АЗ НИШАСТҲОИ МАТБУОТӢ
ВАЗОРАТИ ФАРҲАНГ
Барои таҳқиқоти бостоншиносӣ 26 иҷозатнома дода шуд
Матлубахон Сатториён, вазири фарҳанг, дар нишасти матбуотӣ иттилоъ дод, ки барои баргузории таҳқиқотҳои бостоншиносӣ ба олимону бостоншиносон 26 иҷозатнома дода шуд.
Дар айни замон 2 ёдгории нав дар ноҳияи Айнӣ ва шаҳри Панҷакент кашф гардид. Дар самти ёдгориҳои таърихиву фарҳангии долони “Фарғона- Сирдарё” корҳои номинатсионӣ идома дошта, парвандаи номинатсионии “Хутали қадим” бо фарогирии 11 ёдгории таърихиву фарҳангии ҳудуди вилояти Хатлон, аз ҷумла ёдгориҳои Қалъаи Ҳулбук, Шаҳристони Ҳулбук, Шаҳраки Манзаратеппа (аз ноҳияи Восеъ), Қалъаи Золи Зар, Мақбараи Мавлоно Тоҷиддин (аз ноҳияи Данғара), Шаҳристони Золи Зар, Шаҳртеппа, Корвонсаройи Тоҳир (аз ноҳияи Фархор), Дайри Буддои Хиштеппа (аз ноҳияи Ховалинг), Дайри Буддои Аҷинатеппа (аз ноҳияи Вахш), шаҳраки Ҳалевард (аз ноҳияи Ҷалолиддини Балхӣ) ба феҳристи муқаддамотии ЮНЕСКО ворид карда шуданд.
- Айни замон корҳо дар самти таҳия ва ворид намудани номинатсияҳои “Ахтаршиносӣ/ситорашиносӣ”, афсонаҳои “Ҳазору як шаб” ва “Нардбозӣ” ҳамчун бозии миллӣ ва мардумӣ, инчунин номинатсияи “Тоқӣ” ба Феҳристи репрезенттативии ЮНЕСКО идома дошта, аз ҷониби Пажӯҳишгоҳи илмӣ-тадқиқотии фарҳанг ва иттилоот Феҳристи миллии мероси фарҳанги ғайримоддӣ такмил дода мешавад, - гуфт Матлубахон Сатториён.
Лола РИЗОӢ
НОСИР САИДЗОДА:
“Дар соли 2024 ду санади нави ҳамкорӣ ба имзо расид”
Зимни нишасти матбуотӣ Носир Саидзода, раиси Кумитаи телевизион ва радиои назди Ҳукумати Ҷумҳурии Тоҷикистон, зикр кард, ки соли сипаригардида байни Кумита ва сохторҳои марбутаи давлатҳои хориҷӣ ҷиҳати рушду таҳкими ҳамкорӣ дар соҳаи телевизион ва радио санади нави ҳамкорӣ, аз ҷумла ёддоштҳои тафоҳуми ҳамкорӣ байни Кумитаи телевизион ва радиои назди Ҳукумати Ҷумҳурии Тоҷикистон ва сохторҳои марбутаи Ҷумҳурии Қазоқистон ва Ҷумҳурии Мардумии Чин, ба имзо расиданд.
Дар ин давра вобаста ба масъалаҳои рушди ҳамкории байналмилалӣ, аз ҷумла дар бахшҳои такмили ихтисоси кормандон, таҳияи филмҳои аниматсионӣ бо намояндагони ЮНИСЕФ дар Тоҷикистон, Агентии Туркия оид ба ҳамкорӣ ва ҳамоҳангсозӣ (ТИКА) дар Тоҷикистон, Созмони садо ва симои Ҷумҳурии Исломии Эрон, Шурои роҳбарони ташкилоти давлатӣ ва ҷамъиятии телевизион ва радиои кишварҳои аъзои Иттиҳоди Давлатҳои Мустақил суҳбату вохӯриҳо анҷом дода шуданд.
