logo

ҳуқуқ

ТАНЗИМ. МЕЪЁРИ ҶАРИМА БАРОИ ВАЙРОН КАРДАНИ ҚОНУНИ МИЛЛӢ МЕАФЗОЯД

Маҷлиси намояндагон тарҳи қонунеро ба тасвиб расонд, ки дар асоси он ҷарима барои риоя накардани меъёрҳои Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» зиёд карда мешавад.
Тибқи он ба 4 моддаи Кодекси ҳуқуқвайронкунии маъмурии Ҷумҳурии Тоҷикистон тағйиру иловаҳо ворид карда мешаванд.
 
НИГАРОНИИ ПРЕЗИДЕНТИ КИШВАР АЗ ЗИЁДАРАВИИ БАЪЗЕ ШАҲРВАНДОН
Лоиҳаи қонун дар ҳоле ба тасвиб расид, ки соле қабл Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар иҷлосияи якуми Маҷлиси миллии Маҷлиси Олӣ даъвати шашум (17 апрели соли 2020) дар баробари дигар масъалаҳо аз зиёдаравӣ ва маъракаҳои зиёдатии баъзе шаҳрвандони кишвар изҳори нигаронӣ намуда, таъкид карданд: «Ҳанӯз ҳам баъзан шахсони мансабдор, соҳибкорон, ходимони дин ва модарону бонувони муҳтарами мо ба зиёдаравӣ, исрофкорию зоҳирпарастӣ ва ташкили маъракаҳои беҳудаву зиёдатӣ роҳ медиҳанд. Вобаста ба ин, таъкид менамоям, ки Прокуратураи генералӣ, дигар мақомоти ҳифзи ҳуқуқ, намояндагони Ҳукумат дар маҳалҳо, раисони вилоятҳо ва шаҳру ноҳияҳо, ҷамоатҳои шаҳраку деҳот, масъулон ва аъзои комиссияҳои ҷамъиятӣ, фаъолон ва ҷомеаи шаҳрвандӣ доир ба риояи муқаррароти Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» тадбирҳои қатъии иловагӣ андешанд.
Бо истифода аз минбари мақоми олии қонунгузор пешниҳод менамоям, ки сохтору мақомоти дахлдор доир ба пурзӯр кардани ҷавобгарии маъмурӣ, яъне баланд бардоштани меъёри ҷарима барои вайрон кардани талаботи қонуни зикршуда чораҷӯӣ намоянд».
 
ОЁ ЗИЁД КАРДАНИ ҶАРИМА РОҲИ ҲАЛ АСТ?
Бино ба гуфтаи Сулаймон Давлатзода, раиси Кумитаи дин, танзими анъана ва ҷашну маросими назди Ҳукумати Ҷумҳурии Тоҷикистон, лоиҳаи Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси ҳуқуқвайронкунии маъмурии Ҷумҳурии Тоҷикистон» бо мақсади такмили ҷавобгарии маъмурӣ барои вайрон кардани талаботи қонунгузорӣ дар бораи танзими анъана ва ҷашну маросим таҳия ва пешниҳод шудааст.
- Мушоҳидаҳо нишон медиҳанд, ки ҳанӯз ҳам баъзан шаҳрвандон ба исрофкориву зоҳирпарастӣ ва ташкили маъракаҳои зиёдатӣ роҳ медиҳанд. Ҳолати мазкур, махсусан, дар шароити густариши бемории ҳамагири COVID-19 боиси нигаронӣ буда, зарурати пешгирии қонунвайронкуниҳоро дар ин самт тақозо менамояд. Бо назардошти ин ҳолат ба моддаҳои 30, 33, 43 ва 481 Кодекси ҳуқуқвайронкунии маъмурӣ тағйиру иловаҳои дахлдор ворид мегарданд.
Тибқи лоиҳа дар моддаи 481 кодекси мазкур меъёрҳои ҷарима мувофиқан баланд бардошта мешаванд.
Бо қарори Ситоди ҷумҳуриявӣ оид ба пешгирӣ аз паҳншавии бемории коронавирус – COVID-19 нисбат ба чорабиниҳои оммавӣ, аз ҷумла баргузории маъракаҳо талаботи муайян дар робита ба қоидаҳои беҳдоштӣ пешбинӣ гардида буд. Бо вуҷуди ин, иддае аз шаҳрвандон маъракаҳои худро бар хилофи талаботи қонун ва қарорҳои Ситоди ҷумҳуриявӣ баргузор намуданд.
Тағйироти мазкур имкон фароҳам меорад, ки баҳри пешгирии чунин ҳолат заминаи қонунӣ муқаррар шуда, дар умум пурзӯр намудани ҷавобгарии маъмурӣ ба коҳиш додани қонунвайронкуниҳо дар ин самт мусоидат менамояд. 
 
