мусобиқаи ноҳиявӣ баргузор гардид.
Масъалаи танзими расму маросим низ батадриҷ роҳи ҳалли худро меёбад. Сарфу харҷи маъракаҳо кам шуда, мардум бештар ба бунёдкориву созандагӣ даст мезананд. Чанде пеш 2 ҳолати риоя накардани талаботи қонуни миллӣ ошкор гардид ва қонуншиканҳо мувофиқи кирдорашон ҷазо гирифтанд.
Аз байни ҷавонон сафи онҳое, ки ихтиёран ба хизмати ҳарбӣ мераванд, рӯз то рӯз меафзояд. Дар даъвати баҳорӣ 109 нафар ҷавонон ба сафи Қувваҳои Мусаллаҳи Ҷумҳурии Тоҷикистон сафарбар гардиданд, ки аксари онҳоро ихтиёриён ташкил медиҳанд.
Ҷиҳати бунёди инфрасохтори муосири сайёҳӣ ва ноил шудан ба сатҳи баланди хизматрасонӣ аз ҷониби мақомоти иҷроияи маҳаллии ҳокимияти давлатии ноҳия нақшаи чорабиниҳои мукаммал таҳия гардидааст ва татбиқи ин нақша идома дорад. Ҳоло дар ноҳия 3 меҳмонхонаи замонавӣ, аз қабили «Соҳили Сурхоб», «Шоми Рашт» ва меҳмонхонаи ҷамъияти матлуботи ноҳия, ки ба тамоми талаботи замон ҷавобгӯанд, ба меҳмонону сайёҳон хизмат мерасонанд.
- Тадбирҳо оид ба пешрафту шукуфоии ноҳия пайгирона роҳандозӣ мешаванд. Таваҷҷуҳи Пешвои муаззами миллат низ ба рушди минтақаи Рашт, аз ҷумла ноҳияи мо, хос аст. Дар маркази ноҳия ва ҷамоатҳои шаҳраку деҳот пай дар пай биноҳои наву замонавӣ қомат меафрозанд. Итминони комил дорем, ки то Ҷашни 30 – солагии Истиқлолияти давлатӣ симои Рашт боз ҳам зеботар мешавад ва сатҳи зиндагии мардум низ боло меравад, - гуфт раиси ноҳия.
Худодод ЗАЙНИДДИН, «Ҷумҳурият»  

 


 


Баёни ақида (0)    Санаи нашр: 04.09.2018    №: 174    Мутолиа карданд: 234

15.02.2019


ШАМШЕРБОЗӢ. ИШТИРОКИ ВАРЗИШГАРОНИ МО ДАР ЧЕМПИОНАТИ КУШОДИ ОСИЁИ МАРКАЗӢ

ҶАҲОН ДАР ЯК САТР

Дар Душанбе ташкили низоми муттаҳидаи мудофиаи зиддиҳавоӣ баррасӣ шуд

Дар чор сол муомилоти мол байни Тоҷикистону Ӯзбекистон 19 маротиба афзуд

Медведев: «Таҳримоти ИМА ба иқтисоди Россия таъсири чандон бузург расонда наметавонад»

Пентагон. ИМА аз Афғонистон ҳамроҳи иттифоқчиёнаш меравад

13.02.2019


2018. Сиёсати хориҷии Тоҷикистон пурбарор буд

КОРРУПСИЯ. 2047 ҷиноят ошкор гардид

САНОАТ. Беш аз 10 миллиард сомонӣ маҳсулот содирот шуд

САРМОЯИ МУСТАҚИМ. Воридот дар ҳоли афзоиш аст

ОБ. Таъминоти аҳолӣ рӯ ба беҳбудӣ дорад

АВҶИ ОБОДКОРИҲО ДАР ШАҲРИ ТУРСУНЗОДА

12.02.2019


АКАДЕМИЯИ ИЛМҲО АЗ КАШФИЁТИ НАВ ТО САНОАТИ ДОРУСОЗӢ

КӮЛОБ. Содироти 825 тонна маҳсулоти кишоварзӣ

ДАНҒАРА. Саноатикунонӣ вусъат мегирад

ФУРУДГОҲҲОИ БАЙНАЛМИЛАЛӢ. Сатҳи хизматрасонӣ рӯ ба беҳбудӣ дорад

ДДК. Авлавият ба сатҳи касбият ва таълим

САДА. Тантанаи ҷашни миллӣ дар ноҳияи Шамсиддини Шоҳин

11.02.2019


ВАЗОРАТИ ФАРҲАНГ. 2018 - соли муваффақиятҳо буд

КУМИТАИ РУШДИ САЙЁҲӢ. Беш аз 1 миллион сайёҳ ба Тоҷикистон омад

МТС. Ҳамкориҳо бо Ӯзбекистон густариш меёбанд

ВМКБ. Гумрукчиён ба буҷет 16,9 миллион сомонӣ ворид карданд

ҲИСОР. Саҳми назарраси соҳибкорон дар ободонии шаҳр

НОҲИЯИ РӮДАКӢ. Ҳаҷми истеҳсоли маҳсулот ба 1 миллиард сомонӣ расид

ВАРЗОБ. Таваҷҷуҳи сайёҳон ба нуқтаҳои истироҳатӣ афзудааст

08.02.2019


Вазорати меҳнат, муҳоҷират ва шуғли аҳолӣ. Музди миёнаи меҳнат - 1220 сомонӣ

КУМИТАИ ТЕЛЕВИЗИОН ВА РАДИО. Сифати кори шабакаҳо беҳтар мешавад

КҲФМГ. Офатҳои табиат 34 миллион самонӣ хисорот овард

Саноатикунонӣ дар Шаҳринав

Меъёри бозтамвил ба 14 дарсад поён фаромад

ШАҲРИ ВАҲДАТ. Иҷрои барзиёди андози иҷтимоӣ

ТАНЗИМ. Қонуншиканӣ коҳиш ёфтааст

СОҲИЛ. Корҳои мустаҳкамсозӣ вусъат меёбанд

ДДСТДТ. Авлавият ба рушди ҳунарҳои мардумӣ


Дар сомонаҳои дигари Тоҷикистон хонед