ТАЪИНОТИ КАДРӢ
30-юми июл Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар як қатор вазорату идораҳо тағйироти кадрӣ амалӣ намуданд.
Бо фармонҳои Президенти Ҷумҳурии Тоҷикистон дар якчанд воҳидҳои низомии Гвардияи миллии Ҷумҳурии Тоҷикистон афсарони соҳибтаҷриба ба вазифаҳои роҳбарӣ таъин гардиданд.
Бо қарорҳои Ҳукумати Ҷумҳурии Тоҷикистон дар Вазорати саноат ва технологияҳои нав, Кумитаи бехатарии озуқаворӣ ва Хадамоти иҷро муовинон-сарпарастони самти рақамикунонӣ ва технологияҳои муосир таъин шуданд.
Дар Вазорати мудофиа низ сардорони як қатор раёсатҳо ва роҳбарони воҳидҳои низомӣ аз ҳисоби мутахассисони ҷавоне, ки ду ё зиёда донишкадаҳои ҳарбии дохил ва хориҷи кишварро хатм кардаанд, таъин гаштанд.
Бо натиҷагирӣ аз фаъолияти комиссариатҳои ҳарбӣ, дар мувофиқа бо Президенти Ҷумҳурии Тоҷикистон комиссарони ҳарбии ноҳияҳои Спитамен, Кӯҳистони Мастчоҳ, Айнӣ, Шаҳристон, шаҳрҳои Истаравшан, Конибодом ва Гулистони вилояти Суғд, ноҳияҳои Восеъ, Кӯшониён, Хуросон, Темурмалик, Қубодиён, шаҳрҳои Кӯлоб, Бохтар, Леваканти вилояти Хатлон, комиссари ҳарбии Вилояти Мухтори Кӯҳистони Бадахшон, комиссарони ҳарбии ноҳияҳои Рашт, Лахш, Файзобод ва шаҳри Вахдат аз ҳисоби мутахассисони ботаҷриба иваз шуданд.
Тағйироти кадрӣ, ҳамчунин, дар ҳайати роҳбарикунандаи ҷузъу томҳои Қӯшунҳои сарҳадии Кумитаи давлатии амнияти миллӣ сурат гирифт.
Сардори раёсати Қӯшунҳои сарҳадӣ дар Вилояти Мухтори Кӯҳистони Бадахшон, роҳбарони якчанд отрядҳои сарҳадӣ ва раёсатҳои дастгоҳи марказии Қӯшунҳои сарҳадӣ аз ҳисоби кадрҳои дорои дараҷаи баланди касбӣ ва маҳорату малакаи роҳбарӣ таъин гардиданд.
Дар ҷараёни суҳбат Президенти Ҷумҳурии Тоҷикистон муҳтарам Эмомалӣ Раҳмон таъкид сохтанд, ки амнияту субот, пешрафту тараққиёт ва беҳтар гардидани сатҳу сифати зиндагии мардум ба меҳнати софдилонаву содиқонаи ҳар як хизматчии давлатӣ ва низомӣ вобаста мебошад.
Хотирнишон гардид, ки бо назардошти вазъи ноорому пешгӯинашавандаи ҷомеаи ҷаҳонӣ Ҳукумати Ҷумҳурии Тоҷикистон дар самти беҳдошти шароити кору хизмат ва таъминоти Қувваҳои Мусаллаҳ бо лавозимоти зарурӣ тадбирҳои саривақтӣ меандешад.
Дар хотимаи суҳбат Сарвари давлат муҳтарам Эмомалӣ Раҳмон ба масъулон дастур доданд, ки доир ба пурзӯр намудани тартибу интизом, риояи оинномаҳои ҳарбию соҳавӣ, тақвияти омодабошии доимии Қувваҳои Мусаллаҳ ва дигар воҳидҳои низомию махсуси кишвар мунтазам тадбирҳои муассир амалӣ намоянд.