Ҳамчунин, дар татбиқи бандҳои Барномаи давлатии рушди телевизион ва радио дар Ҷумҳурии Тоҷикистон барои солҳои 2021-2025 ва Барномаи давлатии рушди пахши телевизиони рақамӣ дар Ҷумҳурии Тоҷикистон барои солҳои 2020-2024 корҳои зиёд сомон ёфтанд. Дар доираи Барномаи давлатии рушди телевизион ва радио дар Ҷумҳурии Тоҷикистон барои солҳои 2021-2025 танҳо соли гузашта 428 корманди шабакаҳои телевизион, радио, нашрияҳои даврӣ, котибони матбуоти вазорату идораҳо ба такмили ихтисос фаро гирифта шуданд.
Зикруллоҳ РАҶАБЗОДА
Хизмати коммуналӣ ба талаботи муосир мувофиқ мегардад
Кумитаи хоҷагии манзилию коммуналӣ соли гузашта ба истифодабарандагон ба маблағи 245 миллиону 495,3 ҳазор сомонӣ хизмат расондааст, ки назар ба ҳамин давраи соли қаблӣ 37 миллиону 623 ҳазор сомонӣ (118,1 дарсад) бештар мебошад.
Зимни нишасти матбуотӣ зикр гардид, ки соли рафта ба суратҳисоби мақомоти андози шаҳру ноҳияҳо ва деҳоти ҷумҳурӣ аз рӯи ҳамаи намуди андозҳо 51 миллиону 88 ҳазор сомонӣ ворид гаштааст. Дар самти хизматрасонии коммуналии корхонаҳои тобеи ташкилоти низоми Кумита, воқеъ дар шаҳру ноҳияҳои мамлакат, ба истифодабарандагон ба маблағи 106 миллиону 504 ҳазор сомонӣ корҳо дар самти кашондану безарар намудани партовҳои сахти маишӣ анҷом дода шуданд.
Ҷамшед Табарзода Афзал, раиси Кумита, гуфт, ки дар асоси Барномаи рушди хоҷагии коммуналӣ дар Ҷумҳурии Тоҷикистон барои солҳои 2021-2024 ва дар доираи Консепсияи ислоҳоти хоҷагии манзилию коммуналӣ дар Ҷумҳурии Тоҷикистон барои солҳои 2010-2025 дастрасии аҳолии шаҳру ноҳияҳо ва деҳаву деҳкадаҳои ҷумҳурӣ ба оби нӯшоӣ нисбат ба соли 2020-ум 964 145 нафар зиёд гардидааст.
Корхонаҳои соҳаи обтаъминкунӣ ва рафъи обҳои партови тобеи Корхонаи воҳиди давлатии «Хоҷагии манзилию коммуналӣ», воқеъ дар шаҳру ноҳияҳои ҷумҳурӣ, соли сипаришуда таъминоти оби нӯшоиро ба миқдори 78 миллиону 740 ҳазор метри мукааб расонда, 21 миллиону 709 ҳазор метри мукааб баровардани партовобҳоро таъмин намуданд.
Кароматулло АТО
«ТВ-САФИНА»
Ҳамкориҳо бештар мегарданд
Садриддин Шамсуддинзода, директори Муассисаи давлатии «Телевизиони Сафина», дар нишасти хабарӣ тазаккур дод, ки идораи таҳия ва дубляж дар соли гузашта 37 филми телевизионӣ ва 18 филми ҳуҷҷатӣ таҳия кард. Муассиса 60 филми бадеиро дар ҳаҷми зиёда аз 105 соат дар мавзуъҳои гуногун тарҷума ва дубляж карда, пешниҳоди бинандагон гардонд.
