Нашрияи расмии Тоҷикистон

иқтисод

Аз маблағҳои портфели лоиҳаҳои амалкунандаи Ҳукумати ҷумҳурӣ 1,5 миллиард сомонӣ истифода шудааст

Кумитаи сармоягузорӣ ва идораи амволи давлатӣ дар соли 2009 барои беҳбудӣ бахшидан ба фазои инвеститсионӣ, ҷалби ҳарчи бештари сармояи хориҷӣ ба иқтисодиёти ҷумҳурӣ, суръатбахшии раванди хусусигардонии моликияти давлатӣ, дастгирӣ ва ҳимояи давлатии соҳибкорӣ ва ташкили ҷойҳои нави корӣ баҳри рушди иқтисодию иҷтимоии ҷумҳурӣ тадбирҳо андешида, амалӣ намуд.
Дар натиҷа ба ҳолати 1 январи соли 2010 бо назардошти ба фаъолият оғоз намудани лоиҳаҳои нав ва ихтисори лоиҳаҳои баанҷомрасида портфели лоиҳаҳои амалкунандаи Ҳукумати Ҷумҳурии Тоҷикистон 59 лоиҳа ба маблағи умумии 8,1 миллиард сомониро дар бар мегирад, ки аз ин маблағҳои қарзӣ 75,3%, грантӣ 14,3%, ҳиссаи Ҳукумати Ҷумҳурии Тоҷикистон 6,9% ва ҳиссаи ҷамоатҳо 3,5%-ро ташкил медиҳанд. Аз маблағҳои портфел дар соли 2009-ум 1,5 миллиард сомонӣ истифода гардид.
То 1 октябри соли 2009 ҷалби умумии сармоягузории мустақими хориҷӣ ба Ҷумҳурии Тоҷикистон 152,5 миллион доллари ИМА-ро ташкил дод, ки ин нишондиҳанда нисбат ба ҳамин давраи соли 2008- 365,0 миллион доллар камтар мебошад.
Дар ин сол аз ҷониби кумита 22 созишнома оид ба ҳавасмандгардонӣ ва ҳифзи мутақобилаи сармоягузорӣ омода карда шуда, аз ҷумла созишномаҳо миёни Ҷумҳурии Тоҷикистон ва Ҷумҳурии Исломии Покистон, Ҷумҳурии Литва ва Иттиҳоди иқтисодии Белгия-Люксембург, Муғулистон ва Шветсария тасдиқ гардида, ба имзо расиданд.
Бо назардошти таъмини истиқлолияти энергетикаи ҷумҳурӣ кумита рӯйхати бунёд ва барқарорсозии 13 нерӯгоҳи барқӣ ва 13 хати баландшиддати интиқоли барқро дар солҳои 2009-2013 омода сохта, барои баррасӣ ба Ҳукумати Ҷумҳурии Тоҷикистон пешниҳод намудааст. Дар ҷумҳурӣ 7 лоиҳаи энергетикӣ асосан аз ҳисоби маблағи буҷети давлатӣ ва сармоягузориҳои хориҷӣ амалӣ гашта, дар баробари ин дар соли 2009 56 НБО-и хурд бо иқтидори умумии 7860,9 кВт сохта шуд.
Дар давраи ҳисоботӣ аз ҳисоби хусусигардонӣ ва истифодаи моликияти ҷумҳуриявӣ ба буҷети ҷумҳуриявӣ 18,4 миллион сомонӣ маблағ ворид гардидааст, ки нисбати ҳамин давраи соли 2008-ум 4,9 миллион сомонӣ зиёд мебошад. Маблағи умумии дар соли 2009 аз ҳисоби хусусигардонӣ ва истифодаи моликияти давлатӣ ба буҷет воридгардида 37,3 миллион сомониро ташкил дода, дар муқоиса ба соли 2008-ум 12,4 миллион сомонӣ афзоиш ёфтааст.
Дар ин бора раиси Кумитаи сармоягузорӣ ва идораи амволи давлатӣ Давлаталӣ Саидов дар нишасти матбуотӣ иттилоъ дод.

Н. ХУДОЙБАХШОВ

Баёни ақида (0)

Дар сомонаҳои дигари Тоҷикистон хонед