Тоҷикистон ва Британияи Кабир Ёддошти тафоҳум имзо карданд
Дар Вазорати корҳои хориҷӣ, иттиҳод ва рушди Подшоҳии Муттаҳидаи Британияи Кабир ва Ирландияи Шимолӣ байни вазоратҳои корҳои хориҷии Тоҷикистон ва Подшоҳии Муттаҳида муколамаи сиёсӣ баргузор гардид. Ҳайати Тоҷикистонро муовини вазири корҳои хориҷӣ Шараф Шерализода ва ҳайати Подшоҳии Муттаҳидаро вазири давлатӣ дар умури Аврупо ва Амрикои Шимолӣ Лео Дочертӣ роҳбарӣ намуданд.
Тибқи иттилои Вазорати корҳои хориҷӣ, равобити байнипарлумонӣ, ҳамкорӣ дар чаҳорчӯбаи созмонҳои байналмилалӣ ва минтақавӣ, вазъ дар Афғонистон, зарурати таҳкими сарҳадҳо ва дастгирии фаннии лоиҳаву барномаҳои Тоҷикистон дар соҳаи неруи “сабз” ва аҳамияти роҳандозии сафарҳои мақомдорони аршади ду кишвар аз ҷумлаи мавзуъҳое буданд, ки зимни муколама баррасӣ шуданд.
Дар муколамаи сиёсӣ роҳбарони ҳайатҳо Ёддошти тафоҳум оид ба ҳамкорӣ байни Вазорати корҳои хориҷии Ҷумҳурии Тоҷикистон ва Вазорати корҳои хориҷӣ, иттиҳод ва рушди Подшоҳии Муттаҳидаи Британияи Кабир ва Ирландияи Шимолиро имзо намуданд.
Ярмаркаи маҳсулоти ниёзи мардум дар шаҳри Бохтар
Дар шаҳри Бохтари вилояти Хатлон ярмаркаи фурӯши маҳсулоти кишоварзӣ ва саноатӣ баргузор гардид. Дар он пиёз, картошка, равған, орд, тухм, гӯшт ва дигар маҳсулоти ниёзи мардум нисбат ба бозор 15-20 фоиз арзон пешкаши сокинони вилоят гардонда шуд.
Тавре аз шуъбаи иттилоотӣ– таҳлилии дастгоҳи раиси вилоят хабар доданд, раиси вилоят Давлаталӣ Саид аз рафти фурӯши маҳсулоти кишоварзӣ дидан карда, масъулонро вазифадор сохт, ки маводи ғизоиро ба ярмаркаҳо бештар ворид намоянд. Ҳамзамон, ҳар ҳафта рӯзҳои шанбе чунин ярмаркаҳо дар сатҳи баланд баргузор шаванд, то сокинон маҳсулоти заруриро бо нархҳои дастрас бихаранд.
ДАЪВАТИ БАҲОРӢ. БАДАХШОН ДАР РӮЗИ АВВАЛ НАҚШАРО ИҶРО КАРД
Дар асоси Фармони Президенти Ҷумҳурии Тоҷикистон аз 1 апрели соли ҷорӣ дар ҷумҳурӣ даъвати баҳории шаҳрвандони солҳои таваллуди 1996-2005 ба хизмати ҳарбӣ оғоз гашт. Ба ин муносибат дар шаҳру навоҳии мамлакат рӯзи даъватшванда баргузор гардида, аввалин гурӯҳи наваскарон ба сафи Қувваҳои Мусаллаҳ пайваст.
Дар нахустин рӯзи даъват ба хизмати ҳарбӣ Вилояти Мухтори Кӯҳистони Бадахшон чун ҳамеша аз иҷрои нақша гузориш дод. Ба ин муносибат бо иштироки раиси ВМКБ Мирзонабот Алишер Худобердӣ, роҳбарият ва масъулони шаҳру ноҳияҳои вилоят, мақомоти ҳифзи ҳуқуқу тартибот, сарбозону наваскарон, волидайн, собиқадорони меҳнат, маросими гусели навдаъватшудагон баргузор шуд.
Раиси вилоят таъкид кард, ки тайи панҷ соли охир ҷавонписарони далеру шуҷои ватандӯсти Бадахшон ҷиҳати адои қарзи муқаддаси фарзандӣ дар назди Модар-Ватан, бо амри виҷдон ба комиссариатҳои ҳарбӣ ҳозир шуда, барои муҳофизати Ватан омодагии худро нишон медиҳанд.
Грантҳои раиси вилояти Суғд барои занони ҳунарманд ва эҷодкор
Раёсати кор бо занон ва оилаи Мақомоти иҷроияи ҳокимияти давлатии вилояти Суғд ҷиҳати дар амал татбиқ намудани қарори раиси вилояти Суғд аз 6 апрели соли 2021, № 167 «Дар бораи таъсис ва ҷудо намудани грантҳои раиси вилоят ҷиҳати дастгирӣ ва рушди фаъолияти соҳибкории занони ҳунарманд ва эҷодкор барои солҳои 2021-2025» озмун эълон намуд.
Ба иттилои хадамоти матбуоти раиси вилоят, грантҳои раиси вилоят ба сокинони вилояти Суғд – занҳои ҳунарманд ва эҷодкор, ки лоиҳаҳои таҳиянамудаи онҳо ба ҳалли масоили занон ва таъмини онҳо бо ҷойи кор тавассути рушди фаъолияти соҳибкорӣ мусоидат менамояд, ба андозаи зерин ҷудо мешаванд: 15 грант дар ҳаҷми 10000 сомонӣ, 15 грант дар ҳаҷми 8000 сомонӣ, 30 грант дар ҳаҷми 5000 сомонӣ.
Лоиҳаҳое, ки ба талаботи озмун ҷавобгӯ нестанд, баррасӣ ва баргардонда намешаванд. Муҳлати пешниҳоди лоиҳа аз 1 апрел то 31 майи соли ҷорӣ.
