logo

суханрониҳо

Суханронии Эмомалӣ Раҳмон, Президенти Ҷумҳурии Тоҷикистон, дар маросими ифтитоҳи муҷассамаи Нишони давлатӣ, шаҳри Душанбе, 25 августи соли 2011

Ҳозирини гиромӣ!
Ҳамватанони азиз!

Дар остонаи ҷашни бузурги 20-умин солгарди Истиқлолияти давлатии Ҷумҳурии Тоҷикистон ифтитоҳ гардидани боз як иншооти муҳим - муҷассамаи Нишони давлатӣ, ки рамзи ифтихору эҳтироми мо нисбат ба муқаддасоти миллӣ ва нишонаи сарбаландиву сарфарозии халқи мо мебошад, барои ҳар кадоми мову шумо рӯйдоди басо муҳиму хотирмон аст.
Ба муносибати дар ин мавзеи навбунёд, вале хеле зебои пойтахти мамлакат бо азамати ба худ хос дар баландии 45 метр эъмору ҷойгир гардидани Нишони давлатии Тоҷикистон - рамзи озодиву истиқлол ва давлату давлатдории мустақил, пойдориву ҷовидонии муқаддасоти миллиамон ҳамаи   шумо - ҳозирини гиромӣ ва тамоми мардуми шарифи Тоҷикистонро самимона табрик мегӯям.  Ва ба ҳамаи мутахассисону бинокороне, ки дар ин иқдоми ватандӯстона саҳм гузоштаанд, изҳори сипос менамоям.
Дар ҷаҳони муосир ҳар як давлату миллат бо рамзҳои давлатӣ ва муқаддасоти миллӣ, аз ҷумла Конститутсия, Нишон, Парчам, Суруди миллӣ ва пули миллӣ шинохта мешавад, яъне ин нишонаҳо муаррификунандаи кишвари соҳибистиқлол дар арсаи байналмилалӣ мебошанд.
Нишон ва нишонгузорӣ суннати бисёр қадима буда, дар миёни халқҳои олам бо мақсади муайян намудани қавму аҷдод, миллату халқият, мансубияти маҳаллу моликият тасвирҳои гуногуни рамзӣ мавриди истифода қарор доштааст ва баъдан бо пайдоиши давлатҳо истифодаи рамзҳои фарқунандаи ҳар як давлату миллат маъмул гардидааст.
Нишони давлатӣ баёнгари соҳибихтиёрии давлат буда, дар дохил ва хориҷи он тавассути ҳуҷҷатҳои расмии давлатӣ ягонагӣ ва мустақилияти давлат, шахсияти шаҳрвандон ва моликияти кишварро собит менамояд ва бинобар ин, яке аз муқаддасоти ҳар як давлату миллат ба ҳисоб меравад.
Мо низ бо ифтихори бузург аз Ватану ватандорӣ ва арҷгузорӣ ба рамзҳои давлати соҳибихтиёрамон муҷассамаи Нишони давлатиамонро бунёд намуда, аз ҳамин лаҳза онро барои тамошову зиёрати мардуми кишвар ва меҳмонони он ифтитоҳ мебахшем.
Таърих  халқи тоҷикро борҳо ба имтиҳону ҷонбозиҳои зиёд рӯ ба рӯ намудааст ва мардуми мо ҳар дафъа мушкилоти ба сараш омадаро бо матонату таҳаммул, арҷгузорӣ ба муқаддасоти олии сарзамини аҷдодӣ,  хоку оби он ва гузашта аз ин,  ҳувияти миллии худро ҳамчун миллати куҳанбунёду соҳибтамаддун ҳифз кардааст.
Тасвиру рамзҳои Нишони давлатии мо баёнгари таърихи қадима ва иқлими камназири мамлакат буда, кӯҳҳои сарбаланд бо қуллаҳои худ  ишора ба кӯҳсори тоҷик, шӯълаи хуршед нишонаи иқлими офтобии кишвар, шаҳодати нури зиё ва равшаниву шукуфоӣ, тоҷи зарин рамзи фарру шукӯҳ бар сари миллат ва ҳафт ситора гувоҳи ҳафт иқлим ва орзуву омоли нек ба сӯи ояндаи ободу осуда мебошанд.
