logo

ҳуқуқ

ҚӮШУНҲОИ ДОХИЛӢ СИПАРИ БОЭЪТИМОД ВА КАФИЛИ АМНИЯТИ КИШВАР

Имсол аз таъсиси Қӯшунҳои дохилии Вазорати корҳои дохилии Ҷумҳурии Тоҷикистон 26 сол пур шуд. Вобаста ба ин, хабарнигори рӯзномаи “Ҷумҳурият” дар ҳамкорӣ бо раёсати Қӯшунҳои дохилии ВКД саҳифаҳои таърихи фаъолияти ин воҳиди низомиро варақ зад.
Қӯшунҳои дохилӣ ҳамчун сохтори ҳарбии Вазорати корҳои дохилии Ҷумҳурии Тоҷикистон ва ҷузъи ҷудонашавандаи Қувваҳои Мусаллаҳи кишвар ва аввалин сохтори ҳарбии Тоҷикистони соҳибистиқлол ба ҳисоб меравад. Давоми солҳои душвори мухолифатҳои дохилӣ ва ҷанги шаҳрвандӣ афсарону сарбозони Қӯшунҳои дохилӣ қарзи ватандории худро садоқатмандона иҷро карда, дараҷаи баланди маҳорати касбӣ ва ҷангӣ нишон доданд. Дар давраи баргузории Иҷлосияи тақдирсози XVI Шӯрои Олии Ҷумҳурии Тоҷикистон аз ҳисоби сохторҳои ҳарбии кишвар маҳз афсарону сарбозони қисми ҳарбии 3501- и Қӯшунҳои дохилӣ барои таъмини амнияти вакилони мардумӣ ҷалб гардида буданд.
Хизматчиёни ҳарбии Қӯшунҳои дохилӣ давоми солҳои 1992 - 1997 барои таҳкими Истиқлолияти давлатӣ, барқарорсозии сохти конститутсионӣ, таъмини сулҳу суботи мамлакат ва ҳаёти осоиштаи мардуми шарифи Тоҷикистон хизматҳои босазо карда, дар ин раванд зиёда аз 600 нафар ҷон бохтанд, ки ҷасорату диловарии онҳо намунаи матонату фидокориҳо барои насли имрӯз мебошад.
Давоми солҳои баъдӣ низ ҳайати шахсии Қӯшунҳои дохилӣ дар тамоми амалиётҳои муштараки сохторҳои қудратии кишвар оид ба безараргардонии гурӯҳҳои ҷиноятпеша дар минтақаҳои мухталифи мамлакат фаъолона иштирок намуда, аз худ намунаи баланди мардонагӣ, матонат ва чолокии касбӣ нишон доданд.
Имрӯзҳо қувваи Қӯшунҳои дохилӣ, асосан, баҳри таъмини тартиботи ҷамъиятӣ дар пойтахти мамлакат ва марказҳои маъмурии вилоятҳо ва амнияти иншооти махсусан муҳими давлатӣ равона гардидааст. Дар ин замина, ҳамарӯза 300 нафар сарбоз дар ҳамбастагӣ бо кормандони мақомоти корҳои дохилӣ ба хизмати посбонӣ - пайроҳадорӣ ҷалб мешаванд, ки омили мазкур барои таъмини амнияти шаҳрвандону меҳмонон, пешгирӣ ва ошкор намудани ҷинояту ҳуқуқвайронкуниҳо мусоидат мекунад.
Машғулиятҳои махсуси омӯзишӣ, машқҳои доимии тактикию  ситодӣ - фармондеҳӣ, иштирок дар нигаҳбонии шабонарӯзии тартиботи ҷамъиятӣ, ширкат дар таъмини амнияти чорабиниҳои калони сиёсӣ, ҷамъиятӣ, фарҳангӣ ва варзишии дар пойтахти кишвар ва марказҳои маъмурии вилоятҳо доиршаванда, муҳофизати иншооти махсусан муҳими давлатӣ, омодагии доимӣ барои пешгирӣ ва рафъи ҳар гуна амалҳои тахрибкорӣ номгӯи корномаҳоест, ки дар фаъолияти рӯзмарраи ҳайати шахсии ҷузъу томҳои Қӯшунҳои дохилӣ ба сомон расонда мешаванд. Вобаста ба таъминоти моддиву маишии қисму воҳидҳои Қӯшунҳои дохилӣ бо дастгирии Ҳукумати ҷумҳурӣ давоми панҷсолаи охир дар тамоми қисмҳои ҳарбӣ корҳои навсозӣ роҳандозӣ гардида, барои фаъолияти хизматӣ, таълимот ва фароғати ҳайати шахсӣ шароити мусоид фароҳам оварда шудааст.
