ХАТЛОН. ТАҚВИЯТИ ФАЪОЛИЯТИ СИТОДИ МУБОРИЗА БАР ЗИДДИ МАЛАХ АЗ МАСЪАЛАҲОИ МЕҲВАРӢ
8-уми январ дар Мақомоти иҷроияи маҳаллии ҳокимияти давлатии вилояти Хатлон бо иштироки раиси вилоят Давлаталӣ Саид, раисони шаҳру ноҳияҳои Левакант, Кӯшониён, Вахш, Панҷ, Хуросон, Қубодиён, Абдураҳмони Ҷомӣ, Данғара, Фархор, Ҷалолиддини Балхӣ, Ҷайҳун, Мир Сайид Алии Ҳамадонӣ, Ёвон, Шаҳритус, Дӯстӣ, Носири Хусрав, Темурмалик ва роҳбарони сохторҳои марбутаи вилоятӣ ҷаласаи ситоди корӣ оид ба мубориза бар зидди малах баргузор гардид.
Дар ҷаласа зикр шуд, ки соли ҷорӣ низ эҳтимоли паҳншавии малах дар ноҳияҳои кӯҳистон вуҷуд дорад, бинобар ин, аз имрӯз бояд барои нест кардани ин ҳашароти зараррасон тадбирҳо андешида шаванд.
Раиси вилояти Хатлон Давлаталӣ Саид зимни суханронии хеш бо мақсади омодагӣ ба мавсими мубориза бар зидди малах, сари вақт гузарондани чорабиниҳо ва дар ин замина, муҳофизати майдони кишти зироатҳои кишоварзӣ, чарогоҳҳо ва ҷангалзорҳо аз малахи марокашӣ, инчунин, ҳаллу фасли мушкилоту камбудиҳо ба масъулон супориш дод, ки талаботи амри раиси вилоят оид ба Ситоди вилоятии мубориза бар зидди малах таъмин карда шавад, дар шаҳру ноҳияҳо ва ҷамоатҳои деҳоти осебпазир аз малах ситодҳои шаҳрию ноҳиявии мубориза бар зидди малах таъсис дода шуда, ба камбудиҳои соли гузашта роҳ дода нашавад.
Инчунин, раисони шаҳру ноҳияҳо вазифадор гардиданд, ки барои ба пуррагӣ сафарбар намудани раисони ҷамоатҳои деҳот, хоҷагиҳои деҳқонию фермерӣ, дигар заминистифодабарандагон, инчунин, дар сурати зарурат, ташкилоту муассисаҳои шаҳру ноҳияҳо новобаста ба шакли моликият ба чорабиниҳои мубориза бар зидди малах тадбирҳои зарурӣ андешанд.
Роҳбарони филиалҳои Муассисаи давлатии «Экспедитсияи мубориза бар зидди малах» дар минтақаҳои Бохтар ва Кӯлоб вазифадор шуданд, ки дар муҳлати кӯтоҳтарин мушоҳидаҳои зимистонаро оид ба муайян намудани мавзеъҳои тухмгузории малах ба анҷом расонанд, дар ҳар як шаҳру ноҳия харитаи мавзеъҳоро муайян карда, коркарди техникиро дар ин мавзеъҳо ба роҳ монанд. Дар ҳамкорӣ бо сохтори болоии худ ҷиҳати сари вақт таъмиру омода кардани техникаю мошинолоти корхона ва ба миқдори зарурӣ захира намудани заҳрхимикатҳои сахттаъсир тадбирҳои заруриро амалӣ намоянд, якҷо бо МИМҲД шаҳри Бохтар ҷиҳати таъмиру омода кардани мошинаи обкашонии КВД “Хоҷагии манзилию коммуналӣ”-и шаҳр ва дар мавсими мубориза бар зидди малах сафарбар намудани он чораҳои зарурӣ андешанд.
Зокир ҲАСАН, "Ҷумҳурият"
