5-уми июн дар Қасри миллат Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо сарварони ҳукуматҳои кишварҳои иштирокдори Иттиҳоди Давлатҳои Мустақил, ки ба Душанбе ташриф овардаанд, мулоқот намуданд.
Дар вохӯрӣ масоили ҳамкории кишварҳо дар чаҳорчӯби Иттиҳод ва рӯзномаи раёсати Тоҷикистон дар ИДМ баррасӣ гардид.
Роҳбари давлат муҳтарам Эмомалӣ Раҳмон дар бораи авлавиятҳои раёсати Тоҷикистон, аз ҷумла тадбирҳои андешидаи кишвари мо дар самти рушду густариши ҳамкориҳо ва ҳалли масъалаҳои мубрам ибрози андеша карданд.
Таъкид шуд, ки Тоҷикистон дар доираи иштироки худ ва бахусус раёсати феълӣ дар ИДМ, барои рушди минбаъдаи ҳамкории бисёрҷонибаи ҳамаи кишварҳои иштирокдори он корҳои созанда мебарад.
Президенти кишвар таъкид сохтанд, ки тадбирҳои дар ин самт андешидаи мо, пеш аз ҳама, бар усулҳои дӯстӣ, эҳтиром ва эътимоди ҳамдигарӣ, ҳамкории барои ҷонибҳо судманд ва ба назар гирифтани манфиатҳои ҳамаи тарафҳо асос ёфтааст.
Дар зимн, Сарвари давлат омодагии Тоҷикистонро барои минбаъд низ густариш додани ҳамёрӣ дар тамоми самтҳои ҳамкорӣ баҳри таъмини рушди устувори иҷтимоию иқтисодӣ, инчунин, таҳкими суботу амният дар саросари Иттиҳод таъкид намуданд.
Роҳҳои густариши ҳамкории кишварҳои иштирокдори Иттиҳод дар соҳаҳои гуногун, аз ҷумла иқтисоду тиҷорат, саноат, энергетика, ҷалби сармоя, инноватсия ва рақамикунонӣ, аз мавзуъҳое буданд, ки Роҳбари давлат муҳтарам Эмомалӣ Раҳмон барои ҳалли онҳо як қатор пешниҳодҳо баён доштанд.
Ҳамзамон, Сарвари давлат зимни суҳбат ба масъалаҳои ҳамкорӣ дар соҳаҳои маориф, тандурустӣ, фарҳанг ва илму техника таваҷҷуҳ зоҳир карданд.
Гуфта шуд, ки қабули нақшаи чорабиниҳо оид ба татбиқи марҳалаи дуюми Стратегияи рушди иқтисодии ИДМ барои давраи то соли 2030 масъалаи муҳими раёсати Тоҷикистон дар доираи Иттиҳод мебошад.
Дар бораи рушди ҳамгироии кишварҳо оид ба масъалаҳои ҳифзи муҳити зист, ҷонибдории ташаббусҳои якдигар баҳри ҳалли мушкилоти глобалӣ ва натиҷаҳои нахустин Конфронси байналмилалии сатҳи баланд оид ба ҳифзи пиряхҳо мубодилаи афкор сурат гирифт.
Ҳамчунин, густариши ҳамкорӣ дар соҳаи амният ва мубориза бо таҳдиду хатарҳои муосир зарур шумурда шуд.
Дар фароварди суҳбат Президенти кишвар муҳтарам Эмомалӣ Раҳмон ба кори ҷаласаи Шурои сарварони ҳукуматҳои кишварҳои иштирокдори ИДМ барору комёбӣ орзу намуданд.