logo

энергетика

«Помир Энерҷӣ» ғами худро мехӯрад ё мардумро?

Ба рӯзномаи «Ҷумҳурият»  аз номи Давлатёр Азизов, сокини деҳаи Қалъаи Ҳусайни ноҳияи Дарвоз, зери унвони «Фиребу найрангҳои зиёда аз 10-солаи «Помир Энерҷӣ» мактуби шикоятӣ расид.
Муаллифи нома зикр намудааст, ки онҳо барқро кам, сарфакорона истифода баранд ҳам, ба ҳар сокини деҳа ҳар моҳ Ҷамъияти саҳомии кушодаи «Помир Энерҷӣ», ҳисобварақа фиристода, аз 99 сомонӣ то 105 сомонӣ маблағи пардохтшаванда талаб менамояд. Аҷоиботи кор дар он аст, ки оила калон бошад ҳам, 99 сомонӣ менависанд, хурд бошад ҳам. Масалан, дар ҳисобварақи моҳи май ба Ҳиммат Икромов, Эмомхӯҷа Шохӯҷаев, Шомурод Саидмуродов ҳаққи истифодаи барқ ба ҳар яке 99 сомонӣ таъин шудааст. Ҳисобварақи дигар аҳолии деҳа низ чунин аст. Яъне хоҳ зиёд, хоҳ бо сарфа сӯзӣ як хел маблағ мепардозӣ.
Нозири барқи Ҷамоати деҳоти Сағирдашт боре ҳам ба ҳисобкунакҳои барқӣ таваҷҷуҳ зоҳир намесозад ва рақамҳоро дар ҳисобварақ тахминӣ менависад ва боз дӯғу даранг мекунад, ки маблағро дар тӯли 5 рӯз напардозем, барқро «мебурад».
Мактуби шикоятиро барои баррасӣ ба ҶСК «Помир Энержӣ» фиристодем. Менеҷери оид ба робита бо ҷомеаи ҷамъияти мазкур Абдулло Амонбеков бо муҳтавои нома шинос гашта, чунин посух дод:
-Яке аз масъалаҳои муҳимтарине, ки ба таври ҳамешагӣ дар маркази диққати роҳбарият ва мутахассисони «Помир Энерҷӣ» қарор дорад, таъмин намудани муштариён, аз ҷумла сокинони Ҷамоати деҳоти Сағирдашт бо ҳисобкунакҳои замонавии барқӣ мебошад.
Дар Ҷамоати деҳоти Сағирдашт 626 хоҷагӣ иқомат дошта, аз тарафи «Помир Энерҷӣ» ҳанӯз моҳи сентябри соли 2009 барои 432 муштарӣ ҳисобкунакҳои электронии навъи «Сайман»-и аз стандарти давлатӣ гузашта насб карда шуданд. Вале ҷиҳати набудани маблағи зарурӣ барои дастрас кардани сими (кабели) мувофиқ, қуттиҳои махсус, қатъкунакҳои худкор ва дигар лавозимоти зарурӣ ва хеле зиёд будани қарздории муштариён аз ҳисоби истифодабарии қувваи барқ истифодабарии онҳо мавқуф афтод. Ниҳоят дар соли 2011 маҳз дурӣ ва душворгузарии водии Сағирдаштро ба инобат гирифта, дар деҳаҳои калонтарин - Сайдон ва маркази водӣ 110 дона ҳисобкунакҳои электронӣ насб гашта, тамоми ҳисобу китоби сарфиёти барқ мувофиқи нишондоди онҳо амалӣ гардид. Вале дар деҳаҳои дигар, аз ҷумла дар деҳаи Қалъаи Ҳусейн ҷиҳати ба талабот ҷавобгӯ набудани лавозимоти зарурӣ барои ҳисобкунакҳо (сими кабелии мувофиқ, қуттиҳои махсус барои нигоҳдории ҳисобкунакҳо, қатъкунакҳои худкор ва хеле зиёд будани қарздории муштариён) истифодабарии онҳо ба роҳ монда нашуд.
