Нашрияи расмии Тоҷикистон

сиёсат

Мардум ба арзандаҳо раъй медиҳад

Мувофиқи қонунҳои конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» ва «Дар бораи интихоботи вакилон ба маҷлисҳои маҳаллии вакилони халқ» маъракаи муҳими сиёсӣ- омодагӣ ба интихоботи Маҷлиси Олӣ ва маҷлисҳои маҳаллӣ оғоз ёфт. Дар ин робита чанде қабл дар Маркази тадқиқоти стратегии назди Президенти Ҷумҳурии Тоҷикистон бо ибтикори Фонди байналмилалии системаҳои интихоботӣ ва Оҷонсии Амрико оид ба рушди байналмилалӣ (ЮСАИД) семинари омӯзишӣ дар мавзӯи «ВАО ва интихобот» баргузор шуд. Дар он вазифа, ҳуқуқ ва ӯҳдадориҳои васоити ахбори омма, гузаронидани ташвиқоти пешазинтихоботӣ, мақом ва ваколатҳои нозирони миллӣ ва байналмилалӣ мавриди муҳокима қарор гирифт.
Муҳибулло Додоҷонов, роҳбари дастгоҳи Комиссияи марказии интихобот ва раъйпурсии ҷумҳурӣ, хабарнигоронро ба он даъват кард, ки барои шаффоф ва демократӣ гузаронидани интихобот меъёрҳои қонунгузориро риоя намоянд. Комиссияи марказии интихобот ва раъйпурсии ҷумҳурӣ ба дастгирии ҳамаи зиёиёни мамлакат ва хабарнигорон ниёз дорад. Зикр гардид, ки мувофиқи моддаҳои 37 ва 39 Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» ва моддаҳои 31 ва 34 Қонуни конститутсионии Ҷумҳурии Тоҷикистон «Дар бораи интихоботи вакилон ба маҷлисҳои маҳаллии вакилони халқ» бо қарори КМИР аз 28 декабри соли 2009 тартиби истифодаи васоити ахбори омма дар маъракаи пешазинтихоботӣ аз ҷониби ҳизбҳои сиёсӣ, номзадҳои ба қайд гирифташуда ва шахсони боэътимоди онҳо тасдиқ шуд. Ба гуфти Муҳибулло Додоҷонов дар асоси муқаррароти мавҷуда Кумитаи телевизион ва радиои назди Ҳукумати Ҷумҳурии Тоҷикистон бояд ба ҳар як ҳизби сиёсӣ ва шахсони боэътимоди он барои суханронӣ аз тариқи Радиои Тоҷикистон ва шабакаи якуми Телевизиони Тоҷикистон ё дигар радио ва телевизионҳои давлатии маҳаллӣ то 30 дақиқа вақти эфир ба тариқи ройгон ҷудо намоянд. Ба номзад ба вакилӣ аз ҳавзаи якмандата ва шахсони боэътимод бошад, то 15 дақиқа пешниҳод шудааст. Рафти маъракаи пешазинтихоботӣ бошад, тавассути барномаҳои дахлдори ахбори телевизион ва радио ба тарзи баробарӣ мунтазам пахш мешавад. Шахсони боэътимоди ҳизбҳои сиёсӣ ва номзадҳои ба қайд гирифташуда ба вакилӣ аз ҳавзаҳои якмандата ҳуқуқ доранд, ки дар матбуоти давлатии ҷумҳуриявӣ, вилоятӣ, шаҳрӣ ва ноҳиявӣ дар бораи барномаҳои ҳизбҳо ва номзадҳо ба вакилӣ дар ҳаҷми то 8 саҳифаи чопи дуинтервалии компютер ба таври ройгон мақола чоп намоянд. Мақолаҳо дар бораи номзадҳо ба вакилӣ дар доираи маъракаи пешазинтихоботӣ зери унвони «Ба пешвози интихоботи Маҷлиси Олии Ҷумҳурии Тоҷикистон ва маҷлисҳои маҳаллии вакилони халқ» ба табъ мерасанд.
Худойбердӣ Холиқназаров, сардори шӯъбаи Маркази тадқиқоти стратегии назди Президенти Ҷумҳурии Тоҷикистон, иброз дошт, ки ВАО дар гузаронидани маъракаи интихобот нақши хеле муҳимро мебозад. Сокинони мамлакат маҳз тавассути он бо номзадҳо ва барномаи онҳо шинос мешаванд. Мардум бо истифода аз ҳуқуқҳои конститутсионии худ ба номзадҳои арзанда овоз медиҳанд.
Хонум С. Каменева, намояндаи САҲА дар Тоҷикистон, гуфт, ки маъракаи интихобот, хоса муаррифии аҳзобу номзадҳо, аз хабарнигорон вобастагии зич дорад. Вале набояд фаромӯш кард, рӯзноманигор ҳақ надорад аз як фард қаҳрамон созад ва ё баръакс дигареро заиф нишон диҳад. Пеш аз ҳама бояд ба барномаҳои номзадҳо аҳамият дода, дар муқоиса мунсифона баҳо диҳад ва аҳамияти онро ба мардум фаҳмонад. Интихобот ба дӯши мардум аст, на ба дӯши хабарнигор.
Ҳамаи иштирокдорон изҳори умед доштанд, ки интихоботи Маҷлиси Олӣ ва маҷлисҳои маҳаллӣ ба таври шаффоф, демократӣ ва озод мегузарад.

М. САФАР,
«Ҷумҳурият»

Баёни ақида (0)

Дар сомонаҳои дигари Тоҷикистон хонед