ТОҶИКИСТОН. ВАҚТЕ САРВАР БА АРЗИШҲОИ МИЛЛӢ АРҶ МЕГУЗОРАД...

Дар Донишгоҳи давлатии Хуҷанд ба номи академик Бобоҷон Ғафуров зери унвони «Нақши Пешвои миллат дар тақвияту таҳкими худшиносиву худогоҳии миллӣ ва таҳқиқу тарғиби адабиёти тоҷик» конфронси ҷумҳуриявӣ баргузор гардид. Профессор Насим Абдуллозода, муовини ректор оид ба таълими Донишгоҳ, конфронсро ифтитоҳ намуда, иброз дошт, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон Эмомалӣ Раҳмон аз рӯзҳои аввали роҳбарии хеш масъалаҳои таҳкими худшиносии миллӣ, эҳёи арзишҳои фарҳангӣ ва рушди тафаккури миллиро ба яке аз самтҳои афзалиятноки сиёсати давлатӣ табдил доданд. Вазири фарҳанг Матлуба Сатториён дар мавзуи «Мақоми Пешвои миллат дар ташаккули худшиносии миллӣ ва истиқлоли маънавӣ» маъруза намуда, гуфт, ки 35 соли истиқлол барои миллати тоҷик давраи таҳкими пояҳои давлатдорӣ, худогоҳӣ ва эҳёи арзишҳои миллӣ маҳсуб мегардад. Ӯ, махсусан зикр кард, ки маҳз бо сиёсати хирадмандонаи Пешвои миллат Тоҷикистон буҳронҳои сиёсиву иқтисодиро пушти сар карда, ба марҳалаи рушди устувор ворид гардид. Мирзоқосим Каримзода ва Бобоҷон Қодирӣ дар маърузаҳои хеш ба нақши Пешвои миллат дар таҳкими давлатдории миллӣ ва боло бурдани маърифати сиёсиву ҳуқуқии ҷомеа ибрози назар намуданд. Абдуллоҳи Раҳнамо роҷеъ ба «Адабиёт ва муқовимат бо бегонапарастӣ ва таҳкими ҳувияти миллӣ» сухан карда, адабиётро омили муҳими ҳифзи асолати фарҳангӣ арзёбӣ кард. Профессор Нуралӣ Нурзод бошад, зимни баррасии мавзуи «Шоҳномаи Фирдавсӣ – сарчашмаи худшиносӣ ва худогоҳии миллӣ» ҷойгоҳи асари безаволи «Шоҳнома»-и Абулқосим Фирдавсиро дар тарбияи ҳисси ифтихори миллӣ ва таҳкими ҷаҳонбинии ватандӯстона басо муҳим донист. Дар фарҷом таъкид гардид, ки таҳқиқу тарғиби адабиёти классикӣ ва муосири тоҷик, гиромидошти мероси ниёгон ва таҳкими худшиносиву худогоҳии миллӣ яке аз вазифаҳои асосии ҷомеаи илмӣ ва фарҳангии кишвар мебошад. Сурайё ҲАКИМОВА, “Ҷумҳурият” ҲАДАФ – ТАРБИЯИ НАСЛИ ХУДОГОҲУ ВАТАНДӮСТ Ҷиҳати тақвияти корҳои идеологӣ ва тарбиявӣ, дар Муассисаи таҳсилоти миёнаи умумии №8-и ноҳияи Шаҳристон бо хонандагон, омӯзгорон ва падару модарон вохӯрии судманд доир гашт. Бино ба иттилои дафтари матбуоти МИҲД ноҳия, дар вохӯрӣ муовини раиси ноҳия Дилноза Ҷонбойзода ва масъулони шуъбаву бахшҳои мақомот иштирок доштанд. Зимни баромадҳо таъкид гардид, ки ҳадафи асосии баргузории мулоқот тарғиби муҳтавои Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон аз 16-уми декабри соли 2025, инчунин пешгирии омилҳои номатлуб миёни наврасону ҷавонон, аз ҷумла ҷинояткорӣ, шомилшавӣ ба ҳизбу ҳаракатҳои ифротӣ ва террористӣ мебошад. Масъулон доир ба зарурати ҷалби падару модарон ба раванди таълиму тарбияи фарзанд, ҳатмӣ будани таҳсил дар зинаи сеюми таҳсилот ва баланд бардоштани масъулияти шаҳрвандӣ ибрози назар карданд. Дар рафти вохӯрӣ, инчунин масъалаҳои пешгирии ҷудошавии оилаҳои ҷавон, омода кардани духтарон ба рӯзгордориву оиладорӣ, эҳтиром ва гиромӣ доштани фарҳанги либоспӯшии миллӣ баррасӣ шуд. Зикр гардид, ки баргузории чунин чорабиниҳо дар ҳамкории мақомоти давлатӣ бо муассисаҳои таълимӣ барои таҳкими маърифати ҳуқуқӣ, сиёсӣ ва маънавии ҷомеа, махсусан наврасону ҷавонон, мусоидат намуда, дар тарбияи насли худогоҳу ватандӯст нақши муассир мегузорад. Сурайё ҲАКИМОВА, “Ҷумҳурият”