Нашрияи расмии Тоҷикистон

иқтисод

Ҳаҷми ММД ба 20,6 миллиард сомонӣ расид

Вазорати молияи Ҷумҳурии Тоҷикистон дар соли 2009 бо мақсади паст намудани таъсири шиддатнокии бӯҳрони ҷаҳонии молиявӣ ба иқтисодиёти кишвар чораҳои фискалӣ таҳия намуда, барои дар амал татбиқ намудани онҳо тадбирҳои мушаххас андешид. Новобаста аз таъсири бӯҳрон ба иқтисодиёти кишвар нишондиҳандаҳои макроиқтисодӣ, вазъи молиявӣ ва таъмини сиёсати иҷтимоию иқтисодӣ мусбат арзёбӣ шуданд, -гуфт вазири молия Сафаралӣ Наҷмиддинов зимни нишасти матбуотӣ.
Натиҷаҳои ҷамъбасти пешакии рушди иқтисодиву иҷтимоӣ нишон дод, ки дар соли сипаригашта ҳаҷми маҷмӯи маҳсулоти дохилӣ ба 20,6 миллиард сомонӣ расидааст, ки нисбати соли 2008 3,0 миллиард сомонӣ (17,1%) зиёд аст. Буҷети ҷории давлатӣ нисбат ба соли гузашта 740,8 миллион сомонӣ афзуд.
Дар баробари ин аз ҳисоби маблағҳои махсуси ташкилотҳои буҷетӣ 270,3 миллион сомонӣ, грантҳо барои лоиҳаҳои инвеститсионӣ 176,5 миллион сомонӣ, қарзҳо барои лоиҳаҳои муштараки инвеститсионӣ 342,6 миллион сомонӣ ва қарзи Ҷумҳурии халқии Чин 576,9 миллион сомонӣ ҷалб ва азхуд карда шуд.
Ҳамзамон дар ин давра гардиши савдои хориҷӣ нисбати соли 2008 ба маблағи 1,1 миллиард доллари амрикоӣ (23,4%) коҳиш ёфта, ҳаҷми содирот 396,4 миллион доллар (28,1%) ва воридот 701,1 миллион доллар (21,4%) кам гардид. Таъсири манфии ин омилҳо ба он оварда расонид, ки даромади буҷети давлатӣ дар ҳаҷми 5541,2 миллион сомонӣ (99,7%) таъмин гардид, ки аз нақша 18,3 миллион сомонӣ кам мебошад.
Ба буҷети ҷумҳуриявӣ бошад, зиёда аз 150,7 миллион сомонӣ маблағ ворид нагардид, ки ба ин беиҷро мондани пардохтҳои гумрукӣ сабаб шуданд.
Дар хотима вазир ба суолҳои рӯзноманигорон, ки бештар ба мавзӯи хариду фурӯши саҳмияҳои «НБО-и Роғун» дахл дошт, ҷавобҳои мушаххас дод.

Матлубаи АБДУҚАҲҲОР

Баёни ақида (0)

Дар сомонаҳои дигари Тоҷикистон хонед