Аз ин лиҳоз ҳаҷми барқи ҳар моҳ истифодашуда аз рӯи ҳисобкунаки умумӣ гирифта шуда, аз он талафот ба андозаи 12,8% тарҳ карда, дар байни муштариён аз рӯи ҳаҷми истифодабарӣ тақсим карда мешавад. Бояд гуфт, ки ҳаҷми истифодабарии қувваи барқ дар ҳар як трансформатор ҳар хел аст ва ҳангоми тақсимот ҳаҷми барқи истифодашуда ва маблағи пардохтшаванда низ ҳар хел аст. Масалан, се нафар муштарӣ Ҳиммат Икромов, Шомурод Саидмуродов ва Эмомхӯҷа Шоҳхӯҷаев аз як трансформатор қувваи барқ гирифта, ба онҳо дар моҳи майи соли 2013 ба андозаи 757,00 кВт-с ба маблағи 99,02 сомонӣ ва ба Давлатёр Азизов (муаллифи мактуб), ки тавассути трансформатори дигар аз барқ таъмин мегардад, дар моҳи майи соли 2013 барои истифодабарии 807кВт-с қувваи барқ ҳисобварақ ба маблағи 105,56 сомонӣ пешниҳод гаштаанд.
Вале дар моҳи январи соли 2013 ҳар яке аз муштариёни номбурда ҳамагӣ 305 кВт-с қувваи барқро истифода карданд, аз ин рӯ, ба онҳо ҳисобварақ барои пардохтани 16,14 сомонӣ пешниҳод шуда буд.
Чунин тарзи ҳисоббаробаркунӣ ба талаботи сархати 3 ва 4 - и банди 5.5.6-и “Қоидаҳои истифодаи қувваи барқ ва гармӣ”, ки аз тарафи Ҳукумати Ҷумҳурии Тоҷикистон 6 марти соли 1998, таҳти рақами 84 тасдиқ шудааст, мувофиқ аст. Дар ин банд, аз ҷумла омадааст, ки «Назорати кори дурусти ҳисобкунакҳои барқии назоратӣ, сабти нишондиҳандаҳои онҳо ва барои истифодаи қувваи барқ байни якдигар баробар кардани ҳисоб вазифаи худи истиқоматкунандагон мебошад.
Ташкилоти таъминкунандаи барқ дар байни муштариёне, ки қувваи барқро ба воситаи ҳисобкунаки умумӣ истифода мебаранд, ҳеҷ гуна ҳисобу китоб намегузаронад... ” Яъне ширкат метавонад дар тақсимоти барқи истифодашуда тамоман иштирок накунад ва ин корро худи сокинон, ки андозаи истифодабарии барқ аз ҷониби ҳар як хоҷагӣ барои худашон беҳтар маълум аст, дар байни худашон ҳаллу фасл намоянд.
Чанд рӯз қабл ба анбори ширкат 5 ҳазор адад ҳисобкунакҳои электронӣ ва тамоми анҷоми барои васлкунии онҳо лозимӣ, яъне кабел, қуттиҳои нигоҳдории ҳисобкунакҳо, қатъкунакҳои худкор ва ғайра ворид гаштанд. Дар навбати аввал барои муштариёни водии Сағирдашт теъдоди зарурии ҳисобкунакҳои барқии электрониро ҷудо намуда, ба водӣ расонд. Бригадаи махсус барои васл кардани ҳисобкунакҳои электронӣ ба Сағирдашт сафарбар гардид. Аллакай беш аз 110 адад ҳисобкунакҳои замонавӣ насб шуданд. То охири моҳи ноябри соли равон ҳамаи муштариёни водии баландкӯҳи Сағирдашт соҳиби асбобҳои дақиқи замонавии ченкунии ҳаҷми қувваи барқ гардида, ҳисобу китоби истифодабарии қувваи барқ пурра тавассути ҳисобкунакҳои электронӣ ба роҳ монда мешавад.

