logo

сиёсат

Тантанаҳои наврӯзӣ дар ноҳияи Данғара

Тантанаҳои идонаи ҷумҳуриявӣ бахшида ба ҷашни Наврӯзи хуҷастапай, ки имсол мақоми байналмилалӣ гирифт, 19 марти соли 2010 бо иштироки Президенти Ҷумҳурии Тоҷикистон Эмомалӣ Раҳмон ва Президенти Туркманистон Гурбонгулӣ Бердимуҳаммадов дар ноҳияи Данғараи вилояти Хатлон баргузор гардид. Ҳамин тариқ қисмати дуюми сафари давлатии меҳмони олимақом - Сарвари давлати Туркманистон Гурбонгулӣ Бердимуҳаммадов бо иштироки ӯ дар тантанаҳои ҷумҳуриявии Наврӯз дар ноҳияи Данғараи вилояти Хатлон идома ёфт.

Дар даромадгоҳи Данғара сарони ду давлати дӯсту бародар – Эмомалӣ Раҳмон ва Гурбонгулӣ Бердимуҳаммадовро роҳбарият ва аҳли ҷамоаи ноҳия бо шукргузорӣ аз фазои сулҳу осоиш, ваҳдати матини миллӣ, вусъати рӯзафзуни бунёдкорию созандагӣ ва ободонии ватани азиз истиқбол гирифтанд.
Мардуми хушзавқу салиқаи шаҳрак ва деҳоти ноҳияи Данғара ва дигар шаҳру ноҳияҳои кишвар аз даромадгоҳ то маркази ноҳия ва то ба  базмгоҳи бошукӯҳи наврӯзӣ дар ду канори роҳ  маҳсули касбу ҳунари мардумӣ, нӯшу неъматҳои моддӣ, ашёи ороишии рӯзгор, хӯришҳову шириниҳои гуногуни наврӯзӣ ва дигар маҳсулоти ниёзи ҳаррӯзаро ба намоиш бароварда буданд, ки аз мулки пурфайзу баракат ва фаровон аз сарватҳои моддию маънавӣ будани ноҳияи Данғара гувоҳӣ медиҳанд.
Сари ҳар қадам дегҳои ҷӯшони суманак, ки аз ороишот ва шириниҳои асосии наврӯзӣ ба шумор меравад, ба назар мерасид. Қобили таъкид аст, ки суманак бо иштироки занони сершумори соҳибҳунару кадбону дар муддати тӯлонӣ омода мегардад. Онҳо барои пухтани ин таоми нотакрори наврӯзӣ шаб то рӯз сурудхонӣ карда, ба ибораи худ «кафчаю дафча» мезананд, то чунин хӯриши лазизу хуштаъм ба дастархони идона пешкаш гардад.
Маҳсули ҳунари устоҳои чирадасти чӯбкор, оҳангарон, заргарон ва хусусан гулдӯзону зардӯзон аз ороишҳои асосии ин намоишгоҳи бошукӯҳи мардумӣ буданд.
Пешкаш намудани рақсу сурудҳои дилошӯби мардумӣ низ аз қисматҳои асосии намоишгоҳи бошукӯҳ гашт.
Дар таҳия ва пешкаши намоишгоҳ ва шеъру сурудҳои дилангез ҳамчунин намояндагони аҳли санъати миллии туркманзабонони Тоҷикистон низ иштироки фаъол доштанд, ки меҳмони олимақом Президенти Туркманистон Гурбонгулӣ Бердимуҳаммадов ва ҳайати ҳамроҳи ӯро басо хуш омад.
Президенти Ҷумҳурии Тоҷикистон Эмомалӣ Раҳмон ва Президенти Туркманистон Гурбонгулӣ Бердимуҳаммадов дар фазои тантанавӣ бо буридани лентаи рамзӣ  маркази Хуррамшаҳрро мавриди баҳрабардорӣ қарор доданд.
