9-уми май Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои иштирок дар чорабиниҳои тантанавӣ бахшида ба Ҷашни 80-солагии ғалаба дар Ҷанги Бузурги Ватанӣ ба қасри Кремл ташриф оварданд.
Президенти Ҷумҳурии Тоҷикистон муҳтарам Эмомалӣ Раҳмонро Президенти Федератсияи Русия муҳтарам Владимир Путин самимона истиқбол гирифтанд. Барои иштирок дар ин чорабинии бошукӯҳ сарварони давлатҳо ва ҳукуматҳо аз 29 кишвари ҷаҳон ба Москва омаданд. Зимни иштирок дар паради ҳарбӣ Сарвари давлати Тоҷикистон муҳтарам Эмомалӣ Раҳмон бо як қатор сарварони давлатҳо ва ҳукуматҳо аз кишварҳои ҷаҳон дидору суҳбатҳои судбахш анҷом доданд.
Баъд аз маросими истиқболи сарварони давлатҳою ҳукуматҳо ва роҳбарони ҳайатҳои воломақом аз ҷониби Президенти Федератсияи Русия муҳтарам Владимир Путин, дар маркази асосии баргузории чорабиниҳои тантанавӣ – Майдони Сурх, паради низомӣ баргузор гардид, ки дар он теъдоди зиёди низомиён иштирок карданд.
Дар паради бошукӯҳи ҳарбии Майдони Сурх як ротаи десантии Қувваҳои Мусаллаҳи Ҷумҳурии Тоҷикистон низ иштирок намуд.
Иштироку қадамзании боматонати низомиёни шуҷои тоҷик ба поси хотири беш аз 300 ҳазор фиристодагони Тоҷикистон ба майдонҳои набард, ки 55 нафари онҳо ба унвони олии Қаҳрамони Иттиҳоди Шуравӣ сарфароз гардида буданд ва ҳамаи шаҳрвандони Тоҷикистон, ки бо меҳнату машаққати холисонаи худ дар ақибгоҳ дар таъмини ғалабаи бузург дар он ҷанги пурдаҳшат саҳми намоён гузоштаанд, сурат гирифт.
Пас аз анҷоми паради ҳарбӣ дар Майдони Сурх Президенти Ҷумҳурии Тоҷикистон муҳтарам Эмомалӣ Раҳмон ва роҳбарони ҳайатҳои расмӣ ба гиромидошти хотираи қурбониёни Ҷанги Бузурги Ватании солҳои 1941-1945 дар назди ёдгории аскари номаълум гулчанбар гузоштанд.
Иштироки сарварони давлатҳо дар тантанаи ғалабаи бузург дар шаҳри Москва бо аксгирии якҷояи хотиравии онҳо ба поён расид.