Имсол мардуми шарифи Тоҷикистон Рӯзи Ваҳдати миллиро дар шароите ҷашн мегиранд, ки дар кишвар чун дигар мамолики ҷаҳон мубориза барои пешгирӣ аз паҳншавии пандемияи коронавирус идома дорад. Ҷумҳурии Тоҷикистон аз ҷумлаи камшумор давлатҳое буд, ки бо роҳандозии тадбирҳои саривақтиву судманди Ҳукумат тавонист мавҷи маризиро, ки аллакай тамоми кишварҳои минтақаро фаро гирифта буд, ақиб андозад. 

Иқдомоти амалии давлату Ҳукумат, ки халқро аз сирояти ин маризии мусибатзо дар зарфи чор моҳи авҷи он дар ҷаҳон эмин дошт, наҳзатиҳои худбохтаро ончунон нороҳат кард, ки дар ҳар гӯшаи мамлакат нишонаҳои онро меҷустанд. Вале чун хабаре дар бораи сирояти ин беморӣ дар Тоҷикистон намеёфтанд, ончунон ба худ печиданд, ки эҳсоси бадбинонаашон рӯи ҳар ҳарфу ҳиҷои дар шабакаҳо коридаашон ба забони ҳол меомад. Дасту остини душманонаи худ барзаданд, то аз ин вабо низ ба нафъи хеш истифода кунанд ва аввалин коре, ки карданд, оғози маъракаи тарсафканӣ ва иғвобарангезӣ тавассути шабакаҳои иҷтимоӣ буд. Аммо замоне, ки нишонаҳои бемории шумқадам дар Тоҷикистон ошкор ва сабт шуд, ҳайрату нороҳатии хоинон канор рафт ва ҷойи онро табли шодии душманони миллат гирифт.

Ба рағми хоставу интизороти бадбинонаи наҳзатиҳо ва думравонашон Ҳукумат дар мубориза бо коронавирус ва табобати гирифторони беморӣ дар фурсати кӯтоҳ даст ёфт ва ҳоло давлату миллати тоҷик дар остонаи пирӯзии комил бо ин маризӣ қарор доранд. 

Пандемияи ҷаҳонӣ имтиҳоне шуд, ки халқи шарафманди тоҷик, аҳлонаву дастаҷамъона аз он гузаштанд. Ҳарчанд гурӯҳҳои фурсатталаб кӯшишҳои зиёди ҷудоиандозӣ ва ба бор овардани ихтилофро харҷ карданд, вале мисли ҳамеша номуроду шармсор шуданд. Коронавирус иттиҳоди мардумро қавитар кард. Шахсони саховатманду дорои имконоти молиявӣ ба ташаббусҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамроҳ шуда, дасти табибону ниёзмандонро гирифтанд.

То ҳол барои мо хабару гузорише дастрас нашудааст, ки дар дигар мамолики атрофу акноф неруҳои мухолифи давлатҳо ин бемории ҳамагирро барои ба даст овардани холҳои сиёсӣ васила қарор дода бошанд. Кори бешарафонае, ки ба ном “мухолифони” - и тоҷик, дар асл хоинони миллати тоҷик ба худ раво диданд. Чун марҳила ба марҳила ин бор ҳам тирашон ба хок мерафт, ҳамагуна маргу мир дар кишварро ба COVID-19 нисбат медоданд. Вале мардуми тоҷик ҳилаи ин гумроҳонро шинохтанд ва дигар ба хабару матолиби дасисаҷӯёнаашон рӯ наоварданд.

Дар ҳоле, ки мардуми шарифи мамлакатро рӯҳияи идона фаро гирифтаву ҳама аз ваҳдат ва файзу нусрати сулҳ мегӯянд, руҷӯи мо ба ин мавзӯъ ба он хотир аст, ки аз макру тавтеасозии гурӯҳи хуношоми наҳзатиҳо ғофил набошем ва сулҳу ваҳдати миллиро ба қимати ҷони худ ҳифзу гиромӣ дорем. 

 

Нигина РАҲМОН, “Ҷумҳурият”