logo

иҷтимоиёт

 ИСТИҚЛОЛ ШАҲРЕСТ БО ЗОҲИР АВРУПОИЮ БО ҚАЛБ ОСИЁӢ


Аввалин бор ба ин шаҳр омаданамро ҳоло ҳам ба хубӣ дар ёд дорам. Тирамоҳи заррин дар ҷумҳурӣ ҳукмфармо буд. Рӯзе ба идораи "Ахбор"-и радиои Тоҷикистон, ки камина он ҷо фаъолият доштам, бонуи зебое бо мӯйҳои афзуни малларанг омаду худро муаррифӣ кард, ки аз радиои маҳаллии шаҳраки Табошар дар таҳияи чанд мусиқӣ барои ҳамоҳангсозии барномаҳо ба кумаки мо ниёз дорад. Бону бо як самимияти ба худ хос, бо меҳрубонии беандоза роҷеъ ба шаҳраки Табошар бо завқ ҳарф мезад. Баробари шунидани суханҳои самимии бону нисбати шаҳраки мазкур ҳамон лаҳза хоҳиши дидани ин шаҳрак дар ман пайдо шуд.
Охирҳои моҳи октябр бо сафари эҷодӣ ба вилояти Ленинобод (ҳоло Суғд) омада,  нахуст аз кору бори пахтакорон, чорводорону бинокорони вилоят чанд сабти овоз ба иҷро расондам. Ва дигар тасмим гирифтам, он орзуи дар Душанбе доштаамро амалӣ созам. Воқеан ҳам, аз қадамҳои нахусти ворид ба ин шаҳрак (он вақт мақоми шаҳр)-ро (надошта дар тобеияти шаҳри Чкалов - ҳоло Бӯстон буд) кӯчаву хиёбонҳояш, биноҳои истиқоматии бунёд аз сангҳояш  касро ба худ ҷалб мекард. Бе муболиға дар назарам чунин намуд, ки шояд  ба яке аз шаҳрҳои ҷумҳуриҳои назди Балтик ва ё Олмон уфтода бошам. Воқеан ҳам, гуфтаҳои он ҳамкасби табошарӣ тасдиқи худро аз будааш, ҳатто зиёдтар меёфтанд. Бо истифода аз фурсат бо нафарони касбу корашон зиёде суҳбат карда, аз таърихи пайдоиши шаҳр маълумотҳои гуногуну ривоятҳои рангин  шунидам, ки ҷолибу муассиркунанда буданд. Биноҳои истиқоматии сангин бо як меъмории хосаи Ғарбӣ сохтаву ороиш ёфтаанд, ки дар фасли зимистон гарму дар тобистон салқин аст. Имрӯз ҳам  ҳар меҳмони ба ин ҷо омада аз дидани ин  биноҳо ба ваҷд меояд. Онҳо баъди анҷоми Ҷанги Бузурги Ватанӣ, солҳои 1947-1949 аз тарафи асирони ҳарбии олмонитабор сохта шудаанд, аммо, аслан, таъсисёбии Табошар (ё ба қавли баъзе зиёиён Тобоншаҳр) ба соли 1937 рост меояд.
Боғи фароғативу қасри фарҳангу маҷмааи варзишиаш қалбҳоро тасхир мекарду  ба чашм дилрабо мерасиданд, ки он вақт  ҳатто дар пойтахт- шаҳри Душанбе монанд ба он иншоотҳои муҳташам кам ба мушоҳида мерасиданд, ба ҷуз бинои Театри опера ва балети ба номи С. Айнӣ. Мағозаҳо пур аз анвои камёфт (даҳҳо намуди озуқа: гӯштӣ, ширинӣ, сарулибосҳо бо мудҳои ҷолиб). Пасон маълум шуд, ки Табошар он вақт дар тавозуни шаҳри Чкалов (имрӯз Бӯстон) буда, таъминоти маводи озуқаворӣ ва саноатӣ аз ҷониби Маскав сурат мегирифтааст. Ин шаҳр бо корхонаи азиму номдораш “Заря Восток” дорои аҳамияти бузурги ҳарбӣ - стратегӣ дошта, дар тамоми собиқ Иттиҳоди Шӯравӣ машҳур шудааст.
