logo

туризм

САЙЁҲӢ. АЗ РУШДИ СОҲА ТО МУШКИЛОТИ ҲАЛТАЛАБ

Сайёҳӣ яке аз соҳаҳои муҳими иқтисодӣ ба шумор меравад ва, аз ин лиҳоз, Ҳукумати мамлакат ба рушди он таваҷҷуҳи ҳамаҷониба зоҳир менамояд. Аз ҷумла, бо мақсади фароҳам овардани шароити мусоид баҳри баланд бардоштани рақобатнокии бозори сайёҳии кишвар дар минтақа ва ҷаҳон, моҳи марти соли 2018 Ҳукумати мамлакат Барномаи рушди сайёҳӣ барои солҳои 2018 – 2020-ро қабул намуд, ки самтҳои асосӣ, афзалиятҳо ва механизмҳои татбиқи сиёсати давлатиро дар соҳаи сайёҳӣ барои давраи миёнамуҳлат муайян мекунад.
Тавре аз Кумитаи рушди сайёҳӣ иттилоъ доданд, такмили санадҳои меъёрӣ - ҳуқуқии амалкунанда дар соҳаи сайёҳӣ, содагардонии расмиёти дастрасии иҷозатнома барои оғози фаъолияти сайёҳӣ, ба роҳ мондани муколама ва шарикии давлат бо бахши хусусӣ дар соҳаи сайёҳӣ, ҳамкории самарабахш бо ширкатҳои сайёҳӣ, меҳмонхонаҳо, осоишгоҳҳо ва дигар сохторҳои ба соҳаи сайёҳӣ ва сайёҳон алоқаманд, тақвият бахшидан ба фазои сармоягузорӣ, таъмини бехатарии сайёҳон, тарғибу ташвиқи имкониятҳои сайёҳӣ ва муаррифии онҳо дар арсаи байналмилалӣ ҳамзамон, тарбияи мутахассиони соҳа, аз бандҳои муҳими барномаанд. Натиҷаи чунин тадбирандешиҳо буд, ки таваҷҷуҳи ҷомеаи ҷаҳонӣ ба захираҳои сайёҳӣ бамаротиб афзуда, ҷуғрофияи ташрифи сайёҳон ба кишвар тавсеа ёфт. Соли гузашта беш аз 1 миллион сайёҳи хориҷӣ аз Тоҷикистон дидан карда, имсол танҳо ба тантанаҳои Ҷашни Наврӯз зиёда аз 60 ҳазор сайёҳи хориҷӣ ба кишвар ташриф овард.
Дар иртибот ба ин масъала, мутахассисон иброз медоранд, ки корҳои дар доираи барнома анҷомдода, албатта, барои беҳ гаштани инфрасохтор мусоидат менамоянд, вале набояд бо ин қонеъ шуд. Бо вуҷуди он ки иқтидори туристии Тоҷикистонро дар минтақа дигар кишварҳо надоранд, ин захираҳо ба пуррагӣ омӯхта нашудаву мавриди истифода қарор нагирифтаанд ва сар карда аз сатҳи хизматрасонӣ то вазъи инфрасохтор мушкилиҳои зиёде мавҷуданд. Барои мисол, сайёҳии экологию кӯҳӣ аз самтҳои афзалиятноки туризми кишваранд ва майли сайёҳон ба табиати бикри манотиқи кӯҳӣ беш аз пеш меафзояд. Ҳатто, дучархасаворон ҳам ба минтақаҳои кӯҳӣ мароқ зоҳир мекунанд. Аммо инфрасохтори сайёҳии ин мавзеъҳо талаботи сайёҳонро қонеъ гардонда наметавонад. Мавзеъҳои таърихию фарҳангӣ бошанд, дар ҳолати на он қадар хуб қарор доранд ва шумораи зиёди онҳо зери хоканд. Ҳарчанд вазъи мавҷуда борҳо аз ҷониби роҳбарияти кишвар интиқод гардид, ҳамоно ҳолати қисме аз ёдгориҳо ташвишовар боқӣ мондааст. Аксари ёдгориҳо дар деҳаҳо ҷойгиранд, ки роҳҳои дохилии онҳо низ таъмирталабанд.
