ГАРМОИ ШАДИД: ҲУШДОР, ЭҲТИЁТ ВА РОҲҲОИ ҲИФЗИ САЛОМАТӢ

Аз 15 то 18-уми июл дар Тоҷикистон баландшавии ҳарорати ҳаво пешгӯйӣ мешавад. Тибқи иттилои Агентии обуҳавошиносии Кумитаи ҳифзи муҳити зисти назди Ҳукумати Ҷумҳурии Тоҷикистон, дар ин рӯзҳо ҳарорати ҳаво дар ноҳияҳои водигии мамлакат аз 41 то 46 дараҷа гарм, дар ноҳияҳои доманакӯҳӣ ва кӯҳӣ аз 33 то 38 дараҷа гарм ва дар ноҳияи Дарвози Вилояти Мухтори Кӯҳистони Бадахшон аз 39 то 41 дараҷа гарм хоҳад шуд.

Ҳамзамон, бинобар баланд шудани ҳарорати ҳаво, дар ноҳияҳои доманакӯҳӣ ва кӯҳии тобеи ҷумҳурӣ, вилояти Суғд ва ноҳияҳои ғарбии Вилояти Мухтори Кӯҳистони Бадахшон эҳтимоли омадани селҳои пиряхӣ вуҷуд дорад. Дар ҳавзаҳои дарёҳои Панҷ, Зарафшон ва Вахш низ болоравии сатҳи об пешбинӣ мешавад. Дар робита ба ин, шаҳрвандон бояд аз соати 11:00 то 16:00 то ҳадди имкон аз гаштугузори нолозим дар кӯча худдорӣ намоянд. Тавсия дода мешавад, ки бештар об, нӯшокиҳои табиӣ, афшура ва хӯрокҳои моеъ истеъмол карда, аз нӯшокиҳои ширин ва спиртӣ даст кашанд.
Табибон тавсия медиҳанд, ки дар чунин рӯзҳо либоси сабуки аз матоъҳои табиӣ омодашударо ба бар намуда, кӯдаконро аз камобшавии организм муҳофизат намоянд. Ҳангоми дарунравӣ, қайкунӣ ё бемориҳои вирусӣ ба кӯдакон бояд моеи кофӣ дода шавад, зеро онҳо оби баданро зуд аз даст медиҳанд.

ГАРМИИ АЗ ҲАД ЗИЁД БА КӢ БЕШТАР ХАТАР ДОРАД?
Баъзе гурӯҳҳои аҳолӣ, аз ҷумла кӯдакони навзод ва хурдсол, шахсони аз 65-сола боло, занони ҳомила, беморони гирифтори бемориҳои дилу раг, диабет, бемориҳои шуш, гурда ва дигар бемориҳои музмин, маъюбон, шахсоне, ки танҳо зиндагӣ мекунанд ва кормандоне, ки дар ҳавои кушод фаъолият доранд, нисбат ба дигарон осебпазиртаранд. Ба чунин шахсон бояд таваҷҷуҳи бештар зоҳир карда шавад.
Кӯдакон нисбат ба калонсолон зудтар гарм мешаванд ва бештар оби организмро аз даст медиҳанд. Аз ин рӯ, онҳоро дар гармтарин соатҳои рӯз ба берун набароред ва ба нури мустақими Офтоб нагузоред, бештар об ва дигар нӯшокиҳои мувофиқ диҳед, либоси сабуки пахтагин пӯшонед, кулоҳи лабпаҳн истифода баред.
Ҳеҷ гоҳ кӯдак ё ҳайвонотро ҳатто барои чанд дақиқа дар дохили мошини таваққуфкарда танҳо нагузоред, зеро ҳарорати дохили мошин дар муддати кӯтоҳ метавонад ба дараҷаи ба ҳаёт хатарнок бирасад.

ХУЛОСА
Гармии шадид танҳо як нороҳатии мавсимӣ нест, балки метавонад барои саломатӣ ва ҳаёти инсон хатари ҷиддӣ эҷод намояд. Риояи қоидаҳои одии бехатарӣ метавонад аз бисёр пайомадҳои нохуш пешгирӣ кунад.
Дар рӯзҳои гарм ба ҳушдорҳои расмии мақомоти давлатӣ таваҷҷуҳ зоҳир намуда, тавсияҳои табибонро риоя намоед. Саломатии худ ва наздиконатонро ҳифз кунед, зеро пешгирӣ ҳамеша беҳтар аз табобат аст.

Сайфиддин СУННАТӢ, “Ҷумҳурият”