Моҳи августи соли 2014 биною иншооти таъйиноти хизматию хоҷагидории қисми ҳарбии 3502 пас аз таъмиру навсозӣ ва моҳи марти соли 2015 иншооти навбунёди қисми ҳарбии 3501 дар маросими тантанавӣ бо иштироки Президенти мамлакат, Сарфармондеҳи Олии Қувваҳои Мусаллаҳ муҳтарам Эмомалӣ Раҳмон мавриди истифода қарор гирифта, аз ҷониби Пешвои миллат ба сатҳу сифати корҳои сохтмонию ободонӣ ва шароитҳои моддӣ - маишии хизматчиёни ҳарбӣ баҳои баланд дода шуд.
Моҳи сентябри соли 2018 биноҳои асосию ёрирасони ротаи сеюми алоҳидаи фаврии таъйиноти махсуси қисми ҳарбии 3503 (бо қароргоҳ дар шаҳри Хоруғи ВМКБ) пас аз анҷоми корҳои сохтмонӣ аз ҷониби Сарвари давлат дар маросими тантанавӣ ифтитоҳ гардид, ки дар ҷараёни суханронӣ Пешвои миллат изҳор доштанд: “Ҳайати шахсии ротаи сеюми қисми ҳарбии 3503 - и Қӯшунҳои дохилӣ то имрӯз дар шароите зиндагиву хизмат мекард, ки ба талаботи муосир умуман, мутобиқат надошт. Вале, бо вуҷуди ин, афсарону сарбозони рота вазифаҳои хизмативу ҷангии дар назди онҳо гузошташударо дар самти таъмини тартиботи ҷамъиятӣ ва амнияти сокинони Вилояти Мухтори Кӯҳистони Бадахшон содиқона иҷро намуданд”.
Ҷиҳати таъмини иҷрои дастуру супоришҳои Ҳукумати Ҷумҳурии Тоҷикистон, дар назди раёсат ва қисмҳои ҳарбии Қӯшунҳои дохилӣ хоҷагиҳои ёрирасон таъсис дода шудааст, ки фаъолияти онҳо ба кишоварзӣ, чорводорӣ, занбӯриасалпарварӣ ва моҳипарварӣ равона гардида, ба ин васила ғизои босифати сарбозон таъмин карда мешавад.
Мусаллам аст, ки ба иҷрои вазифаҳои хизматию ҷангӣ, омода будани воҳиди ҳарбӣ аз сифатнокии ҳайати кадрии он вобастагии ногусастанӣ дорад. Бо ин мақсад, давоми солҳои 1993-1997 омодасозии кадрҳои ҳарбӣ барои қӯшун бо ташкили курсҳои таъҷилӣ дар заминаи Мактаби олии милитсияи (айни ҳол Академия) Вазорати корҳои дохилӣ роҳандозӣ гардида буд. Бо ташаккули сохторҳои ҳарбии мамлакат ва тақозои замон, соли 2000 дар заминаи факултети № 4 - и Академияи ВКД бахши алоҳидаи таълимии хоси Қӯшунҳои дохилӣ таъсис дода шуд, ки таъминоти кадрии қисму воҳидҳоро боз ҳам беҳтар намуд.
Пӯшида нест, ки имрӯз ҷаҳонро хатари терроризму экстремизм ва ҷиноятҳои фаромиллӣ таҳдид карда, давлатҳоро, пеш аз ҳама, барои тақвият бахшидани сатҳи омодабошии ҷангии сохторҳои қудратии худ водор менамояд. Дар ин замина, тибқи дастури роҳбарияти ВКД Қӯшунҳои дохилӣ тасмим гирифтааст, ки дар соли ҷорӣ тайёрии ҷангии қисму воҳидҳоро ба сатҳи сифатан нав гузаронда, бо ин мақсад, баргузории машқҳои тактикӣ, мусобиқаҳои варзишӣ - ҳарбӣ ва машғулиятҳои махсусро бештар ба роҳ монад.
Лашкар ШАРИФЗОДА,
“Ҷумҳурият”