Вобаста ба ин, декани факултети географияи Донишгоҳи давлатии омӯзгории Тоҷикистон ба номи Садриддин Айнӣ Амриддин Самиев, пешниҳод месозад, ки аз нигоҳи туризм баҳогузорӣ намудани тамоми минтақаҳои ҷумҳурӣ хеле зарур аст. Қаламрави кишвар аз ҷиҳати туризм ноҳиябандӣ шудааст, лекин ташкили ҳудудиро набояд сарфи назар кард. Яъне, муайян намудан лозим аст, ки дар кадом минтақа кадом навъи туризм метавонад ривоҷ ёбад. Ҳамчунин, туризмро бояд тарзе ба роҳ монд, ки дар тамоми фаслҳои сол аз он даромад гирифта шавад.  Ҳоло, мутаассифона, мавзеъҳои сайёҳии мо мавсимианд. Бо гузаштани давраи муайян, ҳам кормандон бешуғл мемонанду ҳам мавзеъ аз мадди назар дур. Барои мисол, дар Сафеддара мешавад дигар намудҳои сайёҳиро ҷорӣ намуду ҳамзамон, барои истироҳату фароғати кӯдакон лагерҳои тобистона бунёд кард. Агар масъулон ба ин ҷиҳати масъала диққат диҳанд, бешубҳа, кор ранги дигар мегирад.
Бояд гуфт, ки яке аз омилҳои мусоидаткунанда ба рушди сайёҳии дохилию байналмилалӣ ин ба меъёрҳои ҷаҳонӣ ҷавобгӯ намудани сатҳи хизматрасонӣ аст. Аммо, хизматрасоние, ки дар манотиқи кишвар ба сайёҳон пешниҳод мегардад, на ҳама вақт  талаботи онҳоро қонеъ мегардонад. Сабаби инро коршиносони соҳа ба норасоии мутахассисон ва касбияти пасти онҳо рабт медиҳанд, ки воқеан ҳам, аз масъалаҳои асосист.  Зеро сарфи назар аз он ки зиёда аз 10 муассисаи олии кишвар ба омода намудани мутахассисони соҳа машғуланд, проблемаи нарасидани кадрҳои соҳибтахассус ҳамоно чун масъалаи аввалиндараҷа боқӣ мондааст. Хатмкардагони ин муассисаҳо бо сабаби нокифоягии донишҳои касбӣ ва надонистани забонҳои хориҷӣ дар бозори туризм мавқеъ пайдо карда наметавонанд ва дар шароити феълӣ, ки шумораи сайёҳони ба кишвар ташрифоваранда дар ҳоли афзоиш аст, норасоии мутахассисон беш аз пеш эҳсос мегардад. Кумитаи рушди сайёҳӣ кӯшиш карда истодааст, ки таҷрибаомӯзии донишҷӯёнро дар муассисаҳои ба соҳа алоқаманд таъмин намуда, ба ин васила, касбияти онҳоро баланд бардорад, аммо чораҳои андешидашуда ҳоло ҳам нокифояанд. Чуноне Амриддин Самиев зикр мекунад, на ҳамаи ширкатҳо барои ба кор ҷалб намудани мутахассисон ҳавасманданд. Дар навбати худ, на ҳамаи мутахассисон забонҳои хориҷиро медонанд, дар ҳоле ки донистани забон тақозои касбашон аст. Бартар аз ин, омӯзгорон барои такмили ихтисос ба хориҷи кишвар фиристода намешаванд. Дар ҳоле ки барои омода намудани мутахассиони ҷавобгӯ ба талаботи бозори байналмилалии сайёҳӣ, пеш аз ҳама, омӯзгорон бояд аз таҷрибаи пешрафтаи кишварҳои дар самти сайёҳӣ пешгом воқиф бошанд ва бо назардошти ин, кадрҳоро омода созанд.
Пас, чӣ бояд кард? Барои бартараф сохтани мушкилоти мавҷуда дар назар аст, ки дар самти омода намудани кадрҳо Академияи байналмилалии сайёҳӣ ва Пажӯҳишгоҳи илмӣ – таҳқиқотии Шоҳроҳи Абрешим бунёд ёбад. Аммо бо таъсиси чунин муассисаву андешидани тадбирҳои дигар то кадом андоза ин мушкилиҳо ҳалли худро меёбанд, вақт нишон хоҳад дод. 
Меҳрангез ҚОДИРОВА, “Ҷумҳурият”


