Нашрияи расмии Тоҷикистон

сиёсат

Алиасғари Шеърдӯст: Эрон дӯсти Беғарази Тоҷикистон аст

-Тоҷикистон дар байни кишварҳои Осиёи Марказӣ барои Эрон аз ҷойгоҳ ва авлавияти вижае бархурдор аст, ҳамчунон ки Эрон дар радифи дӯстони бисёр наздики кишвари зебои шумост ва ба гуфтаи ҷаноби оқои Эмомалӣ Раҳмон аз зумраи шарикони стратегии Тоҷикистон ба шумор меравад. Мо рушди муносибатҳои ҳасанаи дуҷониба ва сеҷонибаро бо кишварҳои форсизабон- Тоҷикистон ва Афғонистон аз авлавияти ҷиддӣ дар сиёсати хориҷии Ҷумҳурии Исломии Эрон медонем ва бисёре аз муносиботи минтақавиро бар ин асос поярезӣ кардаем,- гуфт Алиасғари Шеърдӯст, сафири фавқулода ва мухтори Эрон дар Тоҷикистон зимни як нишасти матбуотӣ.
Сафир аз рушди муносибатҳои Тоҷикистону Эрон, ки мӯҳтавои табиии стратегӣ доранд, изҳори қаноатмандӣ намуда, Ҷумҳурии Исломии Эронро дӯсти беғарази Ҷумҳурии Тоҷикистон маънидод кард.
Зикр гардид, ки заминларзаи ноҳияи Ванҷи Кӯҳистони Бадахшон ҷониби Эронро бетараф нагузошт. Бо дастури роҳбарияти кишвари Эрон ба Тоҷикистон беш аз 32 тонна маводи ғизоӣ ва дигар лавозими зиндагӣ ба маблағи 120 ҳазор доллар интиқол ёфт, ки ҳадди ниҳоӣ нест. Ёриҳои беғаразонаи Эрон ҷиҳати рафъи оқибатҳои заминларза ба бародарону хоҳарони ҳамзабон, ҳамойин, ҳамфарҳанг ва ҳамдили тоҷик минбаъд низ идома хоҳад ёфт.
Алиасғари Шеърдӯст гуфт, ки баргузории Наврӯзи имсола вижагии хос пайдо хоҳад кард. Ва он ин аст, ки Наврӯз чун ҷузви мероси муштараки тамаддуни башарӣ дар Созмони илмӣ, фарҳангӣ ва тарбиятии Милали Муттаҳид- ЮНЕСКО ба расмият даромадааст. Маҳз ба хотири ҷаҳонӣ гаштани он дар Наврӯзи имсола, ки дар шаҳри Шерози Эрон баргузор хоҳад гардид, намояндагони беш аз 20 кишвари ҷаҳон, ки Наврӯз дар онҳо гиромӣ дошта мешавад, даъват шудаанд. Дар ин ойини мардумии шукӯҳманд тибқи паймоне, ки байни Маҳмуди Аҳмадинажод, раиси Ҷумҳурии Исломии Эрон ва Эмомалӣ Раҳмон, Сарвари давлати Тоҷикистон, ҳосил шуд, ҳайати баландмартабаи Тоҷикистон низ ширкат хоҳад варзид.
Изҳори умедворӣ шуд, ки дарахти дӯстии решадори байни Эрону Тоҷикистон беш аз пеш самароти ширину гуворо бидиҳад ва мардумони ду кишвар дар сояи ин дарахти тановар дар осоиш ва шодмонӣ зиндагӣ бикунанд.

Додоҷон Рӯзиев,
«Ҷумҳурият»

Баёни ақида (0)

Дар сомонаҳои дигари Тоҷикистон хонед