ҶУДО

Аввалин медал дар соли 2025
Варзишгари тоҷик Рошид Неъматов дар Ҷоми кушоди Африқо оид ба ҷудо миёни наврасон ба гирифтани медали тилло мушарраф шуд. 
Ҷоми кушоди Африқо оид ба ҷудо миёни наврасон, ҷавонон ва калонсолон 16-19-уми январ дар шаҳри Касабланкаи Марокаш доир гашт.
Рошид дар зӯрозмоиҳо миёни наврасон дар вазни -73 кг дар ду давр паҳлавонони мизбонро мағлуб карда, ҷойи аввалро гирифт. Ӯ миёни ҷавонон низ маҳорат санҷида, мақоми ҳафтумро сазовор гашт.

ФУТБОЛ
Фонди ҷоизаҳои Ҷоми ФФТ-2025 – 100 ҳазор сомонӣ
Фонди ҷоизаҳои мусобиқаи пешазмавсимӣ – Ҷоми Федератсияи футболи Тоҷикистон, ки зери сарпарастии президенти Федератсияи футболи кишвар баргузор мегардад, дар ҳаҷми 100 ҳазор сомонӣ муайян гардид. 
Дастаи ғолиб 50 ҳазор сомонӣ, барандаи ҷойи дуюм – 30 ҳазор ва зинаи сеюм 20 ҳазор сомонӣ ба даст меоранд. 
Ба марҳалаи ниҳоии мусобиқа чор даста аз минтақаи Душанбе ва дудастаӣ аз минтақаҳои Суғду Хатлон роҳхат мегиранд.

Пирӯзии тими наврасони Тоҷикистон (U-17) бар дастаи «Лехия»
Дастаи мунтахаби наврасони то 17-солаи Тоҷикистон таҳти роҳбарии Марко Раҷини омодагиро ба марҳалаи ниҳоии Ҷоми Осиё-2025 дар Анталияи Туркия идома медиҳад.
Футболбозони навраси мо 20-уми сентябр сеюм бозии санҷиширо муқобили дастаи «Лехия Зелена Гура»-и Лаҳистон анҷом доданд. Вохӯрӣ бо ҳисоби 2:0 ба фоидаи тими мо хотима ёфт. Голҳоро Садриддин Сатторов ва Абдулло Иброҳимзода заданд.
Тими наврасони кишвар қаблан бар тими «Манавгат Беледиеспор»-и Туркия (U-19) бо ҳисоби 1:0 ғалаба карда, аз дастаи «Спартак» (Суботитса, Сербия) бо ҳисоби 1:5 мағлуб шуд.
Бозии санҷишии охирини дастаи мунтахаби наврасони мо дар ҷамъомади таълимиву тамринӣ дар Туркия 23-юми январ бо дастаи Академияи «Краснодар» дар назар аст.

МУҲОРИБАҲОИ ОМЕХТА
Муин Ғафуров дар UFC размандаи ҷопониро шикаст дод
Варзишгари маъруфи кишвар Муин Ғафуров дар мусобиқаи UFC-311, ки 19-уми январ дар Иёлати Калифорнияи ШМА доир гашт, дар вазни сабуктарин Риня Накамураи ҷопониро шикаст дод.
Зӯрозмоӣ се раунд идома кард ва Муин бо қарори якдилонаи доварон пирӯз шуд (30-27, 30-27, 30-27). Ҳамин тариқ, ӯ ғалабаи 20-уми худро дар муҳорибаҳои омехта ба даст овард. Муин Ғафурови 28-сола дар ММА ҳамагӣ 26 муҳориба анҷом дода, дар 20-тоаш пирӯз шуда, дар 6-тоаш шикаст хӯрдааст, аз ҷумла дар UFC (Ultimate Fighting Championship) аз чор зӯрозмоӣ дар дутоаш ғолиб омада, дутоашро бохтааст.

БОЗИҲОИ ОСИЁ
Оташи Бозиҳои 9-уми зимистонаи Осиё фурӯзон шуд
Маросими афрӯхтани оташ 20-уми январ - 18 рӯз пеш аз маросими ифтитоҳи Бозиҳои зимистонаи Осиё дар Ҳарбини Чин доир гашт.
Дар баробари эстафетаи анъанавии машъал, эстафетаи онлайни машъал низ, бо мақсади ҷалби ҷомеаи ҷаҳонӣ ба бозиҳои варзишии рӯйи яху барф, ки рӯзҳои 7-14 феврал баргузор мешавад, оғоз ёфт. Кумитаи тадорукоти Бозиҳо аз корбарони интернет дар саросари ҷаҳон даъват кард, ки ҳамчун машъалбардорони рақамӣ дар Бозиҳои 9-уми зимистонаи Осиё ҳамроҳ шаванд.
"Тавассути платформаҳои шабакаҳои иҷтимоӣ, корбарон метавонанд бидуни маҳдудияти вақт дар эстафетаи онлайнии машъал ширкат варзанд ва аз ин маросими бошукӯҳи варзишӣ ва фарҳангӣ лаззат баранд".
Таҳти мавзӯи "Ҳавои сард ва дилҳои гарм - эҷоди хотираҳои якумрӣ" дар вебсайти "Эстафетаи онлайни машъал" нақша мавҷуд аст. Барои иштирок дар ин чорабинӣ корбарони интернет дар саросари ҷаҳон метавонанд ба аккаунти расмии Бозиҳои 9-уми зимистонаи Осиё – Ҳарбин-2025 дар “WeChat” ворид шаванд, тугмаи "Машъали рақамӣ"-ро клик кунанд. Ҳар як машъали рақамӣ соҳиби шаҳодатнома мегардад ва имкони бурди туҳфаҳоро дорад.
Ҳарбин-2025 як чорабинии муҳими байналмилалии варзишҳои зимистона барои Чин пас аз Олимпиадаи зимистонаи Пекин-2022 мебошад. Ин шаҳр 29 сол пеш мизбони бозиҳо буд.

Умаралӣ САФАРАЛӢ, “Ҷумҳурият”