Баёни ақида (0)    Санаи нашр: 10.04.2019    №: 68    Мутолиа карданд: 102

19.06.2019


Дар Кӯлоб Фестивали ҷумҳуриявии дӯстии ҷавонон баргузор шуд

Баррасии вазъ ва дурнамои ҳамкориҳо

Боздид аз Муассисаи давлатии «Боғи миллии Ваҳдат”

ПАНҶАКЕНТ. Омодагиҳо ба ҷашни фархунда

Писарбачаи тоҷик дар Хабаровск дӯсташро аз чоҳи оби ҷӯш наҷот дод

Тоҷикистону Беларус: «Муҳокимаи тақвияти ҳамкориҳои низомӣ»

Си Ҷинпин азми сафари Ҷумҳурии Халқии Демократии Корея дорад

Ҷаҳон дар як сатр

12.06.2019


ХУҶАНД. "Зирвеко" ба фаъолият мепардозад

Муаррифии асари Си Ҷинпин «Дар бораи идоракунии давлатӣ»

Баргузории конфронси сайёҳӣ дар Рашт

Масоили низоми бонкӣ матраҳ гардид

Дар Чин аз обхезии тобистона 6,75 миллион нафар зарар дид

Дар Ӯзбекистон рӯйхати идҳои касбиро Рӯзи китобдор афзуд

Дар Ҷопон ба солхӯрдаҳо шаҳодатномаи вижаи ронандагӣ медиҳанд

Сокини Британия дар лотерея Ј123 миллион бурд намуд

Ҷаҳон дар як сатр

11.06.2019


Песков: «Путин ба Тоҷикистон ва Қирғизистон сафар мекунад»

Иштироки роҳбарони 11 кишвар дар ҳамоиши Бишкек

Президенти Қазоқистон аз хусуси роҳҳои ҳалли мушкилоти иҷтимоӣ ҳарф зад

Ҷаҳон дар як сатр

ФАРХОР. Бонувон ба ҳунаромӯзӣ ҳавасманд мешаванд

"Куллиёт" - и Миробид Саййидои Насафӣ

04.06.2019


Лукашенко: "Эмомалӣ Раҳмонро оммаи мардум интизор аст"

Бунёдкорони роботтехникаи Россия ва Чин дар Владивосток ҷамъ омаданд

Ҷаҳон дар як сатр

Машварати сиёсии вазоратҳои корҳои хориҷии Тоҷикистон ва Белгия

Муаррифии портали хизматрасониҳои электронӣ барои андозсупорандагон

Дар ноҳияи Рашт конфронси минтақавӣ баргузор мегардад

ФУТБОЛ. Ду бозии рафиқона бо мунтахаби Ӯзбекистон

03.06.2019


Дар Тоҷикистон баландтарин афзоиши теъдоди сайёҳон ба қайд гирифта шуд

Гармои тоқатфарсо дар Ҳиндустон

Тасдиқи барнома оид ба бозомӯзии касбии кормандони соҳаи маориф

Иди саиди Фитр 5 июн таҷлил мешавад


Дар сомонаҳои дигари Тоҷикистон хонед