Ҳамзамон бо ин, хӯшаҳои гандум ва ниҳоли пахтаи бо парчами кишвар печонидашуда ҳамчун нишонаи ризқу баракат, сарсабзиву пояндагии миллату давлат ва китоби бозшуда чун гувоҳи хиради азалии миллати куҳанбунёди мо аз таъриху тамаддун ва арҷгузорӣ ба илму дониш шаҳодат медиҳанд.
Таваллуди кӯдаки навзоду номаи камоли боргоҳи илму маърифат, ҳуҷҷату шаҳодатномаҳои шаҳрвандиву асноди байналмилалии давлат бо тасвири Нишони миллӣ тасдиқ ёфта, пули миллӣ, шиноснома ва дигар асноде, ки ба шаҳрвандони Тоҷикистон дода мешаванд,  нашрияҳои давлатии Ҷумҳурии Тоҷикистон, сутунҳои марзӣ ва гузаргоҳҳои сарҳади давлатӣ, ҳуҷҷатҳои тасдиқкунандаи мукофотҳои давлатӣ ва либоси расмии шахсоне, ки дар хизмати ҳарбӣ ё хизмати дигари давлатӣ қарор доранд, бо таҷассуми нишони давлатӣ шаҳодати соҳибихтиёрии давлати мо мебошанд.
Ҳоло кишвари мо бо даҳҳо давлати хурду бузурги ҷаҳон робитаҳои дӯстона ва ҳамкориҳои мутақобилан судмандро ба роҳ монда, дар аксари онҳо намояндагиҳо ва сафоратхонаҳои Ҷумҳурии Тоҷикистон фаъолият доранд ва Нишону дигар муқаддасоти Ватанамон дар ин кишварҳои олам муаррифгари доимии давлати тоҷикон мебошанд.
Бист соли Истиқлолияти давлатии Ҷумҳурии Тоҷикистон, ки мову шумо имрӯзҳо бо ифтихори бузургу номуси баланди ватандорӣ дар остонаи таҷлили он қарор дорем, дар таърихи навини мо давраи созандагиву бунёдкорӣ, рушди иқтисодиву иҷтимоии кишвари азизамон ва густариши муносибатҳои иқтисодиву иҷтимоии он бо дигар мамолики дунё мебошад. Яъне мо имрӯз ба шарофати истиқлолият соҳибватану соҳибдавлат ва соҳибихтиёр ҳастем.
Бинобар ин, мо бояд ба шукронаи озодиву соҳибихтиёрӣ ба қадри истиқлолият ва муқаддасоти Ватан, аз ҷумла Нишону Парчам ва Суруди миллӣ расем ва ҳамеша дар хотир дошта бошем, ки бидуни ин муқаддасот ва рамзҳо мо наметавонем давлат ва мардуми соҳибтамаддуни хешро ба ҷомеаи ҷаҳонӣ муаррифӣ намоем.
Мо бояд ин нуктаро ба кӯдакону наврасон ва ҷавонони кишвар, ки созандагони ояндаи Ватан мебошанд, ҳамеша талқин намоем ва онҳоро дар рӯҳияи ватандориву ватанхоҳӣ, худогоҳиву худшиносӣ ва ифтихори миллӣ тарбия кунем. 
Рамзҳои давлатӣ ҳастӣ ва ифтихори миллии мо буда, гувоҳи барҷастаи истиқлолияти давлатӣ, таҷассумгари ифтихори миллӣ ва ору номуси ватандорӣ мебошанд.
Бо камоли ифтихор ва эҳтирому садоқат ба яке аз рамзҳои муҳими миллӣ - Нишони давлатӣ ифтитоҳи  иншооти мазкурро дар пойтахти кишвари соҳибистиқлоламон бори дигар ба ҳамаи шумо ва кулли ҳамватанони бурунмарзиамон самимона табрик гуфта, ба хурду бузурги Ватан рӯзгори нек ва ояндаи босаодатро  орзу менамоям!
Ва пешниҳод менамоям, ки аз ҳамин лаҳза ин мавзеъ Майдони нишони давлатӣ номгузорӣ шавад.
Бигзор осмони софу дурахши ситораҳои Нишони миллӣ ҳамчун рамзи ваҳдату устувории давлату миллат абадан поянда монад ва азамату шукӯҳи рамзҳои давлатии Тоҷикистони озоду соҳибихтиёр дар арсаи олам мояи ифтихор ва сарфарозии ҳар як фарди кишвар бошад!
Хонаободу сарбаланд бошед, ҳамдиёрони азиз!


