САДОИ РОСТИНИ ЗАМОНИ ИСТИҚЛОЛ

САДОИ РОСТИНИ ЗАМОНИ ИСТИҚЛОЛ

Ба ифтихори 33-юмин солгарди «Суғд ҳақиқати»

Аз саҳифаи рӯзнома то саҳифаи таърих

Матбуот ҳамеша аз муҳимтарин нишонаҳои рушди ҷомеа ба шумор меравад. Ҳар қадар ҷомеа пешрафтаву огоҳ бошад, ҳамон андоза ба сухани рост, таҳлили воқеъбинона ва андешаи солим эҳтиёҷ дорад. Аз ҳамин ҷост, ки рӯзнома дар ҳама давру замон танҳо воситаи иттилоърасонӣ набуда, балки махзани маърифат, минбари афкори ҷамъиятӣ ва ойинаи зиндагии мардум маҳсуб меёбад.

Дар таърихи матбуоти Тоҷикистони соҳибистиқлол нашрияҳое ҳастанд, ки аз доираи рисолати маъмулии иттилоърасонӣ берун рафта, ба ҷузъи муҳими ҳаёти сиёсиву иҷтимоӣ ва фарҳангии кишвар табдил ёфтаанд. Дар миёни онҳо рӯзномаи «Суғд ҳақиқати» мақоми хос дорад. Тайи беш аз се даҳсола ин нашрия ба забони ӯзбекӣ набзи зиндагии мардумро инъикос намуда, дар ташаккули фазои ягонаи иттилоотӣ ва таҳкими дӯстии халқҳои тоҷику ӯзбек саҳми арзанда гузоштааст. Имрӯз номи «Суғд ҳақиқати» бо таърихи матбуоти ӯзбекзабони Тоҷикистон, бо фаъолияти чанд насли рӯзноманигорон ва бо садоқати аҳли қалам ба касби худ пайванди ногусастанӣ дорад.

Рӯзи нашри «Суғд ҳақиқати»

1-уми июли соли 1993 шумораи нахустини рӯзномаи «Ленинобод ҳақиқати» аз чоп баромад. Чанде баъд, бо иваз шудани номи вилояти Ленинобод ба Суғд, рӯзнома низ номи нави худро гирифт – «Суғд ҳақиқати».

Бо вуҷуди мушкилоти иқтисодӣ, камбуди таҷҳизоти техникӣ ва шароити маҳдуди молиявӣ ҳайати таҳририя аз иҷрои рисолати худ даст накашид. Барои аҳли эҷод муҳимтарин сармоя на шароити кор, балки боварии хонандагон буд. Маҳз ҳамин эҳсоси масъулият рӯзномаро аз имтиҳони солҳои душвор сарбаланд гузаронд.

Минбари дӯстии тоҷикону ӯзбекон

Яке аз вижагиҳои муҳими «Суғд ҳақиқати» дар он аст, ки рӯзнома аз оғози фаъолияташ танҳо рисолати иттилоърасонӣ надошт. Он ба минбари таҳкими дӯстии халқҳои тоҷику ӯзбек табдил ёфт.

Дар саҳифаҳояш пайваста матолиби ҷолиб дар бораи таърихи муштарак, мероси адабӣ, суннатҳои мардумӣ, ҳамкориҳои иқтисодӣ ва фарҳангии ду кишвар ба нашр мерасанд. Хусусан, дар солҳои охир, ки муносибатҳои Тоҷикистону Ӯзбекистон ба сатҳи нави шарикии стратегӣ расидаанд, нашрияи «Суғд ҳақиқати» ин равандро бо таҳлилҳои ҷолиб, мусоҳибаҳо ва гузоришҳои фарогир инъикос намуда, ба таҳкими фазои дӯстӣ ва ҳамдигарфаҳмӣ мусоидат кардааст. Бо нашрияҳои вилоятии «Farg'ona haqiqati», «Yangi Sirdaryo»-и Ҷумҳурии Ӯзбекистон ва «Баткен таны»-и Ҷумҳурии Қирғизистон ҳамкориҳоро ба роҳ монда, саҳифаҳои муштаракро ба нашр мерасонад.

Эътирофи заҳмати аҳли қалам

Солҳои охир ҳайати эҷодӣ фаъолияти худро ба талаботи замони муосир мутобиқ месозад. Дар баробари нашри коғазӣ, аз имкониятҳои технологияҳои рақамӣ низ истифода карда, дорои сомонаи интернетӣ ва саҳифа дар шабакаҳои иҷтимоӣ мебошад. Ин иқдом имкон додааст, ки хонандагони «Суғд ҳақиқати» на танҳо дар шаҳру ноҳияҳои вилояти Суғд, балки дар дигар минтақаҳои Тоҷикистон ва берун аз он низ аз муҳтавои рӯзнома баҳра бардоранд.

Пешрафти рӯзнома, пеш аз ҳама, натиҷаи заҳмати аҳли қалам аст. Имрӯз дар ҳайати таҳририя наздики бист нафар фаъолият дорад, ки ҳар кадом бо масъулияти баланди касбӣ барои таҳияи маводи хонданбоб, воқеъбинона ва пурмуҳтаво саҳм мегузорад. Маҳз ҳамин меҳнати дастаҷамъона имкон додааст, ки рӯзнома эътибори худро нигоҳ дорад.

Сиву се соли фаъолияти «Суғд ҳақиқати» нишон медиҳад, ки эътибори рӯзнома на бо шумораи саҳифаҳо ё теъдоди нашр, балки бо эътимоди хонандагон, садоқати аҳли қалам ва хидмати содиқона ба ҷомеа муайян мешавад. Дар ин муддат нашрия на танҳо воқеаҳои замонро сабт кардааст, балки дар ташаккули афкори ҷомеа, таҳкими дӯстии халқҳои тоҷику ӯзбек ва рушди матбуоти ӯзбекзабони Тоҷикистон саҳми арзанда гузоштааст. Ин аст, ки имрӯз «Суғд ҳақиқати» ҳамчун яке аз нашрияҳои бонуфузи кишвар роҳи пуршарафи худро бо ҳамон рисолати наҷиб – хидмат ба мардум, давлат ва ҳақиқат – идома медиҳад.

Зуҳриддин УМАРОВ,

котиби масъули рӯзномаи «Халқ овози»,

номзади илмҳои филология

Санаи нашр: 17.08.2026 №: 160