Кормандони маркази синошиносии Институти фалсафа, сиёсатшиносӣ ва ҳуқуқи АМИТ «Қонуни тиб» (китоби 5) - ро тарҷума ва бознашр намуданд, ки ҷилди 16 - уми Осори Абуалӣ ибни Синоро ташкил медиҳад. Дар ин бора Суннатулло Ҷонбобоев, роҳбари марказ, ба мо иттилоъ дод.

- Ҷилд бахшеро дар бар мегирад, ки дар илми тиб бо номи «Карободин» (фармакопия) машҳур аст. Китоб аз 3 қисм иборат мебошад. Дар қисми аввал оид ба доруҳои мураккаб сухан меравад. Дар қисми дуюм доруҳои мураккаб аз рӯи навъашон тақсим шуда, таркиб, тарзи ба вуҷуд овардан ва истифодаи дурусти онҳо нишон дода шудааст. Қисми сеюм, доруҳои мураккаби санҷидашударо фаро мегирад. 

Дар китоб бемориҳо, сабаб ва зиёне, ки ба бадани инсон мерасонанд,  шарҳи комил ёфтаанд, - гуфт Ҷонбобоев.

Дар асар мавриди бисёр бемориҳо андешаҳои илман асоснок ҷой шудаанд, ки то имрӯз аҳамияти худро гум накардаанд. 

Кормандони марказ, ҳамчунин, бори аввал рисолаҳои «Китоб - уш - шифо»,  «Ҷадал», «Хитоба», «Суфастоӣ» ва «Фанни шеър» - и  Абуалӣ ибни Синоро аз арабӣ ба забони русӣ тарҷумаву нашр намуданд. Тарҷумаи тоҷикии онҳо рӯзҳои наздик дастраси хонандагон мегардад.

 

Фарзона ФАЙЗАЛӢ, «Ҷумҳурият»