ВОХӮРИИ ҒАЙРИРАСМИИ РОҲБАРОНИ КИШВАРҲОИ ИШТИРОКЧИИ ИТТИҲОДИ ДАВЛАТҲОИ МУСТАҚИЛ

26-уми декабр Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар вохӯрии ғайрирасмии роҳбарони давлатҳои иштирокчии Иттиҳоди Давлатҳои Мустақил ширкат варзиданд. Дар ҷараёни мулоқот, ки дар шаҳри Санкт-Петербурги Федератсияи Русия доир гардид, сарварони давлатҳо ва ҳукуматҳо ҳолати ҷорӣ ва дурнамои ҳамкориҳоро дар қолаби ИДМ мавриди баррасӣ қарор доданд. Дар ин зимн, масоили таҳкими муколамаи сиёсӣ дар чорчӯби Иттиҳод, ҳамчунин, рушди минбаъдаи ҳамкорӣ миёни кишварҳои иштирокчӣ дар соҳаҳои тиҷоративу иқтисодӣ, фарҳангиву гуманитарӣ ва амният ҳамчун вазифаҳои рӯзмарра муайян гардиданд. Ҳамзамон бо ин, мубодилаи афкор атрофи доираи васеи масъалаҳои мубрами дорои аҳамияти минтақавӣ ва байналмилалӣ сурат гирифт.