Нашрияи расмии Тоҷикистон

ҳуқуқ

285 амалиёти наҷотдиҳӣ гузаронида шуд

-Соли 2009 дар ҷумҳурӣ 189 ҳолати фавқулодаи дорои хусусияти табиидошта ба амал омад, ки дар натиҷа 45 нафар ба ҳалокат расид,- гуфт Ҳайбулло Латифов, раиси Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон.
Раиси кумита иброз дошт, ки бар асари офатҳои табиӣ 2543 хона зарар дида, 500-тои дигар пурра хароб гардид. Хисороти хоҷагии халқи ҷумҳурӣ аз офатҳои табиӣ зиёда аз 100 миллиону 767 ҳазору 200 сомониро ташкил медиҳад. Ҷиҳати дастгирии зарардидагон Ҳукумати Ҷумҳурии Тоҷикистон ба маблағи 1 миллиону 423 ҳазору 150 сомонӣ ёрии яквақтаина ва қарзи имтиёзнок ҷудо кард.
Зимни нишасти матбуотӣ саволҳо ба миён омаданд, ки «Бар асари силсилазилзилаҳо дар ноҳияи Ванҷ чӣ кӯмакҳо ба осебдидагон расонида шуд ва ҳоло ноҳияи Ванҷ дар чӣ вазъият қарор дорад?». Раиси кумита посух дод, ки вазъият айни ҳол мӯътадил аст. Аз ҷониби кумита ба ноҳияи Ванҷ 255 хайма, 37 тонна маводи хӯрокворӣ, 2 ҳазор дона болопӯши гарм ва дигар маводи лозима фиристода шуд. Инчунин Ҳукумати ҷумҳурӣ ва созмонҳои байналмилалӣ ба зарардидагон миқдори зиёди ёриҳои башардӯстона расониданд. Маврид ба таъкид аст, ки дар соли сипаригашта наҷотдиҳандагон 285 амалиёти наҷотдиҳӣ –кофтуковӣ гузарондаанд. Дар мавриди расондани ёрӣ ба осебдидагони ноҳияи Ванҷ саҳми онҳо назаррас аст.

Шаҳнози ҚУРБОН

Баёни ақида (0)

Дар сомонаҳои дигари Тоҷикистон хонед