ТАНТАНАИ РӮЗИ МОДАР ДАР ДУШАНБЕ

Бо ибтикори Кумитаи кор бо занон ва оилаи назди Ҳукумати Ҷумҳурии Тоҷикистон бахшида ба Рӯзи Модар бо иштироки ходимони давлатӣ, фаъолони арсаи сиёсат ва ҷомеа, намояндагони вазорату идораҳо ҳамоиши тантанавӣ баргузор гардид.
Дилрабо Мансурӣ, муовини Сарвазири мамлакат иброз дошт, ки дар сатҳи давлатӣ ҷашн гирифтани Рӯзи Модар нишонаи эътибору эҳтироми зиёди давлату Ҳукумати мамлакат нисбат ба модарон ва дар даврони соҳибистиқлолӣ соҳиби мақому манзалати хосса гардидани онҳо мебошад. Занони тоҷик аз оғози даврони истиқлоли давлатӣ ба хотири ҳифзи ҳуқуқу озодиҳои худ ва ба эътидол овардани вазъи мамлакат азму талош намуда, дар роҳи расидан ба сулҳу субот ва ваҳдати миллӣ бо нангу номуси ватандӯстӣ ва заҳмати софдилона дар пешрафти тамоми соҳаҳои ҳаёти ҷомеа саҳми арзишманд мегузоранд. Имрӯз бо қаноатмандӣ метавон гуфт, ки дар натиҷаи дастгирию ғамхориҳои пайвастаи Пешвои миллат муҳтарам Эмомалӣ Раҳмон занону духтарони лаёқатманд ба хизмати давлатӣ ва идоракунии давлатӣ бештар ҷалб гардида, дар вазифаҳои пурмасъули роҳбарикунандаи хизмати давлатӣ сарбаландона адои вазифа менамоянд.
Бунафша Файзиддинзода, раиси Кумитаи кор бо занон ва оила, зимни суханронӣ гуфт, ки Ҳукумати мамлакат барои беҳтар гардондани вазъи иҷтимоии занон тадбирҳои зарурӣ андешида, баҳри ҷалби бештари онҳо ба ҳаёти сиёсӣ ва ҷамъиятии ҷомеа корҳои судманд амалӣ менамояд. Ҳукумати мамлакат минбаъд низ ба занону духтарон ҳамчун неруи пешбарандаи ҷомеа такя намуда, барои ҳалли мушкилоти онҳо тамоми тадбирҳои заруриро хоҳад андешид. 

Гулнисои САЪДОНШО, «Ҷумҳурият»

ТОҶИКОБОД. ДАСТУРҲОИ ПАЁМ САРМАШҚИ КОРИ МАРДУМ АСТ 
Имрӯзҳо шарҳу тавзеҳи Паёми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ дар саросари кишвар идома дорад. Бо ин мақсад, гурӯҳҳои алоҳида ташкил шуда, байни мардум вохӯрӣ ва суҳбатҳо доир менамоянд.
Аз ҷумла, дар асоси нақшаи чорабиниҳои Мақомоти иҷроияи маҳаллии ҳокимияти давлатии ноҳияи Тоҷикобод, ҳар рӯз бо аҳли ҷамоатчигӣ вохӯриву суҳбатҳо сурат мегиранд. Дар рафти мулоқот раиси ноҳия Қадриддин Фақерзода, роҳбарони мақомоти ҳифзи ҳуқуқ, ташкилоту муассисаҳо нуктаҳои муҳими Паёми Президентро ёдрас шуда, мардумро ба иҷрои дастурҳои Сарвари давлат даъват менамоянд.
Ба роҳ мондани корҳои созандагию ободонӣ, тарбияи насли ҷавон дар руҳияи донишомӯзӣ ва ҳунарандӯзӣ, баланд бардоштани эҳсоси ватанпарастӣ ва пешгирии шомилшавии сокинон ба ҳизбу ҳаракатҳои ифротӣ, риояи ҳатмии санадҳои меъёрию ҳуқуқии Ҷумҳурии Тоҷикистон, баланд бардоштани сифати таълиму тарбия дар муассисаҳои таълимӣ, бунёди муассисаҳои томактабӣ дар ҳар як деҳа, омодагии ҷиддӣ дидан барои таҷлили Ҷашни Наврӯз ва оғози корҳои кишоварзӣ, аз ҷумла кишти картошка, самараноку мақсаднок истифода намудани ҳар як ваҷаб замин ва пешгирии пошхӯрии оилаҳои ҷавон масъалаҳоеанд, ки бо сокинон муҳокима мешаванд.

Гулнисои САЪДОНШО, «Ҷумҳурият»