Аммо имрӯз ҳадаф аз ин навиштаҳо дигар аст. Инак, ин шаҳрак ҳоло шаҳр ба шарофати соҳибистиқлолӣ номи Истиқлолро ба худ гирифтааст, ки талаботи давру айём аст. Мо, тоҷикистониҳо бояд бо муносибати хубу ҷиддии шаҳрдорӣ  ин меъмориро ҳифз ва насли наврасро дар рӯҳияи баланди фарҳанги шаҳрдорӣ тарбия карда собит созем, ки миллати тоҷик  худ чун меросбарони  сосониву кӯшонӣ ва сомониёни машҳур боз ҳам дар ин самт ба дастовардҳои бузург ноил гардида, сарватҳои маданиву таърихиамонро афзун бинамоем.
Президенти мамлакат муҳтарам Эмомалӣ Раҳмон дар ҳар сафари худ ба вилояти  Суғд, аз ҷумла ба шаҳри Истиқлол, рӯ ба сокинон оварда, даъват менамуданд, ки  шаҳрро дар даврони соҳибистиқлолӣ аз пештарааш ҳам дида, сарсабзу хуррам гардонем, корхонаҳои нави замонавӣ таъсис дода, шаъну шуҳрати қаблии онро эҳё кунем. Албатта, дар ин замина, аллакай, корҳои  зиёде дар ин фосилаи вақт анҷом дода шудаанд. Ҳоло набзи Истиқлол бомаром мезанаду маҷрои мувофиқи худро дарёфтааст. Кӯчаҳову хиёбонҳо аз нав  таҷдиду  мутобиқ ба шароити муосир мешаванд. Шаҳр чароғону рӯшану мунаввар шудааст. Мардум аз бунёдшавии силсила коргоҳҳои хурду бузург, аз ҷумла корхонаи азими металлургӣ бо иқтидори 50 ҳазор тонна руҳ ва 50 ҳазор тонна сурма  рӯҳу илҳоми тоза гирифта, самимона талош менамоянд, ки шаҳрашон боз ҳам ободу зеботар гардад. Раиси ба тозагӣ таъйиншудаи шаҳр Давронҷон Зоҳидзода, аз ҷумлаи он роҳбарони  замони муосир аст, ки таҷрибаи ғаниву хуби роҳбариро бо диди наву ҷаҳонбинии нав дорад. Имрӯз метавон дар заминаи Солҳои рушди деҳот, сайёҳӣ ва ҳунарҳои мардумӣ Истиқлолро ба яке аз мавзеъҳои дилработарини кишвар мубаддал гардонд. Даҳҳо хатсайрҳо созмон дода, таваҷҷуҳи мардуми кишвар ва хориҷиёнро ба ин шаҳр ҷалб кард. Аз ин тариқ метавон маҳорати ҳунармандони маҳаллиро, ки аз пашми бузу гӯсфанд  қолину намадҳои ҷолибу рангин, алоча мебофанд, муаррифӣ намуд. Яъне, имрӯзу фардои мусаффо ва дурахшони Истиқлол ба мавқеи фаъолона, ҳисси ватандӯстии ҳар яки бошандагони шаҳр марбут аст. Ободу шодмон бош, шаҳри Истиқлол, шаҳри орзуҳо!
Ҷовиди АШТӢ, “Ҷумҳурият”


