ФУТЗАЛ. ТОҶИКИСТОН БО ДАСТАҲОИ ИСПАНИЯ ВА НИДЕРЛАНД БОЗИҲОИ ДӮСТОНА АНҶОМ МЕДИҲАД

Дастаи мунтахаби футзали Тоҷикистон таҳти роҳбарии Пайрав Воҳидов дар доираи омодагӣ ба Ҷоми ҷаҳон-2024 моҳи сентябр дар Душанбе бо тимҳои миллии Испания ва Нидерланд ду бозии дӯстона анҷом медиҳад.

Футболбозони мо 5-уми сентябр бо тими миллии Испания ва 8-уми сентябр бо мунтахаби Нидерланд вомехӯранд. Ҳамчунин, рӯзи 7-уми сентябр дар Душанбе вохӯрии дастаҳои мунтахаби Испания ва Нидерланд баргузор мешавад. Ҳар се бозии дӯстона дар маҷмааи варзишии «Кохи Олимп»-и Душанбе сурат мегиранд.

Бояд гуфт, ки тими миллии Тоҷикистон дар Чемпионати ҷаҳон (14. 09. 24-6. 10. 24, Ӯзбекистон) дар гурӯҳи «Е» бо мунтахабҳои Марокаш (16-уми сентябр), Португалия (19-уми сентябр) ва Панама (22-юми сентябр) қувва меозмояд.  

Умаралӣ САФАРАЛӢ, “Ҷумҳурият”