Нашрияи расмии Тоҷикистон

мулоқотҳо

Мӯҳлати сафирии Тсзо Сюелян анҷом пазируфт

7 июл Президенти Ҷумҳурии Тоҷикистон Эмомалӣ Раҳмон Сафири фавқулодда ва мухтори Ҷумҳурии Мардумии Чин дар Тоҷикистон Тсзо Сюелянро бинобар анҷом ёфтани мӯҳлати сафириаш дар кишвари мо ба ҳузур пазируфт.
Сарвари давлат Эмомалӣ Раҳмон ба фаъолияти сесолаи Тсзо Сюелян ба ҳайси сафири Ҷумҳурии Мардумии Чин дар Тоҷикистон баҳои баланд дод. Таъкид гардид, ки дар ин давра дар самти татбиқи лоиҳаҳои сершумори Тоҷикистону Чин, хусусан дар соҳаҳои энергетика, саноати кӯҳӣ ва нақлиёту коммуникатсия, ки аз самтҳои муҳими ҳамкории ду кишвар ба шумор мераванд, корҳои зиёд ба сомон расиданд.
Тсзо Сюелян дар навбати худ изҳор дошт, ки минбаъд низ баҳри таҳким ва густариши минбаъдаи ҳамкории гуногунҷанбаи ду кишвар ҷаҳду талоши худро дареғ нахоҳад дошт.
www.president.tj

Тсзо Сюелян, Сафири фавқулодда ва мухтори Ҷумҳурии Мардумии Чин дар Ҷумҳурии Тоҷикистон, баъд аз анҷоми мулоқот бо Эмомалӣ Раҳмон, Президенти Ҷумҳурии Тоҷикистон, ба намояндагони воситаҳои ахбори омма гуфт, ки дар зарфи се соли фаъолияти дипломатиаш ҳамкориҳои гуногунҷанбаи ҳар ду кишвар ба марҳалаи сифатан нав ворид шуданд.
Мо дар ин давра шоҳиди татбиқи як силсила лоиҳаҳои стратегӣ дар Тоҷикистон гаштем, ки барои ман ҳамчун сафир шарафи бузург аст.
Дипломати чиноӣ аз он изҳори хушҳолӣ кард, ки Президенти Ҷумҳурии Тоҷикистон ба фаъолияти сесолаи ӯ баҳои баланд додааст. - Ҷаноби Олӣ,-гуфт сафир,- зикр карданд, ки Тоҷикистон барои ман Ватани дуюм аст. Ва ман дар ҷавоб тазаккур додам, ки баъди аз Тоҷикистон ба Чин баргаштан, новобаста аз он, ки дар куҷо ифои вазифа менамоям, барои рушди устувори иқтисоди кишвари шумо ва таҳкиму тавсеаи муносибатҳои дуҷонибаи байни давлатҳоямон талош хоҳам кард.
Тсзо Сюелян дар робита ба фаъолияти намояндагиаш аз таваҷҷӯҳ ва дастгирии Сарвари давлат Эмомалӣ Раҳмон ва Ҳукумати ҷумҳурӣ ситоиш кард. ӯ дар сӯҳбат бо хабарнигорон ба Президенти мамлакат ва мардуми кишвар саодатмандӣ хоста, аз фардои дурахшони Тоҷикистони соҳибистиқлол изҳори хушбинӣ намуд.

Додоҷон Рӯзиев,
«Ҷумҳурият»

Баёни ақида (0)

Дар сомонаҳои дигари Тоҷикистон хонед