Бояд таъкид намуд, ки қисмати асосии ин маркази бошукӯҳи фароғатиро чойхонаи миллӣ ташкил медиҳад, ки бо истифода аз анъанаҳои меъмории бостонии ниёгон ва ороишоти замонавӣ бунёд ёфтааст. Дар саҳни ҳавлии чойхонаи миллӣ сарони давлатҳои Тоҷикистону Туркманистон ба нишони пойдорӣ ва абадияти дӯстию бародарии мардумони тоҷику туркман ва эҳтироми хоса ба иди Наврӯзи дилафрӯз яктоӣ ниҳоли ҳамешасабз шинонданд.
Чойхонаи миллии маркази фароғатии Хуррамшаҳр иборат аз якчанд толорҳои хурду бузург буда, бо усулҳои гуногуни аз ҳамдигар фарқкунанда ороиш ёфтаанд. Гуногунрангии ороишот то ба ҳадде аст, ки ягон гулу ороиши наққошӣ ва ё кандакорӣ такрор намешавад.
Дар ороиши толорҳо аз ҳунари волои устоҳои чирадасти чӯбтарош, сангтарош, гаҷкор, оинабандон, рассомону наққошон ва ғайра ба хубӣ истифода шудааст. Кандакориҳои рӯйи чӯб, санг ва гаҷ, ки бештарашон дар болои оина шинонда шудаанд, ҳар яке аз дигаре дилработаранд. Дар ороиши чойхона ҳамчунин осори меъмории шаҳрҳои қадимаи мардумони тоҷику форс мавриди истифода ва сайқалу такмил қарор гирифтаанд.
Сипас бо иштироки Президенти Ҷумҳурии Тоҷикистон Эмомалӣ Раҳмон ва Президенти Туркманистон Гурбонгулӣ Бердимуҳаммадов дар варзишгоҳи марказии ноҳияи Данғара, ки ба тозагӣ мавриди таҷдиду навсозӣ қарор гирифта, шумораи ҷойҳои нишасташ ба 10 ҳазор расонда шуд, намоиши бошукӯҳи театрикунондашуда ва консерти идонаи наврӯзӣ баргузор гашт.
Қабл аз оғози намоиш сарони ду давлат – Эмомалӣ   Раҳмон ва Гурбонгулӣ Бердимуҳаммадов суханронӣ намуда, ҳамагонро бо фарорасии иди Наврӯз, ки имрӯз ба ҷашни байналмилалӣ табдил ёфтааст, табрику таҳният гуфтанд.
Президенти Ҷумҳурии Тоҷикистон Эмомалӣ Раҳмон ба ифтихори меҳмони олимақом - Президенти Туркманистон Гурбонгулӣ Бердимуҳаммадов дар маркази фароғатии Хуррамшаҳри ноҳияи Данғара бо риоя аз расму ойини бостонии давлатдории ниёгон ва меҳмоннавозии хосаи тоҷикон зиёфати расмии наврӯзӣ орост ва бо ҳамин ин даргоҳи бошукӯҳи фарҳанги миллӣ бори нахуст мавриди баҳрабардорӣ қарор гирифт.
Бо анҷоми тантанаҳои бошукӯҳи наврӯзӣ имрӯз ҳамчунин барномаи сафари давлатии Президенти Туркманистон Гурбонгулӣ Бердимуҳаммадов ба поён расид ва нимаи дуюми рӯз меҳмони олимақом аз шаҳри Душанбе ба Ашхобод рафт.
Дар фурудгоҳи шаҳри Душанбе Президенти Туркманистон Гурбонгулӣ Бердимуҳаммадовро дар фазои тантанавӣ Президенти Ҷумҳурии Тоҷикистон Эмомалӣ Раҳмон гусел намуд.