Баёни ақида (0)    Санаи нашр:    №:    Мутолиа карданд: 927

14.10.2019


Роҳи Помир ба панҷгонаи зеботарин роҳҳои дунё шомил гардид

Дар Ҷопон аз тӯфони «Хагибис» 33 нафар ҳалок гашт

Трамп маблағеро ном бурд, ки Вашингтон дар ҷангҳои Шарқи Наздик масраф кардааст

Астронавти амрикоӣ рекорди ба кайҳон баромадани кайҳоннавардони русро пас мегузорад

Ҷаҳон дар як сатр

11.10.2019


Боздиди қариб 8 миллион нафар аз ғурфаи Тоҷикистон дар намоишгоҳи Чин

СААД дар Бишкек вокуниши муштарак ба ҳолатҳои фавқулодаро баррасӣ намуд

Ҷаҳон дар як сатр

10.10.2019


Ёддошти тафоҳум ба имзо расид

Вохӯрии вазирони корҳои дохилии Тоҷикистону Россия

Душанбе ва Димишқ бозгашти тоҷикистониёнро аз Сурия баррасӣ намуданд

Меркел ва Ҷонсон оид ба Brexit ба мувофиқа омада натавонистанд

Барнаул лидерҳои ҷавони кишварҳои Осиёро гирд овард

Ҷаҳон дар як сатр

08.10.2019


ТОҶИКОБОД. 40 НАФАР БА САФИ ҚУВВАҲОИ МУСАЛЛАҲ ПАЙВАСТ

Мулоқоти Қоҳир Расулзода бо роҳбарони ҳайатҳои давлатҳои аъзои САҲА

Ҳамоиш ба муносибати Рӯзи забони давлатӣ дар Тошканд

Бизнес - форуми сайёҳии Тоҷикистону Қирғизистон

СММ амнияти кӯдакони Афғонистонро боиси нигаронӣ хонд

Бонки ҷаҳонӣ Тоҷикистонро ба рӯйхати кишварҳои ислоҳотгар ворид намуд

Ҷаҳон дар як сатр

07.10.2019


ВМКБ. Нақшаи даъват иҷро шуд

ҲИСОР. Ташкили аввалин бозори минтақавии ҳунармандӣ

Ихтирои доруи заъфи дилу раг дар Канада

Сарвари Ӯзбекистон санҷиши фаъолияти сомонаҳои мақомоти давлатиро дархост намуд

ҶХД-и Корея музокирот бо ИМА - ро то охири сол қатъ кард

Дар чор шаҳри калони Россия амали террористӣ пешгирӣ гардид

Ҷаҳон дар як сатр

03.10.2019


Путин: «ИИАО бояд бо СҲШ ва АСЕАН иртиботи қавӣ дошта бошад»

Прокурорҳои генералии СҲШ мубориза бо нашъафурӯшӣ ва қочоқро баррасӣ намуданд

Таъкиди сарвазири Гурҷистон аз зарурати беҳсозии муносибат бо Россия

Ҷаҳон дар як сатр

01.10.2019


Тоҷикистон 48 зиндониро ба Афғонистон интиқол дод

Намояндагони комиссияи Аврупо барои музокирот ба Беларус мераванд


Дар сомонаҳои дигари Тоҷикистон хонед