Баргашт Чоп кардан

ДАНҒАРА. ВАҚТЕ ДАСТУ ДИЛИ МАРДУМ ГАРМ АСТ...

Дар партави дастуру ҳидоятҳои созандаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар қатори дигар шаҳру ноҳияҳои ин кишвари маҳбуб мардуми ноҳияи Данғара низ бо дасту дили гарм раванди созандагиву ободкориҳоро дар тамоми ҷабҳаҳо бомаром вусъат мебахшанд. Махсусан, аз самараи ҳамкориҳои хубу ибратомӯзи Мақомоти иҷроияи маҳаллии ҳокимияти давлатӣ бо соҳибкорони бонангу номуси ноҳия нақшаву барномаҳои пешбинигардида ҷиҳати таъмини рушди устувори иқтисодӣ ва баланд бардоштани сатҳу сифати зиндагии сокинон сол ба сол ҳадафмандона амалӣ мешаванд, ки шоистаи таҳсин аст.

Натиҷаи заҳмату кӯшишҳои дастҷамъона буд, ки соли 2022 Данғара бо нишондиҳандаҳои худ байни дигар ноҳияҳои вилояти Хатлон беҳтарин ноҳия эътироф шуда, соли 2023 дар озмуни вилоятӣ оид ба муайян намудани хона, оила, кадбону, деҳа, маҳалла, деҳот ва ноҳияи беҳтарин “Беҳтарин ноҳия”эълон гардид.

Дар соли 2024 низ ноҳияи Данғара дар озмуни вилоятӣ “Оид ба муайян намудани беҳтарин шаҳру ноҳия, шаҳраку деҳот, деҳа, маҳали аҳолинишин ва хонаи истиқоматӣ” ба муносибати 35-солагии Истиқлоли давлатии Ҷумҳурии Тоҷикистон дар номинатсияи “Ноҳияи беҳтарин” дар вилояти Хатлон ғолиб дониста шуда, бо дипломи дараҷаи 1 сарфароз гардид.

Имсол низ дастовардҳо дар соҳаҳои гуногуни хоҷагии халқ назаррасанд. Фарзи мисол, агар ба соҳаи кишоварзӣ назар афканем, имсол заркорони ноҳия майдони пахтазорро назар ба соли гузашта қариб 200 гектар зиёд намуда, 11-уми октябри соли 2025 дар қатори аввалинҳо аз иҷрои нақша мужда расонданд. Пахтакорони меҳнатқарини ноҳияи Данғара дар байни ноҳияҳои минтақаи Кӯлоб аввалин шуда, аз иҷрои нақша бо сарбаландӣ баромада, аз майдони 5 215 гектар ба ҷойи 10 ҳазору 700 тонна, то 27-уми октябр 13135,2 тонна пахтаро ба нуқтаҳои қабул супурданд, ки 122,76 дарсади нақшаро ташкил медиҳад. Самари бадастомада назар ба ҳамин давраи соли гузашта 7705,9 тонна зиёд мебошад.

Кароматулло АТО,

"Ҷумҳурият"