Пирӯзии тими ҷавонони Тоҷикистон бар Шри-Ланка
Дастаи мунтахаби ҷавонони Тоҷикистон (U-20) марҳалаи интихобии Ҷоми Осиё-2025-ро дар гурӯҳи «Е» бо пирӯзӣ оғоз кард.
Футболбозони мо дар даври дуюм 23-юми сентябр бар тими Шри-Ланка бо ҳисоби 3:0 ғолиб омаданд. Масрур Ғафуров ду гол ва Билол Бобоев як гол заданд.
Бозии дигари гурӯҳ миёни дастаҳои ҷавонони ҶХД Корея бо Малайзия мусовӣ (0:0) анҷом ёфт.
Футболбозони ҷавони тоҷик дар даври баъдӣ рӯзи 25-уми сентябр бо ҳамсолони худ аз ҶХД Корея вомехӯранд.
Дар марҳалаи интихобии Ҷоми Осиё-2025 миёни ҷавонон ҳамаи 45 давлати қора дар 10 гурӯҳ барои 16 роҳхат талош доранд. Тибқи низомнома ғолибон ва 5 дастаи беҳтарини ҷойи дуюми гурӯҳҳо ба марҳалаи ниҳоӣ, ки 6-23-юми феврали соли оянда дар Чин доир мегардад, роҳхат мегиранд.
МҶМОВ ДУШАНБЕ – ғолиби марҳалаи аввали лигаи “Пешсаф”
Марҳалаи аввали лигаи кӯдакону наврасон – “Пешсаф” (U-18) ба анҷом расид. Дар мусобиқа 8 даста – 3 даста аз Душанбе, 2-дастаӣ аз Хатлону Суғд, як даста аз шаҳри Ваҳдат ширкат доранд.
Пас аз натиҷагирии 7 даври мусобиқа дастаи Мактаби ҷумҳуриявии маҳорати олии варзишии (МҶМОВ) шаҳри Душанбе бо 17 хол пешсаф аст. Воқеан, ин ягона дастае мебошад, ки то ҳол бохт надорад. Дастаи “Душанбе” бо як хол камтар дар ҷойи дуюм, тимҳои “Эсхата” (Хуҷанд) ва “Равшан” бо 10-холӣ дар зинаҳои сеюму чорум мавқеъ доранд.
ТИМИ «ДУШАНБЕ-1» ДАР ЛИГАИ «УМЕД» (U-14) ҒОЛИБ ШУД
Дастаи “Душанбе-1”, таҳти раҳбарии сармураббӣ Парвиз Сайфуллоев, ғолиби Лигаи кӯдакону наврасони Тоҷикистон “Умед” миёни бозигарони то 14-сола гардид.
23-юми сентябр дар майдони эҳтиётии Варзишгоҳи марказии ҷумҳуриявии шаҳри Душанбе даври ниҳоӣ доир гашт. Даҳ даста аз ҳамаи минтақаҳо, ки ба ду гурӯҳ тақсим шуда буданд, барои медалҳо мубориза бурданд. Пас аз анҷоми марҳалаи гурӯҳӣ бозиҳо аз рӯи системаи плей-офф баргузор шуданд.
Дастаи “Хатлон-1” дар бозӣ барои ҷойи сеюм тими ШНТМ-2-ро бо ҳисоби 2:1 шикаст дод. Наврасони “Душанбе-1” дар финал бар ҳамсолони худ аз тими “Хатлон-2” бо ҳисоби 1:0 пирӯз шуда, ғолиби мусобиқаи имсолаи Лигаи “Умед” U-14 гардиданд.
Бо натиҷагирӣ аз мусобиқа, футболбозони тими “Душанбе-1” Абдувалӣ Муъминов, ки ба дарвозаи рақибон 8 гол задааст, беҳтарин нишонзан, Зиёратшоҳ Тоирзода беҳтарин бозигар дониста шуданд.
ҶХД КОРЕЯ – ЧЕМПИОНИ ҶАҲОН МИЁНИ ҶАВОНДУХТАРОН
Тими бонувони то 20-солаи Ҷумҳурии Халқии Демократии Корея ғолиби Ҷоми ҷаҳонии FIFA-2024 гардид.
Мусобиқа бо иштироки 24 даста аз 31-уми август то 22-юми сентябр дар Колумбия доир гашт. Футболбозбонувони кореягӣ дар финал бар тими бонувони Ҷопон бо ҳисоби 1:0 ғолиб омаданд.
Ҷойи сеюм насиби бонувони Иёлоти Муттаҳидаи Амрико шуд, ки бар дастаи Нидерланд пирӯз гашт (2:1).
Ҷоми ҷаҳонии футбол миёни бонувони то 20-сола аз соли 2002 доир мегардад. Бонувони ҶХД Корея маротибаи сеюм унвони чемпиониро сазовор шуданд. Ин даста қаблан солҳои 2006 ва 2016 ғолиб гашта буд.
Умаралӣ САФАРАЛӢ, “Ҷумҳурият”