Баргашт Чоп кардан

РӮЗГОРЕ БАРОИ ИБРАТ

Мирзо Бобохонзода аз зумраи мутахассисони соҳибтаҷриба ва роҳбарони кордону соҳибмактаби соҳаи молия ба ҳисоб меравад, ки солҳои зиёд фаъолияти меҳнатии худро ба пешбурди сиёсати соҳа, таҳияи буҷет, идоракунии маблағҳои давлатӣ ва таъмини иҷрои самараноки буҷети маҳаллӣ равона намудааст. Соҳибкасбе дар кори худ усто, мардест огоҳ аз нозукиҳои соҳаи молия, ки кору пайкораш намунаи ибрат мебошад.

Мирзо Бобохонзода давоми фаъолияти бисёрсолаи худ дар таҳияи нишондиҳандаҳои буҷети давлатӣ, пешбурди сиёсати буҷету андоз, таъмини иҷрои буҷет, ғанӣ гардондани қисми даромади буҷет ва истифодаи самараноку мақсадноки маблағҳои буҷети маҳаллӣ саҳми назаррас гузоштааст. Ҳамеша дар пайи судмандии кор, ноил гардидан ба натиҷаҳои назаррас аз натиҷаи заҳматҳои доимиаш мебошад. Дар иҷрои вазифаҳои хидматӣ ҳамеша тартиб, дақиқкорӣ ва масъулияти баландро риоя намуда, ба кормандони ҷавон таҷрибаи касбӣ ва одоби хидмати давлатиро меомӯзонад. 

Баробари фаъолияти амалӣ дар соҳаи молия, қаҳрамони мо ба корҳои илмӣ низ таваҷҷуҳи ҷиддӣ зоҳир намуда, дар мавзуи «Танзими давлатии рақобатпазирӣ дар комплекси агросаноатӣ дар мисоли Ҷумҳурии Тоҷикистон» таҳқиқот анҷом додааст. 9-уми январи соли 2021 рисолаи илмии худро бомуваффақият ҳимоя карда, дараҷаи илмии номзади илмҳои иқтисодиро гирифт. Номбурда ҳамчун аввалин корманди Сарраёсати молия дар вилояти Хатлон фаъолияти амалии худро бо кори илмӣ пайваст намуда, бо ин дастоварди илмӣ аз дониш, таҷрибаи ғанӣ ва масъулияти баланди касбии худ шаҳодат додааст. Мақолаҳои илмии ӯ дар чанд маҷаллаи илмии дохил ва хориҷа ба табъ расидаанд.

Мирзо Бобохонзода дар фаъолияти касбии худ бо ташаббускорӣ, ростқавлӣ, инсонпарварӣ ва муносибати масъулиятнок ба кор фарқ карда, кормандони тобеи худро ба иҷрои босифати вазифаҳои хидматӣ ва дастуру супоришҳои Пешвои миллат муҳтарам Эмомалӣ Раҳмон ҳидоят менамояд. 
Фаъолияти пурсамари ӯро Вазорати молия бо Ифтихорнома, мақомоти молияи вилояти Хатлон бо нишони сарисинагии Аълочии молияи Ҷумҳурии Тоҷикистон ва дигар сохторҳои соҳавӣ ба ҷоизаву ифтихорномаҳо қадр намудаанд.


Кароматулло АТО,
«Ҷумҳурият»