Нашрияи расмии Тоҷикистон

ҳуқуқ

Қонуни авф пеш аз мӯҳлат татбиқ гашт

Ҳанӯз 3 ноябри соли 2009 ба муносибати 15-умин солгарди Конститутсияи (Сарқонуни) Ҷумҳурии Тоҷикистон ва бузургдошти Соли Имоми Аъзам Абӯҳанифа Нӯъмон ибни Собит аз тарафи Президенти кишвар Қонуни Ҷумҳурии Тоҷикистон «Дар бораи авф» ба имзо расида буд. Пас аз ин иқдоми башардӯстона ва хайрхоҳонаи Сарвари давлат дар Раёсати корҳои ислоҳии Вазорати адлияи ҷумҳурӣ бо иштироки сардорони муассисаҳои корҳои ислоҳӣ, тавқифгоҳҳои тафтишотӣ, шӯъбаҳои махсуси РКИ ва намояндагони ниҳодҳои масъули татбиқи қонуни мазкур- Суди Олӣ, Прокуратураи генералӣ ва прокурор доир ба назорати муассисаҳои корҳои ислоҳӣ ҷаласа баргузор гардид. Иззатулло Шарифов, муовини вазир- сардори Раёсати корҳои ислоҳии Вазорати адлияи ҷумҳурӣ ҳар як моддаи қонунро шарҳу тафсир дод. Бо пешниҳоди ӯ Ситоди раёсат таъсис гашт ва барои татбиқи қонун ба ҳар як муассисаи корҳои ислоҳӣ мутахассисони варзида ва ботаҷриба мутасаддӣ таъйин гардиданд. Онҳо ҳар даҳрӯза аз рафти иҷрои қонуни авф ба ситоди раёсат гузориш пешниҳод мекарданд, ки дар натиҷа он бе ягон қонуншиканӣ пеш аз мӯҳлат ба иҷро расида, ба беш аз 10 ҳазор маҳбус татбиқ ёфт.
Аз ҷумла, 2178 нафар аз муассисаҳои корҳои ислоҳӣ, 406 нафар аз тавқифгоҳҳои тафтишотӣ, 2677 нафар аз нозироти корҳои ислоҳӣ, 1145 нафар аз муассисаҳои сукунатӣ озод шуд. Ҳамчунин мӯҳлати адои ҷазои 4036 нафар маҳкумшуда кам гардид. Аз теъдоди умумӣ 299 зан, 42 ноболиғ, 35 маъюб ва аз 55-сола боло 60 нафарро ташкил медиҳад.
Тибқи қонуни авф 280 нафар шаҳрванди Ҷумҳурии Исломии Афғонистон, ҳамчунин шаҳрвандони кишварҳои Африқои Ҷанубӣ ва Филиппин озод гардида, ба ватани хеш баргаштанд.

М. САБУРОВ,
муовини сардори Раёсати корҳои
ислоҳии Вазорати адлия

Баёни ақида (0)

Дар сомонаҳои дигари Тоҷикистон хонед