Инчунин, ТВ “Сафина» ҳамкориҳоро бо шабакаҳои телевизионии хориҷӣ сол ба сол тақвият мебахшад. Аз ҷумла, бо Медиакорпоратсияи Ҷумҳурии Мардумии Чин “CMG” Ёддошти тафоҳуми ҳамкорӣ ба имзо расонд.
Ҳамчунин, тасмим доранд ҳамин сол дар доираи Ҷашни 20-солагии «ТВ-Сафина», “Радиои Сафина” ба мавҷ барояд.
– Дар Муассиса оид ба амалисозии ташаббуси панҷуми байналмилалии Президенти Ҷумҳурии Тоҷикистон дар бораи эълон шудани “Соли 2025 - соли байналмилалии ҳифзи пиряхҳо” миёни кормандон барои таҳияи “Беҳтарин филми мустанад” озмун эълон шуд. Ба озмун се филми мустанад: «Пиряхҳо», «Сарвати башарӣ», «Ванҷи ях» аз ҷониби муҳаррирони Муассисаи давлатии «Телевизиони Сафина» пешниҳод гардид. Ғолибон рӯзҳои наздик қадр мешаванд, - гуфт С. Шамсуддинзода.
Зикруллоҳ РАҶАБЗОДА
АГЕНТИИ ХИЗМАТИ ДАВЛАТӢ
Таваҷҷуҳ ба ҷавонон меафзояд
Дар давраи ҳисоботӣ барои ишғоли 4 ҳазору 737 мансаби холии маъмурии хизмати давлатӣ озмун эълон гардид, ки дар он 6 ҳазору 383 довталаб иштирок намуд. Дар натиҷа ба 4 ҳазору 173 довталаб барои ишғоли мансабҳои мазкур тавсия дода шуд.
Ин нуктаро Идрисзода Илёс, директори Агентии хизмати давлатии назди Президенти Ҷумҳурии Тоҷикистон, зимни нишасти матбуотӣ иброз дошт.
Тибқи иттилои номбурда, ба ҳисоби миёна ба ҳар як мансаби холӣ бо назардошти мансабҳои ба онҳо ҳуҷҷат супурданашуда 0,6 довталаб рост меояд.
Ҳамчунин, зикр гардид, ки аз 4 ҳазору 173 нафари ба мансабҳо таъингардида, 2 ҳазору 789 нафар ё 66,8 фоиз ҷавонони то 35-сола мебошанд. Довталабони бори аввал ба хизмати давлатӣ таъиншуда, ки нисбат ба онҳо талаботи банди 37-и Низомномаи мазкур 3 холи иловагӣ пешбинӣ карда шудааст, 759 нафарро ташкил медиҳад.
Шодмон АБДУРАҲИМ
БЕХАТАРИИ САНОАТӢ ВА ҶАВОБГАРИИ 340 ШАХСИ МАСЪУЛ
Дар Хадамоти назорати давлатии бехатарии корҳо дар саноат ва соҳаи кӯҳкорӣ 3588 корхона ва 15782 иншоот сабти ном шудаанд. Дар ин хусус зимни нишасти матбуотӣ сардори Хадамот Раҳим Санъат хабар дод ва гуфт, ки соли гузашта аз тарафи ҳашт нозироти давлатии марказӣ ва се нозироти комплексии назорати бехатарии саноатӣ дар ВМКБ ва вилоятҳои Суғду Хатлон дар корхона ва иншооти бақайдгирифташуда 270 назорати техникӣ, 236 нақшавӣ ва 34 ғайринақшавӣ гузаронда шуд.
Дар натиҷа 3500 банди вайронкунии санадҳои меъёрии ҳуқуқӣ ошкор шуда, барои бартараф сохтани онҳо ба корхонаҳо 270 санади нишондод ва 11 нишондод оид ба боздошти кор ирсол гардиданд. Соли рафта 340 шахси ҳуқуқӣ, мансабдор ва воқеии корхонаҳо барои камбудиҳо ба ҷавобгарии маъмурӣ кашида шуд, аз онҳо 1613536 сомонӣ ҷарима ситонданд.