Раҳмони ГУЛЗОР,
«Ҷумҳурият»


Баёни ақида (0)    Санаи нашр: 29.10.13    №: 143    Мутолиа карданд: 2016
04.03.2021


ФОРУМИ ҶУМҲУРИЯВӢ ОИД БА БАЛАНД БАРДОШТАНИ МАЪРИФАТИ ҲУҚУҚИИ ЗАНОН

ШАҲРИНАВ. ГУЛГАШТИ НАЗДИ МУҶАССАМАИ МИРЗО ТУРСУНЗОДА НАВСОЗӢ МЕШАВАД

КАМОНВАРӢ

Муассисаҳои таълимии олии Россия дарҳояшонро барои донишҷӯёни хориҷӣ боз намуданд

ҶАҲОН ДАР ЯК САТР

03.03.2021


Мулоқоти Зулфия Давлатзода бо Мирвайс Ноб

Дар Доғистон хотираи ҳалокшудагони ҷангро гиромӣ медоранд

ҶАҲОН ДАР ЯК САТР

ФУТБОЛ. СИТОРАҲОИ ДУРАХШОНИ ВАРЗИШИ ТОҶИК

ИФТИТОҲИ МАРКАЗИ ДӮСТӢ ВА ҲАМКОРИИ СҲШ ДАР ТОҶИКИСТОН

ҚУЛЛАИ «РАҲИМ МАСОВ» ДАР ИШКОШИМ

ҶОМИ КФО – 2021

Путин ҷиҳати муколама бо ИМА ва дигар кишварҳо омода аст

ҶАҲОН ДАР ЯК САТР

01.03.2021


ВМКБ. ОЗМУНИ «ДАСТАРХОНОРОӢ» ҶАМЪБАСТ ГАРДИД

ФФТ БАРНОМАИ МАХСУСИ ПРЕЗИДЕНТ БАРОИ РУШДИ ФУТБОЛ ДАР ДЕҲОТ

«ҚОНУНИ ТИБ» БОЗНАШР ШУД

ТАЪСИСИ КОРХОНАИ ХУРДИ ИЛМӢ - ИСТЕҲСОЛИИ МАВОДИ ДОРУВОР

КОРВОНИ САЛОМАТӢ ДАР ЛАХШ

27.02.2021


Ҷаҳон дар як сатр

Си Ҷинпин изҳор намуд, ки Чин бар бенавоӣ комилан пирӯз гардид

Масъулиятро нисбат ба он мансабдорҳое, ки душаҳрвандӣ доранд, бояд сахттар намуд

ИМА имкони тамдиди ҳузури низомиёнашро дар Афғонистон истисно намекунад

Кишварҳои Иттиҳоди Аврупо ба таҳияи «шиносномаи эмкунӣ» - и ягона ба мувофиқа расиданд

ТЕННИС ВА НАҚШИ «ҶУМҲУРИЯТ» ДАР ОММАВИЯТИ ВАРЗИШ

25.02.2021


ХАДАМОТИ ГУМРУК. ҚОНУНШИКАНӢ КАМ ВА ПАРДОХТҲОИ ГУМРУКӢ ЗИЁД ШУДАНД

«ТОҶИКОН» ДАР ТОҶИКОБОД

АЗ РАШТ ТО ЛАХШ. АВЛАВИЯТ БА ТАВСЕАИ ЗАМИНҲОИ КИШТ

КИШОВАРЗӢ. 11 КОРХОНАИ ПАРАНДАПАРВАРӢ ТАЪСИС МЕЁБАД

TASHKENT GRAND SLAM 2021. ТОҶИКИСТОНРО КИҲО МУАРРИФӢ МЕКУНАНД?

ҶАҲОН

ҶАҲОН ДАР ЯК САТР

24.02.2021


ҶАҲОН

ҶАҲОН ДАР ЯК САТР

23.02.2021


ХИЗМАТИ ДАВЛАТӢ. СУОЛИ "ҶУМҲУРИЯТ" ОШКОР КАРД, КИ ДАР КАДОМ МАҚОМОТ БОНУВОН ҶАЛБ НАМЕШАВАНД


Дар сомонаҳои дигари Тоҷикистон хонед