Нашрияи расмии Тоҷикистон

ҳуқуқ

5 гурӯҳи муташаккили ҷинояткор барҳам дода шуд

Рустам Назаров, директори Агентии назорати маводи нашъаовари назди Президенти Ҷумҳурии Тоҷикистон, зимни нишасти матбуотӣ иброз дошт, ки дар соли 2009 агентӣ 152 ҳодисаи вобаста ба муомилоти ғайриқонунии маводи нашъаоварро ошкор намуд. Дар натиҷа 315 килову 253 грамм героин, 350 килову 234 грамм афюн ва 331 килову 0,10 грамм маводи нашъаовари гурӯҳи каннабис мусодира гардид. Шӯъбаи тафтишотии агентӣ 135 парвандаи ҷиноятӣ оғоз карда, 107 парвандаро нисбати 143 нафар ба суд ирсол намуд. Ҳамчунин дар самти мубориза бар зидди гурӯҳҳои муташаккили нашъаҷаллоб як қатор чорабиниҳо амалӣ шуданд, ки дар натиҷа фаъолияти 5 гурӯҳ қатъ ва 21 ҷинояти дар ҳайати гурӯҳ, бо иштироки 65 нафар содиргашта ошкор гардид.
Зикр гашт, ки солҳои охир ҳамкориҳои байналмилалӣ дар самти ҳамоҳанг сохтани фаъолият дар мубориза бо муомилоти ғайриқонунии маводи нашъаовар густариш ёфтанд.
Рустам Назаров ба саволи хабарнигорон «Оё гурӯҳҳои муташаккили ҷиноятии трансмиллӣ ҳоло ҳам мавҷуданд ва роҳбарони ин гурӯҳҳо киҳо мебошанд?» посух дод, ки «Тибқи маълумоти маркази таҳлилӣ ва қисмҳои зудамали мо имрӯз чунин гурӯҳҳо 12- тоанд ва бар зидди онҳо мо пайваста чорабиниҳои фаврӣ-ҷустуҷӯӣ мегузаронем. Ҳайати ин гурӯҳҳоро ҳам шаҳрвандони Тоҷикистон ва ҳам шаҳрвандони хориҷӣ ташкил медиҳанд. Далелҳое мавҷуданд, ки роҳбарии ин гурӯҳҳоро шахсони ҳуқуқиву мансабдор бар дӯш доранд ва барои рафъи ин зуҳурот амалиётҳои муштарак ба роҳ монда шудаанд».

Шаҳнози ҚУРБОН

Баёни ақида (0)

Дар сомонаҳои дигари Тоҷикистон хонед