Зикр гардид, ки дар корхонаву иншооти зериназоратии Хадамот дар давраи мавриди назар 48 ҳодисаи нохуш рух дода, 30 кас ҳалок ва 26 кас ҷароҳати ҷисмонӣ бардошт. Сабабҳои асосии ҳодисаҳои нохуш бемасъулиятии муҳандисони техникии корхонаҳо дар ҷойи ҳодиса, беаҳамиятии худи ҷабрдидагон ҳангоми кор, риоя нагардидани қоидаҳои бехатарии саноатӣ дар рафти иҷрои корҳои хатарнок, риоя накардани технологияи коркарди кон, ҳамчунин надоштани мутахассисони соҳавӣ мебошанд.
Барои роҳ додан ба камбудиҳо нисбат ба 7 шахси ҳуқуқӣ, 27 шахси мансабдор ва 5 шахси воқеӣ аз тарафи комиссияҳои тафтишотӣ ҷазои маъмурӣ татбиқ гардид. Маблағи ҷарима бар асари ҳодисаҳои нохуш нисбат ба масъулон татбиқгардида 182080 сомониро ташкил кард.
- Соҳибкоронро зарур аст, ки сатҳи донишу маърифати ҳуқуқии худро баланд бардошта, масъулиятшинос бошанд ва талаботи қонунҳо ва қоидаҳои бехатариро иҷро намоянд. Дар ин ҳолат шумораи ҳодисаҳои нохуш коҳиш меёбад, - гуфт Раҳим Санъат.
Зикр гашт, ки ба оилаи фавтидаҳо ва зарардидагон аз тарафи роҳбарони корхонаҳо, иттифоқҳои касаба ва шахсони воқеӣ дар асоси Кодекси меҳнати Ҷумҳурии Тоҷикистон ёрипулии яквақтаина, инчунин, кумакҳои пулӣ ва молӣ ба маблағи 8862156 сомонӣ расонда шуд.
Кароматулло АТО
САРИДОРАИ ГЕОЛОГИЯ
Файзнокии тилло ва нуқра ояндадор муайян карда шуд
Дар давоми соли 2024 Саридораи геологияи назди Ҳукумати ҷумҳурӣ омӯзиши геологии қаъри заминро аз ҳисоби маблағҳои буҷети давлатӣ аз рӯйи 29 лоиҳа дар объектҳои металлҳои сиёҳ, ранга, қиматбаҳо, нодир, сангҳои худҷило ва ороишӣ, ҳамчунин гидрогеология, геологияи муҳандисӣ ва геоэкология анҷом дод.
Дар ин бора Илҳомҷон Оймуҳаммадзода, сардори Саридораи геология, иттилоъ дод.
Ҳамчунин, зикр гашт, ки омӯзиши геологӣ тавассути гузаштани хатсайрҳои ҷустуҷӯӣ бо мушоҳидаи радиометрӣ, аксбардории топографӣ, аксбардории геологӣ, иктишофи магнитии миқёси 1:10 000, корҳои хандакканӣ, тозакунӣ ва ҳуҷҷатгузории онҳо, ғайр аз ин, маҳакбардорӣ ва коркарди маҳакҳо, сохтмон ва барқарорсозии роҳ, омодасозии майдончаҳои пармакунӣ, пармакунии пармачоҳҳо ва дигар корҳои ёрирасон сурат гирифта, натиҷаҳои назаррас ба даст омаданд.
Аз ҷумла, дар зуҳуроти сурмаи Офтобӣ натиҷаи ташхиси пробирии маҳакҳо файзнокии тиллоро аз 0,1 то 2,5 г/т ва нуқраро аз 0,98 то 12,33 г/т нишон дод, ташхиси кимиёвии маҳакҳо бошад, файзнокии сурмаро аз 0,05 то 5,06 дарсад муайян намуд. Таҳлилҳо нишон медиҳанд, ки объекти мазкур ояндадор мебошад.
