Нашрияи расмии Тоҷикистон

иҷтимоиёт

Раиси вилоят қабули шаҳрвандонро дар маҳалҳо ба роҳ монд

Шанбеи гузашта раиси вилояти Хатлон Ғайбулло Афзал қабули шаҳрвандонро дар ноҳияи баландкӯҳи Шӯрообод ва шаҳри Кӯлоб ба роҳ монд. Баҳри таъҷилан мавриди ҳаллу фасл қарор додани талабу дархости мардум дар ин чорабинӣ раисони шаҳру ноҳия, муовинони онҳо, раисони деҳот ва дигар шахсони масъул ширкат доштанд.
Шаҳрвандон ба раиси вилоят дар хусуси ба онҳо додани замин барои корҳои кишоварзӣ, бунёди манзили истиқоматӣ, таъмин бо оби тоза, таъсиси марказҳои фарҳангӣ дар деҳоту маҳаллаҳо муроҷиат карданд. Ғайбулло Афзал ба онҳо мужда дод, ки бо фармони Президент Эмомалӣ Раҳмон бо ин мақсад дар ҳамаи ноҳияҳо барои бунёди манзил замин ҷудо карда мешавад. Ва дар асоси низоми маъмул эҳтиёҷмандон ба замин таъмин мегарданд.
Дар гуфтугӯи ошкоро муроҷиаткунандагон ба раиси вилоят аз амалҳои худсаронаю бемасъулиятонаи иддае аз кормандони ҳифзи ҳуқуқ, мансабдорони зинаҳои гуногун шикоят намуданд. Онҳо сабаби асосии аз сел зиён дидани деҳаҳои ҷамоатҳои деҳоти Даҳана ва Зиракиро натиҷаи хунукназарии роҳбарони хоҷагиҳо ва сари вақт таъмир надидани обравҳо арзёбӣ карданд. Шикояти Ғулом Сафаров бошад, аз ваҷҳи он буд, ки гӯё писари бегуноҳашро кормандони ҳифзи ҳуқуқ бо тӯҳмат ба муҷозот кашидаанд. Ба гуфти ӯ писараш ҳеҷ гоҳ ба маводи мухаддир сару кор надошта бошад ҳам, ду сол боз зиндонист. Ба муроҷиати бисёркаратааш мақомоти тафтишот беэътиноӣ намуда, танҳо бо гардонидани ҷавобҳои аз сар соқиткунанда корашонро иҷрошуда мешуморанд.
Раис баъди шунидани арзи Ғ. Сафаров ваъда дод, ки барои ошкор сохтани ҳақиқати ҳол ва ҳақро ба ҳақдор расонидан чора меандешад.
ӯ баъди қабули шаҳрвандон изҳор намуд, ки воситаи аз ҳама муассири аз байн бурдани норасоиҳо, ошкор сохтани камбудиҳо мавриди ҳаллу фасл қарор додани масоили доғи рӯз ва мушкилоти иҷтимоӣ мебошад.
- Мо дар оянда низ бо мардум тез-тез вохӯриҳо доир намуда, бо машварату ҳамбастагӣ раванди рушди устувори ҷомеаро пайгирӣ ва таъмин хоҳем кард, - гуфт раиси вилояти Хатлон Ғайбулло Афзал.

Ғ. ҲАЛИМОВ,
«Ҷумҳурият»

Баёни ақида (0)

Дар сомонаҳои дигари Тоҷикистон хонед