БОЗИҲОИ МАҶМУӢ

Сабти рекордии иштирокчиён дар 9-ум Бозиҳои зимистонаи Осиё 
Кумитаи тадорукоти Бозиҳои зимистонаи Осиё эълон кард, ки аз 7 то 14-уми феврал дар мусобиқаҳои варзишии болои яху барф дар Ҳарбини Чин варзишгарон аз 34 кишвари қора иштирок мекунанд, ки рекорд аст. Дар ин бора сомонаи расмии Шурои олимпии Осиё хабар додааст.
Дар Бозиҳои 8-уми зимистонаи Осиё дар Саппорои Ҷопон (2017) 30 кишвари Осиё ҳайатҳояшонро фиристода буданд. 34 кумитаи миллии олимпиро дар Ҳарбин 1275 варзишгар намояндагӣ хоҳанд кард, ки 128 нафар бештар аз Бозиҳо Саппоро-2017 мебошад. Аз 1275 варзишгар 755 нафараш мард ва 520 нафар зан мебошад. 
"Интизор меравад, ки дар Ҳарбин шумораи аз ҳама зиёди кумитаҳои миллии олимпӣ ва варзишгарон ширкат кунанд. Ин шавқу рағбати афзояндаи варзишҳои зимистона дар саросари Осиёро инъикос мекунад", - гуфтааст Ли Гуанг, директори шуъбаи варзиши Кумитаи тадорукот. 

ФУТБОЛ
Низомномаи нахустин мусобиқаи "Ҷоми Роҳи Абрешим" тасдиқ шуд
Соли 2025 бори нахуст бо ташаббуси Ассотсиатсияи футболи Осиёи Марказӣ (CAFA) миёни клубҳои минтақа "Ҷоми Роҳи Абрешим" доир мегардад.
Тибқи низомнома мусобиқа аз марҳалаҳои интихобӣ, гурӯҳӣ ва ниҳоӣ иборат аст. Дар мусобиқа 10 даста иштирок мекунад. 6 даста – чемпионҳои Эрон, Ӯзбекистон, Туркманистон, Тоҷикистон, Қирғизистон ва Афғонистон соҳиби роҳхати мустақим ба марҳалаи гурӯҳӣ мешаванд. Барандагони Ҷоми кишварҳои Туркманистон, Тоҷикистон, Қирғизистон ва Афғонистон дар марҳалаи интихобӣ барои 2 роҳхати дигари марҳалаи гурӯҳӣ талош мекунанд. 
Ҳар даста дар гурӯҳ 3 бозӣ анҷом медиҳад. Ғолибони гурӯҳҳо ва дастаҳои ҷойи дуюм ба қисми ниҳоӣ роҳхат мегиранд. Дастаи ҷойи дуюми гурӯҳҳо барои ҷойи сеюм, ғолибон барои унвони чемпионӣ мубориза мебаранд.
Бозиҳои марҳалаи интихобӣ охири моҳи март ва марҳалаи ниҳоӣ аз 26-уми апрел то 6-уми май барпо мешаванд. 
Дар мусобиқаи мазкур Тоҷикистонро дастаҳои “Истиқлол” ва “Регар-ТадАЗ” намояндагӣ мекунанд.

Ҷоми ФФТ-2025 дар минтақаи Душанбе оғоз шуд
Марҳалаи муқаддамотии мусобиқаи анъанавии Ҷоми Федератсияи футболи Тоҷикистон-2025 дар минтақаи Душанбе 21-уми январ оғоз ёфт. Бозиҳои муқаддамотии мусобиқа дар се минтақа – Душанбе, Хатлон ва Суғд роҳандозӣ мешавад. Аз минтақаи Душанбе чор даста, аз Суғду Хатлон дудастаӣ ба марҳалаи ниҳоӣ роҳхат мегиранд.
Дар минтақаи Душанбе шаш дастаи лигаи олӣ - «Истиқлол» (Душанбе), КМВА (Душанбе), «Ҳосилот» (Фархор), «Регар-ТадАЗ» (Турсунзода), «Барқчӣ» (Ҳисор), «Ҳулбук» (Восеъ) ва панҷ дастаи лигаи якум – «Шодмон» (Ҳисор), «Сардор» (Турсунзода), «Ёқут» (Ваҳдат), «Душанбе» (Душанбе) ва «Рангон» (ноҳияи Рӯдакӣ) иштирок мекунанд.
Дар даври аввали мусобиқа дар минтақаи Душанбе дар гурӯҳи “Б” ду бозӣ баргузор шуд. “Истиқлол” аз “Ҳосилот” (0:1), “Сардор” аз “Ҳулбук” (0:2) мағлуб гаштанд.

Умаралӣ САФАРАЛӢ, “Ҷумҳурият”