Оҳистамоҳ ВАФОБЕК
789 стансияи базавӣ насб гардид
Дар ҷумҳурӣ дар соли сипаришуда шумораи умумии муштариёни ба шабакаҳои алоқаи барқӣ пайвастшуда баъди дар амал татбиқ намудани фармони Президенти Ҷумҳурии Тоҷикистон «Дар бораи тартиб ва талаботи пайвастшавӣ ба шабакаи алоқаи барқӣ ва хизматрасониҳои вобаста ба он» 8 миллион нафарро ташкил дод. Зиёда аз 5 миллиони онҳо муштариёни фаъол мебошанд.
Барои беҳтар кардани хизматрасонии алоқа тадбирҳои зарурӣ андешида шуданд, аз ҷумла 798 стансияи базавӣ ва бештар аз 300 километр хатти нахи нурӣ барои вусъат бахшидани фаъолияти стансияҳои базавӣ ва дастрасӣ ба шабакаи баландсуръати Интернет насб гардиданд.
Дар ин бора Исфандиёр Саъдулло, сардори Хадамоти алоқаи назди Ҳукумати ҷумҳурӣ, хабар дода, гуфт, ки тадбирҳои андешида бо мақсади иҷрои фармони Президенти Ҷумҳурии Тоҷикистон «Дар бораи вусъат додани ҳисоббаробаркунии ғайринақдӣ» роҳандозӣ гардида, ҳамчунин, аз ҷониби ширкатҳои мобилӣ мошинҳои махсуси алоқаи сайёр ба истифода дода шуданд ва замимаҳои бонкинги мобилӣ дар смартфонҳо низ ба кор даромаданд.
Оҳистамоҳ ВАФОБЕК
ВҲИ
1730 муроҷиати шахсони воқеӣ ва ҳуқуқӣ
Дар соли 2024 ба мақомоти Ваколатдор оид ба ҳуқуқи инсон 1730 муроҷиати шахсони воқеӣ ва ҳуқуқӣ ворид гардид. 518 муроҷиат дар Дастгоҳи марказӣ ба қайд гирифта шуда, 70-тои он ҳалли мусбати худро ёфт.
Ин нуктаро Умед Бобозода, Ваколатдор оид ба ҳуқуқи инсон дар Ҷумҳурии Тоҷикистон зимни нишасти матбуотӣ зикр намуд.
Ба иттилои мавсуф, соли рафта бо мақсади мусоидат кардан дар такмили қонунгузорӣ аз ҷониби кормандони ин сохтор 66 санади меъёрии ҳуқуқӣ мавриди омӯзиш қарор гирифта, ба лоиҳаи 38 кодексу қонун, 3 қарори Ҳукумати Ҷумҳурии Тоҷикистон, 9 барномаву стратегия ва консепсияҳо ва 16 фармони Президенти Ҷумҳурии Тоҷикистон хулосаҳо пешниҳод шуданд.
Судобаи ФАЙЗАЛӢ
ИМТИЁЗҲОИ ХАТМКУНАНДАГОНИ АКАДЕМИЯИ ИДОРАКУНИИ ДАВЛАТӢ
28-уми январи соли ҷорӣ дар Академияи идоракунии давлатии назди Президенти Ҷумҳурии Тоҷикистон нишасти матбуотӣ баргузор гардид, ки дар он масъалаи талаботи бозори меҳнат ба хатмкунандагони Академия мавриди баррасӣ қарор гирифт.
Тибқи маълумоти пешниҳодшуда, хатмкунандаи магистратураи Академия як зина болоравии мансабӣ ба даст меорад. Инчунин, аксари донишҷӯёне, ки дар давраи таҳсил ба таҷрибаомӯзӣ фиристода мешаванд, дар ҷараёни он ба кор ҷалб мегарданд. Ин нишондиҳанда бозгӯи сатҳи баланди омодагии кадрҳои Академия ба ниёзҳои бозори меҳнат мебошад.
