НАҚЛИЁТ. АЗ АФЗУДАНИ БОРКАШОНИИ ТРАНЗИТӢ ТО ВУСЪАТИ ТАТБИҚИ ЛОИҲАҲО

Зикр шуд, ки ба ҳолати аввали моҳи апрел, 2831 корхона бо шаклҳои гуногуни моликият фаъолият мекунад. Ҳамзамон, 887 хатсайри мусофирбарӣ, аз ҷумла 181 шаҳрӣ, 507 наздишаҳрӣ, 168 байнишаҳрӣ ва 31 хатсайри байналмилалӣ ба қайд гирифта шудааст. Ба маълумоти Агентии омор, тавассути ҳама намудҳои нақлиёт 29 миллион тонна бор ва 252 миллион мусофир интиқол ёфта, нисбат ба ҳамин давраи соли гузашта боркашонӣ 12,3 ва мусофирбарӣ 8,3 дарсад зиёд гардид.

Ҳиссаи интиқолдиҳандагони ватанӣ дар ҳамлу нақли байналмилалӣ ҳамагӣ 53,9 дарсадро ташкил дод, ки нисбат ба ҳамин давраи соли гузашта 2,8 дарсад кам аст. Яке аз сабабҳои асосии камшавии нишондиҳанда сари вақт дастрас нагардидани рухсатномаҳо аз баъзе давлатҳо ва аз ҷониби ширкатҳои нақлиётӣ истифода нашудани қисмате аз рухсатномаҳои дастрасшуда мебошад.

Лоиҳаҳои сармоягузории давлатӣ дар соҳаи роҳу нақлиёт таҳти таваҷҷуҳ буда, тавассути Вазорат 12 лоиҳаи сармоягузорӣ ба маблағи 1 миллиарду 79 миллион доллари ИМА амалӣ мешавад.

“Соҳаи роҳу нақлиёт на танҳо яке аз бахшҳои калидии иқтисодиёти кишвар маҳсуб меёбад, балки рушди тамоми соҳаҳои иқтисодию иҷтимоии мамлакат ба фаъолияти мураттаб ва босифати он вобаста мебошад. Бинобар ин, мо бори масъулияти бузургеро бар дӯш дорем ва вазифадор ҳастем, ки онро бо иззат ва каромат, сарбаландона ва ифтихормандона пеш барем”, – гуфт Азим Иброҳим.

Дар зимн, вазир хотирнишон намуд, ки соли равон корҳои сохтмонӣ дар роҳи автомобилгарди Данғара – Гулистон (49 километр) ва Гулистон – Фархор (29,6 километр) оғоз гардиданд. Ҳамзамон, имсол тибқи 5 лоиҳаи дигар, 23 пули автомобилгард бо дарозии 1,9 км, 3 нақб бо дарозии 5,2 км ва 180 км роҳҳои дорои аҳамияти байналмилалӣ ва ҷумҳуриявӣ, аз ҷумла роҳҳои автомобилгарди Роғун – Обигарм – Нуробод, Қалъаихумб – Ванҷ – даромадгоҳи ноҳияи Рӯшон, қитъаи роҳ аз шоҳроҳи Душанбе – Рашт то шаҳраки Роғун ва нақби «Истиқлол» ба истифода дода мешаванд.

Азим Иброҳим ба камбудиҳои мавҷуда дар фаъолияти соҳа ишора карда, дар назди сохторҳои дахлдор ҷиҳати сари вақт бартараф сохтани онҳо вазифаҳои мушаххас гузошт. Аз ҷумла, дастур дод, ки МД «Нақлиёти автомобилӣ ва хизматрасонии логистикӣ» ва КВД «Маркази рақамикунонии соҳаи нақлиёт» ҷиҳати татбиқи Барномаи давлатии рушди низоми логистика дар Ҷумҳурии Тоҷикистон барои солҳои 2023-2028 ва Барномаи миёнамуҳлати рушди иқтисоди рақамӣ дар Ҷумҳурии Тоҷикистон барои солҳои 2021-2025 тадбирҳои зарурӣ андешида, дар қаламрави кишвар ва берун аз он, аз ҷумла дар бандари баҳрии Чобаҳори Ҷумҳурии Исломии Эрон ва шаҳри Қошғари Ҷумҳурии Мардумии Чин, марказҳои логистикӣ боз намоянд, кори агентҳо - экспедиторҳоро тақвият бахшанд, платформаи ягонаи иттилоотии маҷмааи логистикии кишварро таъсис диҳанд.