ҶАРИМА ЧӢ ҚАДАР ЗИЁД МЕГАРДАД?
Пас аз ҷаласаи парлумон Сулаймон Давлатзода дар шарҳи ин масъала гуфт, ки бар асоси лоиҳаи қонун барои риоя накардани талаботи қонуни мазкур ба шахсони воқеӣ ба андозаи як саду даҳ, ба шахсони мансабдор ба андозаи панҷсаду панҷоҳ ва ба шахсони ҳуқуқӣ ба андозаи ҳаштсад нишондиҳанда барои ҳисобҳо ҷарима таъйин карда мешавад.
Бояд гуфт, ки қаблан ҳаҷми ҷарима ба шахсони воқеӣ ба андозаи сад, ба шахсони мансабдор ба андозаи панҷсад ва ба шахсони ҳуқуқӣ ба андозаи ҳафтсад нишондиҳанда барои ҳисобҳо буд. 
Ҳамчунин, барои шахсони воқеӣ, мансабдор ва ҳуқуқӣ, ки замони эълони вазъи фавқулода дар кишвар дар робита ба паҳншавии пандемияи коронавирус дастурҳои ситоди ҷумҳуриявиро вобаста ба баргузории ҷашну маросим риоя намекунанд, ба ин монанд ҷаримаҳо ҷорӣ мешаванд. 
Сарвиноз Маҷидова, вакили Маҷлиси намояндагон, дар шарҳи тағйирот ба Кодекси ҳуқуқвайронкунии маъмурӣ чунин гуфт: «Дар асоси илова ба моддаи 30, минбаъд шахсоне, ки нисбат ба онҳо оинномаҳои интизомӣ ё қоидаҳои махсуси интизом татбиқ мегарданд, барои риоя накардани Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» тибқи асосҳои умумӣ ба ҷавобгарии маъмурӣ ҷалб мегарданд.
Мувофиқи тағйироти қабулшуда ба моддаи 33 шахсоне, ки меъёрҳои қонуни мазкурро риоя намекунанд, пас аз гузашти шаш моҳ аз замони содир шудани қонуншиканӣ ба ҷавобгарӣ кашида намешаванд».
 
СОКИНОН ҶОНИБДОРИ ҚОНУНИ МИЛЛИАНД
Бар пояи таҳлили назарсанҷии се ҳазор пурсишномаи Кумитаи дин, танзими анъана ва ҷашну маросим оид ба назари шаҳрвандон доир ба Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» (моҳи декабри соли 2020) муайян гардид: Натиҷаи таҳқиқот вобаста ба муносибати шаҳрвандон ба Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» нишон дод, ки 91,9 дарсади пурсидашудагон онро ҷонибдорӣ намуданд. Ҳамагӣ 3,4 дарсад зид баромаданд, боқӣ мусоҳибон бетараф ва посух надодаанд. 
Инчунин, 76 дарсади пурсидашудагон нақши қонунро дар пешгирии таассуб, худнамоӣ ва хурофот мусбат арзёбӣ карданд. 
 
Маҳмуд МИРЗОЁН, «Ҷумҳурият»


Баёни ақида (0)    Санаи нашр: 28.04.2021    №: 85    Мутолиа карданд: 2016
23.09.2021


Муносибатҳои дипломатии Тоҷикистон ва Мавритания барқарор шуданд

ЛИГАИ ОЛӢ

Машқҳои «Миссияи сулҳи СҲШ - 2021» дар вилояти Оренбург

Ҷаҳон дар як сатр

21.09.2021


Туҳфаи Пешвои миллат - “Тоҷикон” ба Хуҷанд расид

Навидҳои фарҳанг

17.09.2021


Токаев аз кишварҳои СААД хост, ки дар таҳкими марзи Тоҷикистон ёрӣ расонанд

Ҷаҳон дар як сатр

СЕ МЕДАЛ - ТУҲФАИ ҶАШНӢ

16.09.2021


Ҷаласаи муштараки ШВКХ, ШВМ ва ККША СААД

ПАҲЛАВОНИ ТОҶИК - СОҲИБИ ШОҲҶОИЗА

СОЗИШНОМАИ БМТ БО БОНКИ МАРКАЗИИ РОССИЯ

ТОҶИКОБОД. НИЁЗМАНДОН ДАСТГИРӢ ЁФТАНД

ҶИУ-ҶИТСУ

МУЛОҚОТИ ЭМОМАЛӢ РАҲМОН БО НИКОЛ ПАШИНЯН

15.09.2021


Лоиҳаи Қонун «Дар бораи фаъолияти инжинирингӣ» баррасӣ гашт

ЛИГАИ ҚАҲРАМОНҲО

Рӯйдодҳои илмӣ

ХУҶАНД. БОЗ ЧАНД ИНШООТИ НАВИ ҶАШНӢ ДАР ХИЗМАТИ СОКИНОН

14.09.2021


Нахустин вохӯрии сарварони кишварҳои узви СҲШ ва СААД оид ба вазъи Афғонистон дар Душанбе

МАКТАБИ СИЁСИИ ПЕШВОИ МИЛЛАТ КОРШИНОСОНУ МУҲАҚҚИҚОНИ ДОХИЛУ ХОРИҶРО БА ҲАМ МЕОРАД

“МАРҲАБО БА 20-СОЛАГИИ СҲШ”

I БОЗИҲОИ КИШВАРҲОИ ИДМ

ЛАХШ. ИММУНИЗАТСИЯ БО МАРОМ ИДОМА ДОРАД

13.09.2021


Маҷаллаи «Diplomatisches Magazin» дастовардҳои Тоҷикистонро муаррифӣ намуд

Дар Афғонистон ҷанг бо «Толибон» дубора авҷ гирифт

Ҷаҳон дар як сатр

ГӮШТИИ МИЛЛӢ

«ФАРҲАНГИ ДОРО»-И ДОРО

«ЧОРСӮ» ДАР КӮЛОБ МАКТАБ СОХТ

СУДҲОИ ИҚТИСОДӢ САМАРАИ СОҲИБИСТИҚЛОЛИИ ДАВЛАТИАНД

ТАНТАНАИ ҶАШНИ МИЛЛӢ ДАР МУРҒОБ

08.09.2021


Маҷлиси намояндагон Қонуни авфро қабул кард

Задухӯрдҳои шадид дар водии Панҷшери Афғонистон идома доранд

Ҷаҳон дар як сатр


Дар сомонаҳои дигари Тоҷикистон хонед