Ҳамзамон, зикр гардид, ки Академия дорои 8 маркази муштарак бо академияҳои кишварҳои хориҷӣ мебошад. Яке аз онҳо Маркази дӯстӣ ва ҳамкориҳои Созмони ҳамкории Шанхай (СҲШ) мебошад, ки соли 2021 таъсис ёфтааст. Инчунин, Академия нақша дорад, ки дар доираи Иттиҳоди Давлатҳои Мустақил (ИДМ) маркази таҳлилии муштарак таъсис диҳад.
Бо мақсади рушди илм ва ҳавасманд гардондани муҳаққиқон, Шурои олимони Академия қарор қабул кардааст, ки барои ҳимояи рисолаҳои илмии докторӣ 15 ҳазор сомонӣ ва барои рисолаҳои номзади илм 10 ҳазор сомонӣ ҷудо гардад.
Амалисозии чунин тадбирҳо барои омодасозии мутахассисони баландихтисос, ки метавонанд талаботи бозори меҳнатро қонеъ намоянд, мусоидат хоҳад кард.
Дилноз ҲУКУМАТУЛЛОЕВА
ДМТ
Маркази омӯзиши
паёмҳои Пешвои миллат
ба Маҷлиси Олӣ
Эмомалӣ Насриддинзода, ректори Донишгоҳи миллии Тоҷикистон, зимни нишасти матбуотӣ гуфт, ки аз рӯи мониторинг сифати таҳсил дар соли гузашта беҳтар гардид ва, ҳамчунин, барои ҳамгироии илм бо истеҳсолот Донишгоҳ бо як қатор сохторҳо ва корхонаҳо шартнома баст. Ин ба ворид шудани донишҷӯён ба раванди истеҳсолот мусоидат менамояд.
Ба саволи хабарнигори рӯзнома вобаста ба фарқ миёни Маркази омӯзиши паёмҳои Пешвои муаззами миллат ба Маҷлиси Олӣ, ки ба наздикӣ таъсис меёбад, аз Маркази илмӣ - таҳқиқотии Пешвои миллат дар чист, афзуд, ки Маркази навтаъсис барои донишҷӯён буда, асосан, паёмҳо мавриди омӯзиш қарор мегиранд. Зеро омӯзиши паёмҳои Пешвои миллат барои насли ҷавони кишвар бисёр муҳим мебошанд. Нафароне, ки ба таҳқиқи муҳтавои паёмҳо машғуланд, метавонанд аз иқтидорҳои Марказ фоида баранд.
Меҳрангез ҚОДИРОВА
ОМӮЗГОРӢ
Ба ҷойи кор ҳозир нашудани мутахассисони ҷавон аз масъалаҳои ҳалталаб боқӣ мемонад
- Тақсимот ва ба ҷойи кор ҳозиршавии мутахассиони ҷавони равияи омӯзгорӣ дар меҳвари таваҷҷуҳ буда, соли сипаришуда 447 (148 квота) хатмкунандаи буҷетии шуъбаи рӯзона тибқи роҳхати Вазорати маориф ва илм ба фаъолияти омӯзгорӣ сафарбар шуд. Аз шумораи умумӣ 60 нафар бо сабабҳои гуногун ба ҷойи кор ҳозир нагардид, аз онҳо 19 нафар дар ҳаҷми 272460 сомонӣ маблағи таҳсилро ба буҷети давлат баргардонд, - гуфт Аҳлиддин Ибодуллозода, ректори Донишгоҳи давлатии омӯзгории Тоҷикистон ба номи Садриддин Айнӣ, дар нишасти хабарӣ.
