17-уми феврал дар шаҳри Душанбе бо иштироки Сарвазири Ҷумҳурии Тоҷикистон Қоҳир Расулзода ва Сарвазири Ҷумҳурии Ӯзбекистон Абдулло Орипов ҷаласаи 13-уми Комиссияи байниҳукуматӣ оид ба ҳамкории тиҷоратӣ ва иқтисодӣ байни Ҷумҳурии Тоҷикистон ва Ҷумҳурии Ӯзбекистон доир шуд, ки густариши ҳамкорӣ дар соҳаҳои тиҷорат, сармоягузорӣ, энергетика, саноат, кишоварзӣ, нақлиёт, гумрук, маориф, фарҳанг ва дигар бахшҳо аз мавзуъҳои асосии ҷаласа буд.
Тавре таъкид шуд, ба шарофати сиёсати созанда ва иродаи қавии роҳбарони ду кишвари дӯсту бародар, имрӯз муносибатҳо дар тамоми соҳаҳо рушди назаррас дошта, халқҳои мо дар фазои дӯстиву бародарӣ зиндагӣ мекунанд.
Бояд гуфт, ки маҳз дар заминаи иродаи қавӣ ва эҳтироми ҳамдигариву ҳампаймонӣ, имрӯз муносибатҳои дуҷониба дар фазои дӯстӣ сурат мегиранд. Ин аст, ки соли 2025 ҳаҷми тиҷорат миёни кишварҳо ба 718,3 миллион доллари ИМА расид, ки ин нишондиҳанда нисбат ба соли 2024-ум 22,5 дарсад зиёд мебошад. Зимнан, ҷонибҳо ба мувофиқа расиданд, ки гардиши тиҷорат то 2 миллиард доллар афзоиш дода шавад.
Мусоҳибон иброз намуданд, ки тақвияти ҳамкорӣ дар соҳаи саноат яке аз самтҳои асосии фаъолияти кишварҳо боқӣ мемонад.
Аз рӯйи натиҷаҳои мулоқот Протокол оид ба фаъолияти муштараки Комиссияи байниҳукуматӣ доир ба ҳамкории Ҷумҳурии Тоҷикистон ва Ҷумҳурии Ӯзбекистон ба имзо расид.
Инчунин, дар ҳошияи ҷаласа Сарвазири Тоҷикистон Қоҳир Расулзода ва Сарвазири Ӯзбекистон Абдулло Орипов бо фаъолияти корхонаи истеҳсоли халтаҳои полипропилении ширкати “Ғаюр-Пак” ва корхонаи истеҳсоли фурӯзонакҳои диодӣ ва дигар таҷҳизоти равшанидиҳандаи “Ғаюр Корея Технолоҷи” шинос шуданд.
Корхонаи “Ғаюр Пак" дар асоси технологияи муосир фаъолият дорад. Иқтидори истеҳсолии коргоҳ дар як сол 50 миллион дона халтаи полипропиленӣ мебошад. Корхонаи истеҳсоли фурӯзонакҳои диодӣ ва дигар таҷҳизоти равшанидиҳанда бошад, истеҳсоли беш аз 100 номгӯйи маҳсулотро ба роҳ мондааст. Иқтидори истеҳсолии корхонаи саноатӣ 1 миллиону 200 ҳазор дона дар як сол буда, маҳсулоти он, асосан, барои таъмини талаботи бозори дохилӣ равона гаштааст.
Комрон ЗИКРУЛЛО, «Ҷумҳурият»