- Соли 2020 аз ҷониби кормандони Хадамоти гумруки назди Ҳукумати Ҷумҳурии Тоҷикистон 1960 ҳолати ҳуқуқвайронкунии гумрукӣ ошкор шуд, ки нишондиҳандаи мазкур нисбат ба ҳамин давраи соли гузашта 1375 ҳолат коҳиш ёфтааст. Аз ин қонуншиканиҳо бештар қоҷоқи телефонҳои мобилӣ ба кишвар мебошад, ки беш аз 7 ҳазору 300 ҳолатро дар бар мегирад, - иттилоъ дод Азим Турсунзода, муовини якуми сардори  Хадамоти гумрук.

Ба гуфтаи масъулони соҳа нисбат ба як соли пеш коҳиш ёфтани қонуншиканиҳои гумрукӣ, агар аз як ҷониб, таъсири пандемияи COVID-19 бошад, сабаби дигар, пурзӯр гардидани назорат дар сарҳади давлатӣ, аз ҷумла тадбирҳои андешидаи хадамот якҷо бо дигар мақомоти ҳифзи ҳуқуқ дар самти мубориза бо ҳуқуқвайронкунӣ, пешгирии қоҷоқи мол ва ташкили корҳои оммафаҳмонӣ ба шумор меравад.

Азим Турсунзода зикр намуд, ки яке аз муваффақиятҳои соҳа дар соли сипаригардида, ин фаъолияти босамари низоми «Равзанаи ягонаи барасмиятдарории амалиёти содиротӣ, воридотӣ ва транзитӣ» буда, равзана дар коҳиш додани ҳуқуқвайронкунӣ ва аз байн бурдани муомилоти хуҷҷатҳои қоғазӣ оид ба амалёти барасмиятдарории гумрукӣ нақши мусоид гузошта истодааст. Аз ҷумла, тавассути он аз ҷониби  сохторҳои назоратӣ 3043 ҳолати нодуруст ситондани пардохти гумрукӣ ошкор ва аз ин ҳисоб зиёда  4 миллиону 500 ҳазор сомонӣ пардохти гумрукии иловагӣ майян ва аз маблағи ошкоршуда наздики 3 миллион сомонӣ ба буҷети давлат ворид шуд. Илова бар ин, зимни баррасии парвандаҳои ҳуқуқвайронкунии маъмурӣ ва ҷиноятӣ шахсони гунаҳгор ба маблағи 5 миллион сомонӣ ҷаримабандӣ ва 27,8 миллион сомонӣ пардохти гумрукӣ ба фоидаи давлат ситонда шудааст.

Дар ҳамин ҳол Азим Турсунзода  зикр намуд, ки вобаста ба вазъи ноустувори молиявӣ ва таъсири пандемияи COVID-19 ба иқтисоди ҷаҳон, бахусус  кишварҳои аз лиҳози иқтисодӣ бо Тоҷикистон шарик, ба воридоти мол ва қисме аз пардохтҳои гумрукӣ таъсири манфӣ расонд. 

 

Муҳаммад САИДВАЛӢ, «Ҷумҳурият»