Аҳлиддин Ибодуллозода таъкид кард, ки корҳоро боз ҳам дар ин самт пурзӯр менамоянд, зеро дар ҷомеаи ҷаҳонӣ талабот ба мутахассисони ҷавони дорои касбияти баланд рӯз ба рӯз бештар мегардад. Бо ин мақсад соли рафта 59 нафар, аз ҷумла 13 омӯзгор ҷиҳати гузаштан аз такмили ихтисос, 22 нафар барои иштирок дар чорабиниҳои илмӣ ва 24 донишҷӯ дар самти табодули академӣ ба донишгоҳҳои хориҷи кишвар сафарбар шуданд. Инчунин, дар асоси фармони Президенти Ҷумҳурии Тоҷикистон байни Ҷумҳурии Тоҷикистон ва Бонки осиёии рушд дар доираи Лоиҳаи “Такмили таҳсилоти миёна дар соҳаҳои илмҳои табиӣ, технологӣ, муҳандисӣ ва математика” созишномаи грантӣ барои солҳои 2024-2029 баста шуд.
- Ҳадафи лоиҳа таъмири хобгоҳи духтарон, навсозии лабораторияҳо, замонавӣ кардани таҷҳизоти илмӣ, пешниҳоди стипендияҳо ба донишҷӯдухтароне, ки аз рӯи ихтисосҳои фанҳои дақиқ (STEM) таҳсил мекунанд, ташкили курсҳои ТИК, аз ҷумла омӯзондани забони англисӣ ба омӯзгорони фанҳои дақиқ мебошад, - иброз дошт Аҳлиддин Ибодуллозода.
Лола РИЗОӢ
ҚУДРАТ ДАВЛАТЗОДА:
“Ҳамкориҳо бо донишгоҳҳои хориҷӣ бештар мегарданд”
Қудрат Давлатзода, ректори Донишгоҳи техникии Тоҷикистон ба номи академик М.С. Осимӣ, зимни нишасти матбуотӣ зикр намуд, ки соли 2024 дар соҳаҳои муҳандисӣ 52 донишҷӯ ва зиёда аз 60 устодону кормандони Донишгоҳ дар давлатҳои пешрафтаи хориҷӣ табодули таҷриба намуда, дар чорабиниҳои гуногуни илмию фарҳангӣ Тоҷикистонро муаррифӣ карданд.
- Дар соли ҳисоботӣ донишҷӯён бо Донишгоҳи IT Остона, Донишгоҳи миллии Авруосиё ба номи Л.Н. Гумилёв, Донишгоҳи меъморӣ - сохтмонии Самарқанд ба номи Мирзо Улуғбек, Донишгоҳи шаҳрсозии Тянҷини Ҷумҳурии Мардумии Чин, Донишгоҳи касбӣ-техникии идораи шаҳрсозии Тянҷини Ҷумҳурии Мардумии Чин, Донишгоҳи миллии техникии Беларус, Академияи давлатии авиатсияи Белорус, Донишгоҳи байналмилалии нафту гази Туркманистон, Маркази омӯзиши робототехникаи шаҳри Истанбул, Маркази омӯзишии дронҳои бесарнишини ширкати шаҳри Анқара табодули академӣ анҷом доданд ва нимсолаи дуюми соли таҳсили 2024-2025 табодули академии донишҷӯён бо Донишгоҳҳои Испания, Руминия ва Лаҳистон дар назар аст. Дар маҷмуъ, то имрӯз бо 160 донишгоҳ ва созмону ташкилотҳои байналмилалӣ созишномаҳои ҳамкорӣ бобати тарбияи мутахассисони баландпоя бастем, - гуфт Қудрат Давлатзода.
Ҳамчунин, ректор зикр намуд, ки дар соли таҳсили 2024-2025 Донишгоҳ наздик ба 700 донишҷӯи хориҷии кишварҳои Ӯзбекистон, Россия, Афғонистон, Чин, Қириғизистон ва Туркманистону Қатарро ба таҳсил фаро гирифтааст.
Зикруллоҳ РАҶАБЗОДА
Санаи нашр: 31.01.2025 №: 25