Баёни ақида (0)    Санаи нашр: 23.04.2019    №: 77    Мутолиа карданд: 305

18.10.2019


Дар Арабистони Саудӣ садамаи автомобилӣ боиси ҳалокати 35 зоир гашт

Нигаронии муовини Дабири кулли СММ аз афзудани хавфи сарзании ҷанги ядроӣ

Артиши Сурия бори аввал дар панҷ сол вориди Раққа шуд

Таллин барои дучархасавор шудани сокинон 195 миллион евро харҷ мекунад

Ҷаҳон дар як сатр

Қонунгузорӣ. Ҷазо барои шиканҷа пурзӯр мегардад

Суғд. 557 ҳодисаи фавқулода дар нуҳ моҳ

Хуҷанд мизбони Чемпионати Осиё оид ба самбо - 2022

15.10.2019


Иштироки низомиёни тоҷик дар машқҳои СААД дар вилояти Нижегород

Иттиҳоди Аврупо аз Туркия баровардани сипоҳашро аз Сурия талаб намуд

Ҷоизаи Нобел оид ба иқтисодро барои талоши мубориза бо қашшоқӣ супурданд

Назарбоев ва иштиёқи расмкашӣ

Ҷаҳон дар як сатр

14.10.2019


Роҳи Помир ба панҷгонаи зеботарин роҳҳои дунё шомил гардид

Дар Ҷопон аз тӯфони «Хагибис» 33 нафар ҳалок гашт

Трамп маблағеро ном бурд, ки Вашингтон дар ҷангҳои Шарқи Наздик масраф кардааст

Астронавти амрикоӣ рекорди ба кайҳон баромадани кайҳоннавардони русро пас мегузорад

Ҷаҳон дар як сатр

11.10.2019


Боздиди қариб 8 миллион нафар аз ғурфаи Тоҷикистон дар намоишгоҳи Чин

СААД дар Бишкек вокуниши муштарак ба ҳолатҳои фавқулодаро баррасӣ намуд

Ҷаҳон дар як сатр

10.10.2019


Ёддошти тафоҳум ба имзо расид

Вохӯрии вазирони корҳои дохилии Тоҷикистону Россия

Душанбе ва Димишқ бозгашти тоҷикистониёнро аз Сурия баррасӣ намуданд

Меркел ва Ҷонсон оид ба Brexit ба мувофиқа омада натавонистанд

Барнаул лидерҳои ҷавони кишварҳои Осиёро гирд овард

Ҷаҳон дар як сатр

08.10.2019


ТОҶИКОБОД. 40 НАФАР БА САФИ ҚУВВАҲОИ МУСАЛЛАҲ ПАЙВАСТ

Мулоқоти Қоҳир Расулзода бо роҳбарони ҳайатҳои давлатҳои аъзои САҲА

Ҳамоиш ба муносибати Рӯзи забони давлатӣ дар Тошканд

Бизнес - форуми сайёҳии Тоҷикистону Қирғизистон

СММ амнияти кӯдакони Афғонистонро боиси нигаронӣ хонд

Бонки ҷаҳонӣ Тоҷикистонро ба рӯйхати кишварҳои ислоҳотгар ворид намуд

Ҷаҳон дар як сатр


Дар сомонаҳои дигари Тоҷикистон хонед