БОХТАР. БО СИМОИ НАВ БА ОЯНДАИ ДУРАХШОН
Дар шаҳри Бохтар ба ифтихори Ҷашни 35-солагии Истиқлоли давлатӣ бунёди беш аз 260 иншооти таъиноташон гуногун дар нақша аст. То имрӯз қисми зиёди иншооти ҷашнӣ сохта ва ба истифода дода шуда, корҳои сохтмонӣ дар дигар иншоот босуръат идома доранд.
Аз ҷумла, дар маҳаллаи Турсунзода аз тарафи соҳибкори маҳаллӣ меҳмонхонаи «Аниса» сохта шуд, ки дорои 18 ҳуҷраи барҳаво мебошад. Иншоот имконият дорад, ки то 50 меҳмонро қабул намуда, бо хидматрасонии босифат ба рушди соҳаи сайёҳӣ ва беҳтар гардидани инфрасохтори хидматрасонӣ дар маркази вилоят мусоидат кунад.
Инчунин, сохтмони бинои иловагии Муассисаи таҳсилоти миёнаи умумии №14, ки барои 640 хонанда дар як баст пешбинӣ шудааст, идома дорад. Дар кӯчаи Садриддин Айнӣ бошад, корҳои сохтмонӣ дар бинои нави маъмурии раёсати Хадамоти давлатии оташнишонии вилояти Хатлон дар марҳалаи анҷомёбӣ буда, корҳои рангуборкунии дохили бино ва васлу насби дастгоҳу таҷҳизоти зарурӣ идома доранд. Иншооти панҷошёна дорои таҳхона буда, аз ҳисоби маблағҳои Мақомоти иҷроияи маҳаллии ҳокимияти давлатии вилояти Хатлон маблағгузорӣ шудааст.
Бо мусоидати МИМҲД вилоят аз тарафи соҳибкорони саховатпешаи шаҳр бинои нави Муассисаи таҳсилоти томактабии №14 барои 200 кӯдак бунёд мегардад. Илова бар ин, сохтмони бинои нави раёсати Кумитаи ҳолатҳои фавқулода ва мудофиаи гражданӣ дар вилояти Хатлон, раёсати Агентии давлатии суғуртаи иҷтимоӣ ва нафақаи назди Ҳукумати Ҷумҳурии Тоҷикистон дар вилоят ва ду бинои нави таълимии назди Коллеҷи тиббии шаҳри Бохтар дар сатҳи баланд идома доранд.
Ба гуфтаи Рустамшо Ҷаҳонгир, мудири шуъбаи иттилоотию таҳлилии дастгоҳи раиси вилояти Хатлон, дар доираи корҳои ободониву созандагӣ лоиҳаи ангоравии даромадгоҳи шаҳр муаррифӣ гардид. Мувофиқи лоиҳаи пешниҳодшуда, маркази маъмурии вилояти Хатлон – шаҳри Бохтар соҳиби рамзи нави меъморӣ хоҳад шуд. Ин иншооти зебои меъморӣ дар даромадгоҳи асосии шаҳр, дар шоҳроҳи Бохтар – Душанбе, бунёд гардида, ҳамчун яке аз рамзҳои шаҳр ба ҳусни маркази маъмурии вилоят зебоии тоза зам хоҳад кард. Тарҳи иншоот бо дарназардошти хусусиятҳои миллӣ, таърихӣ ва фарҳангии шаҳри Бохтар таҳия шудааст. Дар он унсурҳои хоси меъмории миллӣ ва рамзҳои марбут ба таърихи куҳани минтақа таҷассум хоҳанд ёфт.
Дар маҷмуъ, корҳои ободониву созандагӣ дар шаҳри Бохтар ба истиқболи Ҷашни 35-солагии Истиқлоли давлатӣ бомаром идома дошта, мавриди баҳрабардорӣ қарор гирифтани иншооти нави иҷтимоӣ, маъмурӣ, таълимӣ ва хидматрасонӣ дар рушди инфрасохтори шаҳр, беҳтар гардидани сатҳи хидматрасонӣ ва баланд бардоштани шароити зиндагии сокинон саҳми назаррас хоҳад гузошт.
Кароматулло АТО,
“Ҷумҳурият”
