ВАҚТЕ ДАРИ ДИЛ БОЗ АСТ...

ГУЗОРИШ АЗ КУШОДА ШУДАНИ ГУЗАРГОҲИ САРҲАДӢ МИЁНИ ТОҶИКИСТОНУ ҚИРҒИЗИСТОН
Дар ҷараёни сафари давлатии Президенти Ҷумҳурии Тоҷикистон муҳтарам Эмомалӣ Раҳмон ба Ҷумҳурии Қирғизистон ва баъд аз имзои Шартнома дар бораи сарҳади давлатӣ аз тарафи сарварони ду давлат расман гузаргоҳҳои марзии Гулистон – Қизил – Бел ва Маданият – Қайрағоч боз шуданд. Инак, баъди зиёда аз чаҳор сол шуруъ аз 13-уми марти соли равон шаҳрвандони ду давлати ҳамсоя ҳуқуқи рафтуомад ба кишварҳои ҳамдигарро пайдо карданд ва дигар ба масъалаи баҳсҳои марзӣ нуқта гузошта шуд. Мардуми садсолаҳо ҳамсояву ба ҳам дӯст бо чеҳраи кушода, бо табассуми самимӣ оғӯш ба сӯи ҳамдигар кушоданд...
Аллакай, субҳи барвақт дар гузаргоҳи сарҳадии Гулистон аз тарафи шаҳри Исфараи вилояти Суғди Тоҷикистон ва дар ҷониби гузаргоҳи Қизил-Бели ноҳияи Лайлаки вилояти Бодкени Қирғизистон мардуми зиёде дар фазои идона ҷамъ омада, аз ҳар ду тараф садои мусиқии карнай, сурнай ва доира танинандоз гашт. Духтарон бо либосҳои зебои миллӣ дар даст парчамҳои давлатӣ канори роҳи рӯ ба сарҳад саф ороста, омодагӣ медиданд. 
– Бисёр рамзӣ ҳам ҳаст, ки роҳбарони ду давлати ҳамсоя маҳз дар рӯзҳои фасли баҳорӣ, мавсими сабзишу нашъунамо, арафаи Ҷашни Наврӯзи байналмилалӣ бо ҳам вохӯрда, мулоқот карданд ва тасмим гирифтанд, ки бо имзо гузоштан ба Шартнома дар бораи сарҳади давлатӣ, ба ҳалли мушкилоти дерина нуқта гузоранду боз рафтуомади шаҳрвандони ҳар ду кишвар ба роҳ монда шавад. Магар ин воқеаи таърихӣ нест? Ин ҳодисаи муҳими таърихӣ аз сиёсати дурандешона, хирадмандонаю халқпарваронаи сарварони давлатҳо гувоҳӣ медиҳад, – иброз дошт Гулафзо Савриддинова, собиқадори меҳнат, ходими давлатӣ. 
– Ман Ишмет Алимбеков, миллатам қирғиз аз шаҳраки Хонаобод ҳастам. Дар Тоҷикистон таваллуд шудаву дар ҳамин ҷо ба воя расидам. Тоҷикистон бароям азиз аст. Баъд аз қариб чор соли ҷудоӣ, боз ба дидори пайвандонам аз вилояти Бодкен мерасам. Сипоси беҳад ба сарварони кишварҳо, ки масъалаи даҳсолаҳо ҳалношудаи марзиро оқилона ҳаллу фасл карданд. 
То оғози чорабинии расмӣ бо Айбек Шаменов, намояндаи ваколатдори Президенти Ҷумҳурии Қирғизистон суҳбати сарироҳӣ анҷом додам. Ӯ гуфт:
– Кушода шудани гузаргоҳи марзӣ аз сиёсати дурандешонаи роҳбарони ду давлати ба ҳам дӯсту ҳамсояи нек далолат медиҳад. Халқҳои тоҷику қирғиз асрҳо боз робитаи тиҷоративу фарҳангӣ доранд ва бояд минбаъд ҳамкориро дар ҳамаи самтҳо, хусусан, фарҳангу варзиш, маориф, тиб ва, албатта, иқтисодиву сайёҳӣ ба роҳ монем, ки талаби замон аст.
Инак, лаҳзаҳои таърихӣ фаро мерасанд. Сарварони ду давлат муҳтарам Эмомалӣ Раҳмон ва Садир Жапаров дар баробари дигар созишномаҳои ҳамкорӣ, ба Шартномаи давлатӣ оид ба сарҳади давлатӣ имзо мегузоранду ба таври фосилавӣ дар маросими кушода шудани гузаргоҳҳо миёни ду кишвар иҷозат медиҳанд, ки ин лаҳзаҳоро тавассути экрани бузурги дар хатти марз насбшуда ҳозирин – ширкаткунандагони зиёди ҳар ду ҷониб тамошо доранд. Бо садои хушнудӣ, бо нидоҳои “Зиндаву поянда бод дӯстии тоҷику қирғиз” нахуст бародарони қирғиз сокинони Тоҷикистонро бо роҳбарии раиси вилоят Раҷаббой Аҳмадзода ба тарафи хеш хонданд. Меҳмононро Айбек Шаменов, намояндаи ваколатдори Президенти Қирғизистон ва дигар масъулини вилояти Бодкен пазироӣ карда, ба намоиши маҳсулоти саноативу ҳунармандӣ, хаймаҳои идона орододашуда роҳбаладӣ карданд. Дегҳои суманак дар ҷӯш буданду кадбонуҳо таомҳои миллӣ омода мекарданд ва, ҳамзамон, пирони корозмуда ба хотири дӯстии абадии ду халқи ҳамсоя, самимона дасти дуо мебардоштанд:
–То даме, ки замину осмон ҳасту Офтоб шуъла мепошад, дӯстии тоҷику қирғиз зинда бод, - нидо мекунад бонуи рӯзгордида. Дигаре бо чеҳраи кушод меҳмононро ба суманакхӯрӣ даъват мекунад...

Ҷовиди АШТӢ,  “Ҷумҳурият”