Баёни ақида (0)    Санаи нашр:    №:    Мутолиа карданд: 518

28.02.2020


ҶАРАЁНИ ОМОДАГИҲО БА БАРГУЗОРИИ КОНФЕРЕНСИЯИ БАЙНАЛМИЛАЛӢ МАТРАҲ ШУД

ОҒОЗИ БУНЁДИ БОЗ ЯК ОСОИШГОҲ ДАР ГУЛИСТОН

ДАР НАМОИШГОҲИ БАЙНАЛМИЛАЛИИ «ИНТУРМАРКЕТ – 2020» ИМКОНИЯТҲОИ САЙЁҲИИ ТОҶИКИСТОН МУАРРИФӢ МЕГАРДАНД

ХАТМКУНАНДАГОНИ БАРНОМАИ ДАСТГИРИИ МАБЛАҒГУЗОРИИ ТИҶОРАТӢ СОҲИБИ ШАҲОДАТНОМА ШУДАНД

ҲАМКОРИИ БМТ ВА КОРПОРАТСИЯИ БАЙНАЛМИЛАЛИИ МОЛИЯВӢ

“ГАНҶИ СУХАН”. ҲАМОИШЕ, КИ МАЪРИФАТ МЕАФЗОЯД

ХУРОСОН ҲУСНИ ТОЗА МЕГИРАД

ҶОМИ КФО – 2020. "ХУҶАНД" БА МАРҲАЛАИ ГУРӮҲӢ РОҲ ЁФТ

AMAZON АВВАЛИН МАРКАЗИ САВДО БИДУНИ ХАЗИНА КУШОД

ӮЗБЕКИСТОН ВА УКРАИНА АЛОҚАИ РОҲИ ОҲАНРО БАРҚАРОР НАМУДАНИЯНД

ИТТИҲОДИ АВРУПО САНАИ МУЗОКИРОТ БО БРИТАНИЯРО ОИД БА ШАРИКӢ ГУФТ

ИМА: АФҒОНИСТОН БОЯД ДАР ФИКРИ ҚАТЪИ ҶАНГ БО "ТОЛИБОН" БОШАД

Ҷаҳон дар як сатр

26.02.2020


ҲАМОИШИ МУҲИМ ДАР КУМИТАИ ДАВЛАТИИ САРМОЯГУЗОРӢ ВА ИДОРАИ АМВОЛИ ДАВЛАТӢ

ДАНҒАРА – МИЗБОНИ ФЕСТИВАЛИ ФАРҲАНГИИ ҶАВОНОНИ ХОРИҶӢ

КИШОВАРЗӢ. НЕСТ КАРДАНИ ТУХМИИ ВАТАНӢ ХАТОИ НОБАХШИДАНИСТ

МАЪЮБОН КОРХОНАИ ҲАМРОЗ ДОРАНД

RABAT GRAND PRIX 2020. ТОҶИКИСТОНРО 7 ПАҲЛАВОН МУАРРИФӢ МЕКУНАД

25.02.2020


САФАРИ РАСМИИ СИРОҶИДДИН МУҲРИДДИН БА РОССИЯ

БАРРАСИИ МАСОИЛИ ТАЪСИСИ КОРХОНАҲОИ НАВИ САНОАТӢ

ДИД. БАРГУЗОРИИ ҲАМОИШИ МАЪРИФАТИЮ ТАРБИЯВӢ

ВАҲДАТ БА ИНТИХОБОТ ОМОДА АСТ

СУҒД. ФЕСТИВАЛИ ВИЛОЯТИИ "АТЛАСУ АДРАС" ТАНТАНА ДОРАД

"ИШҚИ МИНӮӢ" - И КАМОЛ БО ЗАБОНИ ОЛМОНӢ

МУБОРИЗА БАР ЗИДДИ МАЛАХ. ҶАЛАСАИ СИТОДИ ҶУМҲУРИЯВӢ

ГӮШТӢ. МУСОБИҚАИ ИНТИХОБИИ ОЛИМПӢ ДАР БИШКЕК ДОИР МЕШАВАД

24.02.2020


ГАРДИШИ МОЛ. ТАНОСУБИ СОДИРОТ НАЗАР БА ВОРИДОТ АФЗУД

РОҒУН. АФВШУДАГОН БО ҶОЙИ КОР ТАЪМИН МЕГАРДАНД

ГӮШТӢ. 4 МЕДАЛ АЗ ЧЕМПИОНАТИ ОСИЁ, АММО БЕ ТИЛЛО

ОЛИМОНИ БЕЛАРУС ДАР ШАҲРИ ХУҶАНД АРЧА МЕШИНОНАНД

ИМА ДАР АФҒОНИСТОН АМАЛИЁТИ ҲУҶУМРО ҚАТЪ СОХТ

МУШОВИРИ ТРАМП ОВОЗАҲОРО ОИД БА ОҒОЗЁБИИ «ДАХОЛАТИ РОССИЯ» БА ИНТИХОБОТ БЕБУНЁД ХОНД

ГОНЧАРУК: «УКРАИНАРО СОЗИШНОМА БО РОССИЯ АЗ БОЛОРАВИИ НАРХИ ГАЗ НАҶОТ ДОД»

ҶАҲОН ДАР ЯК САТР


Дар сомонаҳои дигари Тоҷикистон хонед