Баёни ақида (0)    Санаи нашр: 12.01.2021    №: 7    Мутолиа карданд: 101
19.01.2021


СҶТ-РО ДАСТРАСИИ НОБАРОБАРИ ДАВЛАТҲО БА ВАКСИНА САХТ НИГАРОН НАМУДААСТ

ҶАҲОН ДАР ЯК САТР

ХАТЛОН. СОДИРОТИ БАРЗИЁДИ МАҲСУЛОТИ КИШОВАРЗӢ

“САФЕДДАРА”. ЯТИМОНИ КУЛЛИ ВИЛОЯТИ ХАТЛОН АЗ БЕҲТАРИН МАВЗЕИ САЙЁҲӢ ДИДАН КАРДАНД

ТАҚДИМИ КИТОБИ «ТОҶИКОН» БА СОКИНОНИ НОҲИЯИ ИШКОШИМ

ҲИСОР. ХИЗМАТРАСОНИИ ТИББӢ РӮ БА БЕҲБУДӢ ДОРАД

15.01.2021


ҶАМЪБАСТИ ОЗМУНИ “ОМӮЗГОРИ СОЛИ ТОҶИКИСТОН – 2020”

ҶАЛАСАИ СИТОДИ КОРӢ ОИД БА ТАҶЛИЛИ 30-СОЛАГИИ ИСТИҚЛОЛИЯТИ ДАВЛАТӢ БАРГУЗОР ШУД

МАОРИФ. НАТИҶАГИРӢ АЗ ФАЪОЛИЯТИ ВАЗОРАТ

НАВИДҲОИ ФАРҲАНГ

ТОҶИКИСТОН. БОЗ ЯК ШИРКАТ БА БОЗОРИ САЙЁҲӢ ВОРИД ГАРДИД

РӮЙДОДҲОИ ИЛМӢ

12.01.2021


 ҶДММ «ММК АГРО» МАЙДОНИ ГАРМХОНАИ ИННОВАТСИОНИРО МЕАФЗОЯД

 РАШТ: МУЛОҚОТИ  РАИСИ  МАҶЛИСИ НАМОЯНДАГОН  БО  ИНТИХОБКУНАНДАГОН

 ШАҲРИ ГУЛИСТОН: АВҶИ СОХТМОНИ ИНШООТИ ҶАШНӢ

 ТАФСИЛОТИ ЯК ҶИНОЯТ. Ё ЧАРО «ҚОЗӢ»-И АВФШУДА ПАСИ ПАНҶАРА РАФТ?

 ТАЪСИСИ КОРХОНАИ НОДИРИ ИЛМИВУ ИСТЕҲСОЛӢ

 ТАЪМИНИ МАРКАЗҲОИ ИЛМӢ ВА МУАССИСАҲОИ ТАЪЛИМӢ БО РЕАКТИВҲОИ КИМИЁӢ

 ПЕШНИҲОДИ БОСТОНШИНОСОН БА ЮНЕСКО

08.01.2021


ВОХӮРИИ МАҲМАДТОИР ЗОКИРЗОДА БО СОКИНОНИ НОҲИЯИ САНГВОР

ДАВРИ ҶУМҲУРИЯВИИ ОЗМУНИ «МУРАББИИ СОЛИ ТОҶИКИСТОН – 2020» ОҒОЗ ГАРДИД

НАВИДҲОИ ФАРҲАНГӢ

МИЁНИ ТОҶИКИСТОНУ ӮЗБЕКИСТОН БОЗ ЯК БУНГОҲИ НАЗОРАТӢ КУШОДА ШУД

ҶАҲОН ДАР ЯК САТР

ДУШАНБЕ. ОЗМУНИ МАЪРИФАТАФЗО ҶАМЪБАСТ ШУД

БМТ АЗ ИҚДОМИ НАҶИБИ САРВАРИ ДАВЛАТ ҶОНИБДОРӢ КАРД

07.01.2021


ДАНҒАРА. ВУСЪАТИ КОРҲОИ НИҲОЛШИНОНӢ

ВАРЗИШ

САТҲИ ҶАҲОНИИ ФАҚР БОРИ АВВАЛ ДАР 22 СОЛИ ОХИР БОЛО РАФТ

ҶАҲОН ДАР ЯК САТР

РУЙДОДҲОИ ИЛМӢ

06.01.2021


ТАҚДИМИ ТЕХНИКА БА КИШОВАРЗОНИ НОҲИЯҲОИ ДЕВАШТИЧ ВА ШАҲРИСТОН

СУҒД. 92 ИНШООТИ ТАНДУРУСТӢ БА ИСТИФОДА ДОДА ШУД

ҲАР КӢ ХАНДОНАД ЯТИМИ ХАСТАРО...

ПУТИН ВА МЕРКЕЛ МАСЪАЛАИ ИСТЕҲСОЛИ ВАКСИНАИ ЗИДДИ COVID-19 - РО БАРРАСӢ КАРДАНД


Дар сомонаҳои дигари Тоҷикистон хонед