ФУТЗАЛ
Чемпионати Тоҷикистон миёни бонувони то 19-сола оғоз шуд
Мавсими дуюми Чемпионати Тоҷикистон оид ба футзал байни бонувони то 19-сола оғоз шуд, ки дар он 12 даста – «Душанбе» (Душанбе), МД МВ (Бохтар), «Хатлон-2» (Кӯлоб), «Панҷшер» (Ҷалолиддини Балхӣ), «Бешкент» (Носири Хусрав), «Ситора» (Шаҳринав), «Коллеҷи тиббӣ» (Хуҷанд), «Зафаробод» (Зафаробод), «Бунҷикат» (Шаҳристон), «ММВФЧА Хуҷанд» (Хуҷанд), «Ашт» (Ашт) ва «Навбаҳор» (Мастчоҳ) ширкат мекунанд.
Тибқи муқаррарот ҳар даста имкон дорад, дар рӯйхат ду бозигари аз 19-сола боло ворид кунад. Дар марҳалаи муқаддамотӣ бозиҳо дар ду минтақа аз рӯйи системаи даврӣ дар ду давра гузаронда мешаванд. Аз ҳар гурӯҳ ду даста ба қисми ниҳоӣ роҳ ёфта, ҷуфтҳои нимниҳоиро ташкил мекунанд. Баъдан рақобат барои зинаи сеюм ва финал барпо мегардад.
ФУТБОЛ
Дар Душанбе курси омӯзишӣ аз рӯйи барномаи иҷозатномаи «PRO» доир гашт
Дар шаҳри Душанбе марҳалаи дуюми курсҳои омӯзишӣ барои мураббиёни футбол аз рӯйи барномаи «Pro» – системаи олии таълими мураббигӣ баргузор шуд.
Дастурдиҳандаи асосии курсҳо инструктори FIFA Гайоз Дарсадзе аз Гурҷистон, ёварони ӯ инструктори FIFA ва AFC Усмон Тошев (Ӯзбекистон) ва дастурдиҳанда Вако Дарсадзе (Гурҷистон) буданд.
Курси омӯзишӣ, ки шаш рӯз идома кард, ба ҷанбаҳои муҳими идоракунии футбол бахшида шуд. 19 мутахассис: Тоҳирҷон Муъминов, Рустам Хоҷаев, Субҳон Хоҷамов, Алишер Тӯйчиев, Баҳодур Сӯфиев, Шамсиддин Қосимов, Файз Давлатов, Увайдо Давлатбеков, Салоҳиддин Ғафуров, Алифбек Беромов, Сиёвуш Боев, Фаррух Марофиев, Шариф Зиёев, Асрорҷон Шораҷабов, Зариф Усмонов (ҳама аз Тоҷикистон), Амин Субҳонӣ (Эрон), Игор Суров (Русия), Акмал Холиқов ва Акмал Рустамов (ҳар ду аз Ӯзбекистон) барои гирифтани литсензияи мураббигии «Pro» омӯзиш гирифтанд.
Курсҳои мураббигӣ барои довталабони иҷозатномаи «Pro» аз панҷ марҳала иборат буда, соли оянда ба анҷом мерасанд.
МУҲОРИБАҲОИ ОМЕХТА
Доробшо Наботов барои расидан ба UFC бо Матеуш Камилё муҳориба мекунад
Размкори тоҷик Доробшо Наботов 14-уми декабр дар шаҳри Кояни Ҷумҳурии Корея бо намояндаи Бразилия Матеус Камилё рақобат мекунад ва дар сурати пирӯзӣ ба ташкилоти бузурги UFC роҳ хоҳад ёфт.
Д. Наботов нуҳ муҳориба гузаронда, дар ҳамааш ғолиб омадааст. Ӯ рақобати охири худро моҳи ноябри соли 2023 муқобили Мурод Биларов дар мусобиқаи AMC Fight Nights 122 гузаронда, ғалаба кард.
Матеус Камилё бошад, 10 рақобат гузаронда, 8 ғалаба ва 2 бохт дорад.
Умаралӣ САФАРАЛӢ,
“Ҷумҳурият”
