Нашрияи расмии Тоҷикистон

иҷтимоиёт

Ҳама роҳҳои аҳамияти ҷумҳуриявидошта мувофиқи нақша таҷдиду таъмир мегарданд

Ҳама намуди нақлиёт соли гузашта 19 миллиону 587 ҳазор тонна бор ва 155 миллиону 344 нафар мусофир кашонданд. Танҳо тавассути роҳи оҳан 14,5 миллион тонна бор интиқол дода шуд. Ҳаҷми бору мусофиркашонӣ дар нақлиёти автомобилӣ ва ҳавопаймоӣ низ афзудааст, хабар дод вазири нақлиёт ва коммуникатсия Олимҷон Бобоев дар нишасти матбуотӣ ба намояндагони ВАО.
Муассисаҳои хизматрасонии соҳаи алоқа ва иттилоотонӣ тибқи маълумоти пешакӣ 1 миллиарду 97 миллиону 700 ҳазор сомонӣ даромад ба даст оварданд. Алоқаи барқӣ дар ҷумҳурӣ ба ҳар 100 нафар аҳолӣ 4,6 муштарӣ ва алоқаи мобилӣ 57,2 муштариро фаро гирифтанд, ки ин нисбат ба соли 2008 мутаносибан 3,1 ва 1,5 баробар зиёданд.
Корхонаи воҳиди давлатии «Почтаи тоҷик» дар муқоиса ба соли 2008 600 ҳазор ё ба андозаи 13% зиёд даромад ба даст овардааст.
Ба ҳолати 1 январи соли 2010 обунашавӣ ба рӯзномаю маҷаллаҳо 543 ҳазору 300 нусхаро ташкил дода, дар муқоиса ба соле пеш 23,6 % афзудааст. Илова бар ин дар тамоми шӯъбаҳои алоқаи почтаи ҷумҳурӣ савдои чаканаи рӯзномаҳо ба роҳ монда шудааст. Бо мақсади иҷрои Қонуни Ҷумҳурии Тоҷикистон «Дар бораи иҷозатномадиҳӣ ба баъзе намуди фаъолият» вазорат ба миқдори 12 185 адад иҷозатнома дода, аз ин ҳисоб ва ҷаримабандию дигар чорабиниҳои марбут 8.30 858 сомонӣ ба буҷети ҷумҳурӣ ворид намудааст.
Вазири нақлиёт ва коммуникатсия зимни ҷавоб гуфтан ба аксар саволҳои хабарнигорон, ки ба мавзӯи сохтмону таҷдиди роҳ дахл доштанд, хотиррасон намуд, ки барои таҷдиди 1 километр роҳ аз 300 ҳазор то 1 миллион доллари амрикоӣ маблағ даркор буда, мувофиқи нақша тадриҷан ҳама роҳҳои аҳамияти ҷумҳуриявидошта таҷдиду таъмир мешаванд.

Н. ХУДОЙБАХШОВ

Баёни ақида (0)

Дар сомонаҳои дигари Тоҷикистон хонед